Ermənistan tərəfi gec-tez konstruktiv mövqe tutmağa məcbur olacaq

Bakı:

21 °C

64 %

8 m/s

Əlaqə

AZ RU EN

Ana səhifə / Müsahibə / Ermənistan tərəfi gec-tez konstruktiv mövqe tutmağa məcbur olacaq

Ermənistan tərəfi gec-tez konstruktiv mövqe tutmağa məcbur olacaq

16.07.2010 [08:49]

Novruz Məmmədov: Rəsmi İrəvan Dağlıq Qarabağ münaqişəsinin həlli istiqamətində addım atmalıdır. Mən düşünürəm ki, son vaxtlar Ermənistan tərəfi güclü təzyiq altındadır
Azərbaycan Prezidenti Administrasiyasının Xarici əlaqələr şöbəsinin müdiri Novruz Məmmədovun Trend-ə müsahibəsi:
- Bu həftə Almatıda Azərbaycanla Ermənistan arasında danışıqların növbəti mərhələsinin keçiriləcəyi gözlənilir. Həmsədr ölkələrin prezidentlərinin son bəyanatı fonunda qarşıdakı danışıqlarda Ermənistandan konstruktiv mövqe tutacağını gözləmək olarmı?
- Mövqeləri nəzərə alsaq, son dövrlərdə, xüsusilə, lap bu yaxınlarda Amerika Birləşmiş Ştatları, Rusiya Federasiyası və Fransa prezidentlərinin Kanadanın Toronto şəhərində verdiyi bəyanatı onların ümumi mövqeyi kimi qəbul etməliyik. Düşünürəm ki, bunun fonunda son zamanlar intesivləşən proseslərdə, eyni zamanda, Ermənistan tərəfinə çox ciddi bir mesajdır, siqnaldır, yəni müraciətdə açıq-aydın birinci Ermənistan göstərilirdi. Bilmirəm, tərcümələrdə yox, ancaq orijinal mətndə belədir ki, bu məsələ ilə, yəni Ermənistan-Azərbaycan, Dağlıq Qarabağ münaqişəsinin həlli ilə bağlı ciddi addım atılmalıdır. Ortada Madrid prinsipləri ilə bağlı təkliflər varsa, bununla bağlı Azərbaycan tərəfi də öz mövqeyini bildiribdir, Ermənistan tərəfi bildirməyibsə, deməli bütün bu çağırış, bu bəyanat, bütün bu mesajların hamısı Ermənistan tərəfinə aiddir. Ona görə də düşünürəm ki, Ermənistan rəhbərliyi bunu qəbul etməlidir və bu isə imkan verir ki, biz bir qədər ümidvar olaq ki, Ermənistan gec-tez bunu bir təzyiq kimi öz üzərində hiss edəcəkdir, eyni zamanda, konstruktiv mövqe tutmağa məcbur olacaqdır.
- Həmsədr ölkələr tərəfindən Ermənistana təzyiqin göstərilməsi imkanlarını necə dəyərləndirirsiniz?
- Belə bir bəyanatın verilməsi də bir təzyiqin göstərilməsi deməkdir. Sərhədlərin açılmaması təzyiqin göstərilməsi deməkdir. Azərbaycan Prezidentinin məsələ ilə bağlı Azərbaycanın ədalətli mövqeyini, ərazi bütövlüyü çərçivəsində, beynəlxalq hüquq çərçivəsində mövqeyini ortaya qoyması və Azərbaycanın bununla paralel olaraq ordusunun güclənməsi, inkişafının sürətli artımı Ermənistan tərəfinə təzyiq deməkdir. Beynəlxalq aləmdə, beynəlxalq münasibətlərdə təzyiqi bu cür başa düşmək lazımdır. Əlbəttə, başqa formaları da yavaş-yavaş ortalığa çıxacaq. Düşünürəm ki, ümumiyyətlə, Ermənistan rəhbərləri ilə görüşlərdə indi artıq beynəlxalq birliyin bütün üzvləri Ermənistana bununla bağlı öz mövqeyini bildirir. Bir qədər əvvəl ermənilər qondarma Dağlıq Qarabağ qurumunda “seçki” təşkil etmişdilər. Bütün beynəlxalq təşkilatlar və ölkələr bildirdi ki, onlar bu “seçki”nin nəticələrini tanımırlar, Dağlıq Qarabağı Azərbaycanın ərazisində görürlər və Azərbaycanın ərazi bütövlüyünü tanıyırlar. Bunun özü bir təzyiqdir. ATƏT-in Parlament Assambleyasının keçmiş prezidenti, təəssüf olsun ki, o prezident vəzifədə olan zaman yox, işdən çıxandan sonra dedi ki, bəs bu məsələdə Ermənistan tərəfi məsuliyyət daşıyır. Yəni Ermənistan tərəfi Dağlıq Qarabağ münaqişəsinin həlli istiqamətində addım atmalıdır. Mən düşünürəm ki, son vaxtlar Ermənistan tərəfi güclü təzyiq altındadır.
- Novruz müəllim, son vaxtlar Kəlbəcər və Laçının qaytarılması məsələsi gündəmdədir. Xarici işlər naziri Elmar Məmmədyarov bu rayonların 5 il müddətinə qaytarılması barədə Azərbaycanın razılıq verdiyini bildirib. Bunu Ermənistan tərəfinə güzəştlərin son limiti kimi qiymətləndirmək olarmı?
- Artıq müəyyən mənada Madrid təklifləri çərçivəsində məsələlər qoyulub və razılıq alınıb. İndi onun müəyyən detalları ilə bağlı söhbət gedə bilər, şübhəsiz ki, bütün bu maraqlı məsələlər ətrafında müzakirələr aparılacaq. Əsas məsələ bu gün Madrid təkliflərinə Ermənistanın mövqeyindən ibarətdir. Mən düşünürəm ki, əsas məsələ bundan ibarət olacaq. Yəni Qazaxıstanda da görüş olarsa, ATƏT-in müəyyən mənada nəzarəti, himayəsi altında onlar baza prinsiplərinə mövqelərini bildirməlidirlər. Eyni zamanda, başqa məsələlər ətrafında da fikir mübadiləsi, müzakirələr aparıla bilər. Burada qeyri-adi bir şey yoxdur. çünki münaqişənin həlli prosesi müzakirənin bir nəticəsi kimi olmalıdır.

Paylaş:

Baxılıb: 1203 dəfə