6 milyon 422 minə yaxın seçici...

Bakı:

19 °C

50 %

2 m/s

Əlaqə

AZ RU EN

Ana səhifə / Siyasət / 6 milyon 422 minə yaxın seçici...

6 milyon 422 minə yaxın seçici...

29.08.2024 [09:50]

MSK parlament seçkilərinə tam hazırdır

Məlum olduğu kimi, sentyabrın 1-də ölkəmizdə növbədənkənar parlament seçkiləri keçiriləcək. Seçkilərlə əlaqədar bülletenlərin dairə seçki komissiyalarına paylanılması avqustun 26-da başa çatdı. Mərkəzi Seçki Komissiyasından (MSK) bildirilib ki, seçki bülletenləri səsvermə gününə azı 3 gün qalmışadək dairə seçki komissiyalarından məntəqə seçki komissiyalarına təhvil veriləcək.

MSK sədri Məzahir Pənahov növbədənkənar parlament seçkilərinə hazırlıq prosesi, deputatlığa namizədlərin və seçicilərin son sayı ilə bağlı Real TV-nin suallarını cavablandırıb. O, qeyd edib ki, MSK növbədənkənar parlament seçkilərinə tam hazırdır: “Fəaliyyətimiz şəffaf keçir, müxtəlif media qurumları da MSK-nın gördüyü işləri davamlı olaraq ictimaiyyətə çatdırır.

Azərbaycanda seçki komissiyaları fəaliyyət göstərmək üçün müvafiq binalarla təmin olunub. Bu baxımdan ölkəmizdə MSK da daxil olmaqla dairə seçki komissiyaları üçün nümunəvi binalar tikildi. Məsələn, 125 dairənin yarıdan çoxu, təxminən 70 faizininin binaları yeni tikilib. Bəziləri isə əvvəllər mövcud olan binalar idi. Bu il həmin binalar ölkə başçsının müvafiq tapşırğına əsasən yeniləndi. Bölgələrimizin əksəriyyətində 15 ildən çoxdur ki, ciddi işlər aparılır, kəndlərdə və qəsəbələrdə də seçki təyinatlı binalar tikilir”.

M.Pənahov növbədənkənar parlament seçkilərində namizədlərin və seçicilərin sayını da açıqlayıb: “125 dairə üzrə 991 namizədin adı bülletenə daxil edilmişdi. Deputatlığa namizədlərdən biri 3 gün öncə bədbəxt hadisə nəticəsində dünyasını dəyişib. Ona görə də 990 namizəd var. 125 dairə üzrə siyahıya alınmış seçicilərimizin sayı isə 6 milyon 421 min 960 nəfərdir. Yəni, 6 milyon 422 minə yaxın seçici var. Bu seçicilər, ümumilikdə, 6478 məntəqədə səs verəcəklər. Onlardan 6343-ü daimi fəaliyyət göstərən məntəqədir, müvəqqəti məntəqələrimizin sayı isə 135-dir. Belə məntəqələr hərbi hissələr, sərhəd qoşunları və müvəqqəti təcridxanalarda olan seçicilərimizin səs verməsi üçündür. Müvəqqəti məntəqələrmizin də hər biri səsverməyə hazırdır”.

Azad edilmiş rayonlarda seçicilərin sayı...

MSK sədri bildirib ki, azad edilmiş ərazilərimizdə 54 məntəqə fəaliyyət göstərəcək: “Həmin məntəqələrin sayı “Böyük Qayıdış” planına əsasən müəyyən edilib. Prosesi elə təşkil etmişik ki, azad edilən bölgələrimizə qayıdan seçicilərin hamısı rahat səs verə bilsinlər. 42 min 200-ə yaxın seçicinin səs vermə hüququ var. Məntəqələrdən 34-ü daimi, 20-i isə müvəqqəti fəaliyyət göstərir”.

1000 məntəqədə veb kamera quraşdırılıb

M.Pənahov seçkilərdə şəffaflığın yüksək təmin edilməsindən də danışıb. O, qeyd edib ki, 1000 məntəqədə veb kameralar quraşdırılıb: “Veb kamerların quraşdırılması da artıq başa çatıb. Seçilən 1000 məntəqələrin hər birində Azərbaycan ərazisi tam əhatə olunub. Yeri gəlmişkən, bəzi seçicilərimizin şəxsiyyət vəsiqələrinin müddəti başa çatıb. Amma vətəndaşlar bundan narahat olmasınlar. Müddəti başa çatmış şəxsiyyət vəsiqələri ilə bağlı bütün məntəqələrə göstərişlər verilib ki, vətəndaşlar tam sərbəst səs verə bilsinlər”.

Yeganə BAYRAMOVA

Paylaş:

Baxılıb: 480 dəfə