Qərb diplomatlarının növbəti ucuz “şousu”

Bakı:

5 °C

100 %

3 m/s

Əlaqə

AZ RU EN

Ana səhifə / Siyasət / Qərb diplomatlarının növbəti ucuz “şousu”

Qərb diplomatlarının növbəti ucuz “şousu”

06.12.2024 [10:39]

XİN: Məhkəmə proseslərinə müdaxilə hüquqi dövlətin əsas prinsipi olan qanunun aliliyinə ziddir

Hazırda beynəlxalq münasibətlər sistemində dərin böhran mövcuddur. Bu gün dünyada beynəlxalq nizam pozulub, beynəlxalq hüquq normaları işləmir. Belə olan halda bir sıra hegemon dövlətlər digər xalqlara münasibətdə öz maraqları baxımından yanaşırlar. Qərbin və onun təsir dairəsində olan beynəlxalq təşkilatların geosiyasi ambisiyalara söykənən maraqları da dünyada ciddi təhdidlər yaradır. Həmin dairələrin yanaşmasında özünü göstərən başlıca tendensiyalardan biri də ikili standartlara əsaslanan mövqedir.

İkili standartların növbəti nümunəsi

Məlumdur ki, ərazi bütövlüyünü və suverenliyini öz gücünə bərpa edən Azərbaycan dövləti Cənubi Qafqaz regionunda yeni reallıqlar yaradıb. Bu amil, həm də dövlətimizin beynəlxalq münasibətlər sistemində nüfuzunu və mövqelərini gücləndirir. Təəssüf doğruran hal odur ki, Azərbaycan BMT Nizamnaməsinə uyğun olaraq ərazi bütövlüyünü və suverenliyini bərpa etdikdən sonra Qərbin təsir dairəsində olan beynəlxalq təşkilatlar ölkəmizə qarşı aqressiv münasibət sərgiləyirlər ki, bu da ikili standartların və riyakarlığın pik həddidir. Xüsusilə, dünyanın miqyası baxımından ən böyük tədbiri olan COP29 ərəfəsində müxtəlif beynəlxalq təşkilatlar və ölkələr dəfələrlə ölkəmizə qarşı əsassız və qeyri-obyektiv qətnamələr qəbul edib.

Hazırda bu proses davam etməkdədir. Belə ki, dekabrın 4-də Avropa İttifaqının Bakıdakı nümayəndəliyi Böyük Britaniya və İsveçrə səfirlikləri ilə birlikdə Beynəlxalq İnsan Hüquqları Gününə həsr olunmuş qəbul təşkil edib. Tədbirdə “hüquq müdafiəçiləri”, vətəndaş cəmiyyəti, media nümayəndələri və s. iştirak ediblər. Bu diplomatik missiyaların rəhbərləri, eləcə də ABŞ səfiri öz çıxışlarında insan hüquqlarının təminatında vətəndaş cəmiyyətinin rolunun vacibliyini qeyd ediblər. Onlar həmçinin deyiblər ki, guya Azərbaycanda insan hüquqları ilə bağlı vəziyyət noyabrda Bakıda keçirilən COP29 iqlim konfransı ilə bağlı gözləntilərin əksinə olaraq daha da “pisləşib”. Onlar “siyasi məhbusları” azad etməyə çağırıblar. Tədbirdə hətta Azərbaycanda “LGBT icması” ilə bağlı vəziyyətin “pisləşməsi” də dərin məyusluqla ifadə edilib.

Lakin Azərbaycan Xarici İşlər Nazirliyi bu iddiaları qəbul etməyib. Belə ki, nazirliyin “X” sosial şəbəkəsindəki hesabında qeyd olunub: “Dekabrın 4-də Bakıda keçirilən tədbir zamanı Avropa İttifaqı (Aİ), eləcə də ABŞ, Böyük Britaniya və İsveçrə səfirlərinin Azərbaycanda “jurnalistlər” və “siyasi fəallar”ın saxlanması ittihamı ilə bağlı mütəşəkkil müdaxilələrini qəti şəkildə rədd edirik. Bu bəyanatlar Azərbaycan məhkəmə sisteminin müstəqilliyinə açıq şəkildə zərbə vurmaq cəhdidir. Məhkəmə proseslərinə müdaxilə hüquqi dövlətin əsas prinsipi olan qanunun aliliyinə ziddir”.

Qərb müxtəlif bəhanələrlə təzyiq etməyə çalışır

Ümumiyyətlə, Azərbaycan özünün xarici siyasətində Qərblə və beynəlxalq təşkilatlarla da tərəfdaşlıq, bərabərhüquqluluq, qarşılıqlı etimad prinsiplərinə əsaslanan əlaqələr qurmağa üstünlük verir. Lakin təəssüf ki, bu səmimi siyasət qarşı tərəfdən bəzən lazımınca qiymətləndirilmir.

Avropa İttifaqı və sözügedən dövlətlər 30 il Azərbaycana qarşı işğalçı siyasət yürütmüş və xalqımıza qarşı çoxsaylı müharibə cinayət törətmiş Ermənistana qarşı heç bir addım atmayıblar. Əksinə, işğalçı ölkənin baş nazirinin Avropa Parlamentinin toplantısına dəvət edilməsi, “təntənəli” qarşılanması və onun tribunasından çıxış etməsi sadəcə ikili standartların deyil, riyakarlığın zirvəsi hesab etmək olar. ABŞ Konqresində, Niderland parlamentində də dəfələrlə ölkəmizə qarşı əsassız və qeyri-obyektiv müzakirələr aparılıb, sənədlər qəbul edilib. O cümlədən, işğalçı Ermənistana qarşı indiyə kimi heç bir sənəd qəbul etməyən AŞPA bu ilin yanvarında müxtəlif bəhanələrlə Azərbaycan nümayəndə heyətini səs hüququndan məhrum etmək haqqında qərar qəbul edib. Eləcə də, ATƏT və BMT kimi beynəlxalq təşkilatlar Ermənistanın işğalçılıq siyasəti ilə əlaqədar ikili standartlardan çıxış edib, prinsipial mövqe nümayiş etdirməyib.

Əlbəttə ki, belə faktların sayını kifayət qədər artırmaq olar. Amma bir reallıq dəyişməzdir ki, Azərbaycan hər zaman ikili standartlara qarşı etiraz səsini ucaldıb. Bu gün Azərbaycan güclü dövlət olaraq müstəqil siyasətini davam etdirir. Hansısa beynəlxalq təşkilatların, dövlətlərin ikili standartları və qərəzli mövqeyi Azərbaycanın haqlı və ədalətli siyasətinə təsir edə bilməz. Bu mənada Avropa İttifaqının Bakıdakı nümayəndəliyində keçirilən tədbirdə Qərb ölkələrinin diplomatlarının Azərbaycanı tənqid etməsinin heç bir əsası yoxdur.

Nardar BAYRAMLI

Paylaş:

Baxılıb: 465 dəfə