İqlim ailəsinin növbəti yüksək etimadı

Bakı:

27 °C

53 %

6 m/s

Əlaqə

AZ RU EN

Ana səhifə / Siyasət / İqlim ailəsinin növbəti yüksək etimadı

İqlim ailəsinin növbəti yüksək etimadı

05.12.2024 [09:21]

Azərbaycan COP16-nın Şərqi və Mərkəzi Avropa regional qrupunun sədri və Büro üzvü seçilib

Dekabrın 2-13-də Səudiyyə Ərəbistandada keçirilən BMT-nin Səhralaşmaya qarşı mübarizə Konvensiyasının 16-cı Tərəflər Konfransı (COP16) çərçivəsində Azərbaycan yekdilliklə təmsil olunduğu Mərkəzi və Şərqi Avropa regional qrupuna iki il müddətinə sədr və COP16 Bürosuna üzv seçilib. Sədrlik dövründə ölkəmiz, həmçinin qurumun Tərəflər Konfransının vitse-prezidentliyini də həyata keçirəcək. Adıçəkilən Qrupa Azərbaycanla birlikdə Şərqi və Mərkəzi Avropadan 15 dövlət daxildir. Ölkəmizin bu mötəbər təsisatın Büro üzvü və Mərkəzi və Şərqi Avropa regional qrupuna sədr seçilməsi növbəti böyük etimadın və hörmətin təzahürüdür. Bu, COP16 beynəlxalq iqlim ailəsinin ölkəmizin qlobal tədbirlərə ləyaqətli və xüsusi peşəkarlıq keyfiyyəti ilə ev sahibliyi etmək qabiliyyətinə verilən ali dəyərdir. 10 gün əvvəl COP29 sammitini mütəşəkkil təşkilatçılıq qabiliyyəti və məharəti ilə dünya COP hərəkatına təqdim edən Azərbaycanın daha bir uğurudur. 2024-cü ili “Yaşıl dünya naminə həmrəylik” ili kimi elan edərək dünyada nümunəvi ekoloji niyyət və əməlləri ilə fərqlənən Azərbaycan dünyanı yaşıl həmrəylik alyansında sıx birləşdirməklə əsil etibarlı tərəfdaş imicini möhkəmləndirib. Bu baxımdan, ölkəmiz COP16 toplantısında da layiqli yerini tutmaqdadır.

Su qıtlığı, ərzaq çatışmazlığı və torpaqların deqradasiyasına qarşı alyans

İqlim dəyişməsi su qıtlığı, ərzaq məhsullarının çatışmazlığı, torpaqların deqradasiyası və insanların yerdəyişməsi kimi mənfi təsirləri artırmaqdadır. Bu dəyişmələr ən həssas olan regionlarda münaqişə və qeyri-sabitlik üçün katalizator rolunu oynayır və qlobal problem olaraq dünya ölkələrinin narahatlığını artırır. Bu məqsədlə BMT-nin Səhralaşmaya qarşı mübarizə Konvensiyasının 16-cı Tərəflər Konfransı qeyd edilən fəsadların aradan qaldırılmasında əsas aparıcı platforma rolunu oynayır.

2001-ci ildə COP5 çərçivəsində təsis edilmiş BMT-nin Səhralaşmaya qarşı mübarizə Konvensiyasının Şərqi və Mərkəzi Avropa qrupunun Regional Fəaliyyət Proqramı 2015-ci ildə təsdiqlənib. Qrup çərçivəsində regional fəaliyyətin gücləndirilməsi, biliklərin artırılması, ekoloji kənd təsərrüfatı və sair prioritet sahələr müəyyən olunub. On iki regionun təmsil olunduğu COP16 Bürosunun əsas vəzifələri isə COP qərarlarının həyata keçirilməsinə nəzarətin və gələcək COP iclasları üzrə işlərin təşkilidir. COP Bürosu, həmçinin COP sessiyaları arasında həyata keçirilən öhdəliklərin icrasına nəzarət edir.

Bakı Çağırışı sülhməramlı iqlim fəaliyyətini təşviq edir

Qlobal su qıtlığı, ərzaq məhsullarının çatışmazlığı, torpaqların deqradasiyası və digər problemlər Azərbaycan üçün də olduqca həssas mövzudur və ölkəmiz bu istiqamətdə bir neçə ildir ki, qlobal koalisiya ilə fəal çalışır. COP29 sammitində ölkəmiz səhralaşma və su qıtlığının qarşısının alınması istiqamətində öz prinsipial qərarları ilə bir daha dünya ölkələrinin diqqətini çəkdi. Noyabrın 15-də COP29 çərçivəsində iqlim dəyişməsi, münaqişə və humanitar ehtiyaclar kimi aktual problemlərin həllinə yönəlmiş mühüm təşəbbüs - Sülh, Yardım və Bərpa üçün İqlim Fəaliyyətinə dair Bakı Çağırışına (BCCAP) start verildi. Bu, iqlim təsirlərinə və münaqişələrə həssas olan ölkələrə, xüsusən də humanitar ehtiyacları olanlara dəstəyin artırılmasına yönəlmiş strategiyanı formalaşdırmaq üçün yeni platformanın təməlinin qoyulması demək idi. Dünya miqyasında şimal və cənub ölkələrinin nazir və hökumət nümayəndələrini bir araya gətirən Bakı Çağırışı iqlim və sülh təşəbbüsləri əsasında konkret, həll yönümlü cavabların işlənib hazırlanması üçün yol xəritəsini də müəyyən etdi. Həmin platforma çərçivəsində Bakı İqlim və Sülh Fəaliyyəti Mərkəzi təsis edildi ki, bu da məhz COP29-un yeni uğuru oldu.

Beləliklə, sülhməramlı iqlim fəaliyyətini təşviq edən Azərbaycan COP16 ailəsi üçün həm də yeni fəaliyyət mexanzimlərinin əsaslarını yaradıb. Qeyd edək ki, ötən gün Ər-Riyadda keçirilən COP16 çərçivəsində görüşdə ölkəmizin ekoloji təşəbbüskarlığı bir daha yüksək qiymətləndirilib. COP29-un prezidenti Muxtar Babayevin ötən gün Səudiyyə Ərəbistanının xarici işlər naziri və iqlim üzrə elçisi Adel Əl-Cubeyr ilə görüşündə Azərbaycanın COP16-nın Büro üzvü və Regional Qrup rəhbəri kimi qlobal iqlim dəyişikliyinə davamlılıq sahəsində yeni uğurlara imza atacağına inam ifadə olunub. Bu, Azərbaycanın regional sədr ölkə kimi qlobal birlik və əməkdaşlıq ruhunu daha da möhkəmləndirəcəyindən xəbər verir.

ELBRUS

Paylaş:

Baxılıb: 606 dəfə