Cəlil Məmmədquluzadə nəslinin davamçıları ilk dəfə Azərbaycana gəliblər

Bakı:

25 °C

51 %

4 m/s

Əlaqə

AZ RU EN

Ana səhifə / Mədəniyyət / Cəlil Məmmədquluzadə nəslinin davamçıları ilk dəfə Azərbaycana gəliblər

Cəlil Məmmədquluzadə nəslinin davamçıları ilk dəfə Azərbaycana gəliblər

19.11.2019 [10:10]

Martin Cavanşiri: Fəxr edirəm ki, mənim ulu babam Cəlil Məmmədquluzadədir
Görkəmli yazıçı-dramaturq, publisist, ictimai xadim Cəlil Məmmədquluzadənin nəticəsi Martin Cavanşiri və onun oğlu Pşemislav Cavanşiri Azərbaycana gəliblər. Cəlil Məmmədquluzadə nəslinin davamçıları ilk dəfədir doğma vətəndədirlər. Məlumat üçün bildirək ki, onları Bakıya AMEA-nın vitse-prezidenti, akademik İsa Həbibbəyli dəvət edib. Polşadan gəlmiş qonaqlar Şəhidlər xiyabanını ziyarət edib, Nizami Gəncəvi adına Ədəbiyyat Muzeyində və İçərişəhərdə olublar. Qonaqlar Azərbaycanın bir qrup ziyalısı ilə birlikdə dünən dahi yazıçının Fəxri xiyabandakı məzarını ziyarət ediblər, eyni zamanda, ədibin ev-muzeyinin təmirdən və yeni tərtibatdan sonrakı açılış mərasimində olublar.
Səfər çərçivəsində qəzetimizə açıqlama verən Cəlil Məmmədquluzadənin nəticəsi Martin Cavanşiri ulu babasına göstərilən bu diqqətə görə Azərbaycan xalqına və dövlət başçısına öz təşəkkürünü bildirib: “Ulu babam Cəlil Məmmədquluzadənin 150 illik yubileyi münasibətilə Bakıya gəlmişəm. İlk dəfədir ki, Azərbaycana səfər edirəm. Burada olduğum üçün çox sevincliyəm. Azərbaycan xalqının qonaqpərvərliyinin və səmimiliyinin şahidi oldum. Burada olduğum iki gün ərzində ulu babam haqqında çox zəngin informasiyalar əldə etdim. Bildiyiniz kimi, bu gün ulu babamın məzarını ziyarət etdik və ev muzeyinin təmirdən sonra açılışında olduq. Mən təsəvvür etməzdim ki, ona Azərbaycanda bu qədər sevgi var. Azərbaycan xalqı, mədəniyyəti üçün nə qədər önəmli insan olduğunu öyrəndim. Ulu babam haqqında bir çox məlumatlar əldə etdim. Fəxr edirəm ki, ulu babam Azərbaycan xalqının bu qədər sevgisini qazanıb. C.Məmmədquluzadəyə ehtiramla yanaşdıqları üçün Azərbaycan xalqına və dövlət başçısına minnətdarlığımı bildirirəm”.
“Əfsuslar olsun ki, ulu babamın anadan olduğu ölkədən uzaq düşdüm. Ümid edirəm ki, bu səfərlər davamlı olacaq. Bundan sonra sizin, həmçinin də mənim ölkəm olan Azərbaycan haqqında daha dərindən öyrənməyə çalışacağam. Oğlum da mənimlə birlikdə gəlib. Ümid edirəm ki, oğlumun daha çox vaxtı olacaq ki, mən əldə etmədiyim məlumatları o əldə etsin”, -deyə M.Cavanşiri əlavə edib.
Həmsöhbətimiz həmçinin hava limanında qarşılaşdığı maraqlı məqamı da oxucularımızın diqqətinə çatdırıb: “Polşadan Azərbaycana gəlmək üçün viza aldım. Hava limanının əməkdaşları pasportuma baxan kimi soyadımdan dərhal bildilər ki, mən Cəlil Məmmədquluzadənin nəticəsiyəm. Mən fəxr edirəm ki, mənim ulu babam Cəlil Məmmədquluzadədir”.
Xatırladaq ki, 2019-cu il yanvarın 17-də Prezident İlham Əliyev Cəlil Məmmədquluzadənin 150 illiyinin qeyd olunması ilə bağlı Sərəncam imzalayıb.
Müşfiqə BAYRAMLI

Paylaş:

Baxılıb: 1086 dəfə