Sarkisyanın bəyanatı onun nə dərəcədə məsuliyyətsiz tərəfdaş olduğunu sübut edir

Bakı:

15 °C

63 %

5 m/s

Əlaqə

AZ RU EN

Ana səhifə / Müsahibə / Sarkisyanın bəyanatı onun nə dərəcədə məsuliyyətsiz tərəfdaş olduğunu sübut edir

Sarkisyanın bəyanatı onun nə dərəcədə məsuliyyətsiz tərəfdaş olduğunu sübut edir

29.07.2011 [10:35]

Elnur Aslanov: Beynəlxalq birlik bunu adekvat qiymətləndirməli və Ermənistanı sülhə məcbur etməlidir
Prezident Administrasiyasının (PA) Siyasi təhlil və informasiya təminatı şöbəsinin müdiri Elnur Aslanovun Gün.Az-a müsahibəsi:
- Elnur müəllim, Ermənistan prezidenti Serj Sarkisyanın məlum bəyanatında qeyd olunur ki, ermənilərin hazırkı nəsli Qarabağı azad edib. Bəyanatın bu hissəsi indiki reallıqda ümumilikdə Ermənistanla danışıqları mənasız edirmi?
- Ermənistan prezidenti Serj Sarkisyanın mənasız bəyanatları, əlbəttə, hamıda təəccüb doğurur. Ona görə ki, bu rəsmi dövlət siyasətinin rasionallığı baxımından müəyyən suallar meydana çıxarır. Eyni zamanda, belə bəyanatlar daha çox daxili siyasi amillərə bağlıdır. Bu, mahiyyət etibarı ilə danışıqlar prosesinə xələl gətirir və Ermənistanın qeyri-konstruktiv mövqeyini ortaya qoyur. Bu bəyanat bir daha göstərir ki, Ermənistan dünya ictimaiyyətini yanlış məlumatlandırmaq istəyir.
Dağlıq Qarabağ “azad edilib” ifadəsinin öz-özlüyündə səsləndirilməsində əsas məqsəd müharibənin təbiətinin yanlış anlamda interpretasiyasını təmin etməkdir. Tarixən Azərbaycan ərazisi olan Dağlıq Qarabağ Ermənistan tərəfindən işğal edilib.
Bu işğal faktı bütün beynəlxalq təşkilatlar tərəfindən tanınıb. Ermənistanın bu müharibədə tərəf kimi iştirak etməsi onun beynəlxalq məsuliyyətini önə çəkir. Beynəlxalq hüququn prinsip və normalarını kobud şəkildə pozan Ermənistan qeyri-qanuni gücdən istifadə nəticəsində yaradılmış vəziyyəti fərqli prizmadan təqdim etməklə öz cinayətini ört-basdır etmək istəyir. Serj Sarkisyan özü isə Xocalı soyqırımının törədilməsində birbaşa iştirak etmiş şəxsdir.
Digər tərəfdən, Sarkisyan Dağlıq Qarabağ müharibəsini “milli azadlıq müharibəsi” kimi dəyərləndirməyə çalışır. O, bununla Dağlıq Qarabağda güc vasitəsilə yaradılmış vəziyyəti leqallaşdırmağa və Dağlıq Qarabağ ermənilərinin xalqların öz müqəddəratını təyinetmə hüququna uyğun olaraq hərbi gücdən istifadə edərək müstəqil dövlətə çevrilməsini sübut etmək istəyir.
Bu, əlbəttə, absurd bir ideyadır. Beynəlxalq hüquq belə bir norma tanımır və aparılan müzakirə və debatlar bir daha göstərir ki, xalqların öz müqəddəratını təyinetmə hüququ ərazi bütövlüyü prinsipinə zidd ola bilməz. BMT Xartiyasında, Siyasi və mülki hüquqlar paktında, xüsusilə 1975-ci ildə uzun danışıqlardan sonra qəbul edilmiş Helsinki Yekun Aktının dekaloqunun 8-ci prinsipində “xalqların hüquqlarının bərabərliyi və xalqların öz müqəddəratını təyinetmə hüququ” təsbit edilib.
Müxtəlif sənədlərdə və müxtəlif kontekstlərdə nəzərdə tutulan bu prinsip beynəlxalq birlik tərəfindən birmənalı şəkildə qəbul edilməyib.
Ermənilərin Dağlıq Qarabağda etnik təmizləmə siyasəti həyata keçirməzdən əvvəl regionun azərbaycanlı və erməni icması birgə yaşamışlar. Hər iki icma Dağlıq Qarabağı təmsil edir. Xalqdan söhbət gedə bilməz. Xalq anlayışının hüquqi tərifinin olmamasına baxmayaraq, beynəlxalq strukturlar onu millət anlamında nəzərdən keçirirlər.
Ermənilər xalq kimi öz müqəddəratını Ermənistan Respublikasında təyin ediblər. Belə bir hüquq milli azlıqlara, o cümlədən Dağlıq Qarabağ milli azlığına şamil edilmir. Serj Sarkisyan bu məsələni dərindən düşünməli və bilməlidir ki, saxta məlumatlarla beynəlxalq ictimai fikri formalaşdırmaq artıq mümkün deyil. Serj Sarkisyanın bəyanatı sadəcə onun nə dərəcədə məsuliyyətsiz tərəfdaş olduğunu sübut edir. Beynəlxalq birlik bunu adekvat qiymətləndirməli və Ermənistanı sülhə məcbur etməlidir.
- ümumiyyətlə, qardaş Türkiyəyə qarşı da ərazi iddiası irəli sürülən bu bəyanat barədə daha nə deyərdiniz?
- Ermənistan hələ də Türkiyəyə qarşı ərazi iddiasındadır. Sırf hüquqi baxımdan əsassız olan bu iddialar, əlbəttə, dövlətlərarası münasibətlərin korlanmasına, regional əməkdaşlığın və inteqrasiyanın təşəkkülünə zərbə vurmuş olur. Serj Sarkisyanın bəyanatında “Qərbi Ermənistanın azad edilməsi növbəti nəslin işidir” deməsi Ermənistan rəhbərliyinin tarixi düşmənçilik niyyətindən xəbər verir və əməkdaşlığı qeyri-mümkün edir.
Bu bir daha göstərir ki, Ermənistan Türkiyə ilə münasibətlərin normallaşmasında maraqlı deyil. Halbuki, Türkiyə məlum şərtlər daxilində Ermənistanla münasibətlərin normallaşmasına tərəfdar olduğunu dəfələrlə bəyan edib. Sürix protokollarının imzalanmasından sonra keçən bu iki ildə baş verən proseslər bunu bir daha sübut edir.
Lakin Ermənistan heç bir güzəştə getmədən öz məqsədlərinə nail olmaq istəyir. Azərbaycan ərazilərini işğal altında saxlayaraq, sərhədlərin açılmasına nail olmaq istəyir. Bu, qeyri-ciddi yanaşmadır. Regional əməkdaşlıq, tərəqqi, inkişaf o zaman mümkün olur ki, dövlətlər mövcud problemləri qarşılıqlı anlaşma və kompromis şəraitində həll edir və gələcək naminə ümumi səyləri birləşdirir.
Bu baxımdan, Ermənistan rəhbərliyi dərk etməlidir ki, Ermənistanın gələcəyi regional izolyasiyada deyil, regional əməkdaşlıqdadır. Bunun üçün isə Azərbaycan ərazilərindən öz qoşunlarını geri çəkməli, Türkiyəyə qarşı əsassız ərazi iddialarına son qoymalıdır.

Paylaş:

Baxılıb: 1163 dəfə