Gürcüstan parlamentində Ümummilli lider Heydər Əliyevin xatirəsinə həsr olunmuş anım tədbiri keçirilib

Bakı:

28 °C

42 %

1 m/s

AZ RU EN

Ana səhifə / Siyasət / Gürcüstan parlamentində Ümummilli lider Heydər Əliyevin xatirəsinə həsr olunmuş anım tədbiri keçirilib

Gürcüstan parlamentində Ümummilli lider Heydər Əliyevin xatirəsinə həsr olunmuş anım tədbiri keçirilib

13.12.2014 [11:58]

Xalqımızın Ümummilli lideri, müstəqil Azərbaycanın banisi və qurucusu Heydər Əliyevin çoxşaxəli fəaliyyəti milli məzmun kəsb etməsi ilə yanaşı, həm də bəşəri əhəmiyyətə malikdir. Onun təşəbbüsü ilə reallaşdırılan layihələr respublikamızın çiçəklənməsinə yol açmaqla yanaşı, region ölkələrinin və xalqlarının da mənafeyinə xidmət edib. Bunun nəticəsidir ki, Ulu öndərin əziz xatirəsi Azərbaycanın hüdudlarından kənarda da böyük minnətdarlıq hissi ilə yad edilir.
Ulu öndərin əziz xatirəsini yad etmək məqsədilə dünən Gürcüstan parlamentində tədbir keçirilib. Bu barədə Gürcüstan parlamentində təmsil olunan azərbaycanlı deputat Mahir Dərziyev məlumat verib. Onun bildirdiyinə görə, tədbirə parlamentin vitse-spikerləri, komitə sədrləri, deputatlar, eləcə də müxalifətyönlü fraksiyaların təmsilçiləri qatılıblar. Qonşu ölkənin İctimai Televiziyası ilə canlı yayımlanan tədbiri Gürcüstan parlamentinin Azərbaycanla dostluq qrupunun sədri Zurab Tkemaladze açıb. Gürcüstanlı deputatlar dünya şöhrətli siyasi xadim Heydər Əliyevin əziz xatirəsini bir dəqiqəlik sükutla yad ediblər.
Tədbirdə Gürcüstan parlamentinin vitse-spikerləri M.Kobaxidze, D.Bakradze, “Gürcü arzusu” fraksiyasının sədri Q.Volski, “Gürcü arzusu-Sənayeçilər” fraksiyasının sədri Q.Topadze, parlamentin Gənclər və idman komitəsinin sədri, Gürcüstan Olimpiya Komitəsinin rəhbəri Y.Xabelov, müxalifətdən olan fraksiya sədri A.Boboxidze, deputatlardan M.Dərziyev, D.Baseleişvili, E.Çapidze, Ə.Məmmədov, Z.Kvaçantiradze çıxış ediblər. Çıxışlarda Heydər Əliyevin dünya miqyasında tanınan siyasətçilər arasında özünəməxsus yer tutduğu və bugünkü Azərbaycanın uğurlarının memarı olduğu vurğulanıb. Deputatlar, həmçinin, Heydər Əliyevin çoxşaxəli fəaliyyətinin Gürcüstan-Azərbaycan əlaqələrinin möhkəmlənməsinə sanballı töhfələr verdiyini, bu ölkənin iqtisadi cəhətdən inkişafında mühüm rol oynadığını bildiriblər. Gürcüstan parlamentinin üzvləri Heydər Əliyevin böyük töhfələr verdiyi iki ölkə arasında dostluq əlaqələrinin bu gün daha da dərinləşdiyini diqqətə çatdırıblar. Qeyd olunub ki, Heydər Əliyevin uzaqgörənliyi sayəsində reallaşdırılan enerji siyasəti regionda əməkdaşlığın dərinləşməsində mühüm rol oynayıb: “Bu gün Gürcüstandan keçən Bakı-Supsa, Bakı-Ərzurum kəmərləri uğurla istismar olunaraq hər iki ölkənin rifahına xidmət göstərir. Gürcüstanla Azərbaycan arasında bərqərar olan sıx dostluq əlaqələri yeni regional və qlobal əhəmiyyətli Bakı-Tbilisi-Qars dəmiryolu layihəsinin reallaşdırılmasına zəmin yaradıb”.
Çıxışlarda xüsusi vurğulanıb ki, Gürcüstan-Azərbaycan dostluğunun möhkəmlənməsi qonşu respublikada yaşayan azərbaycanlıların bu ölkənin cəmiyyətinə inteqrasiya olunmasında da öz əksini tapıb. Gürcüstanın aborigen sakinləri olan azərbaycanlılar bu gün Ümummilli lider Heydər Əliyevin zamanında verdiyi tövsiyələrə uyğun olaraq, bu ölkədə fəal vətəndaş mövqeyində dayanır və əməlləri ilə dövlətçiliyə sadiq olduqlarını nümayiş etdirirlər.
Mübariz

Paylaş:

Baxılıb: 874 dəfə