Heydər Əliyev Mərkəzində məşhur belçikalı rəssam Vim Delvuanın fərdi sərgisi açılacaq

Bakı:

11 °C

82 %

7 m/s

Əlaqə

AZ RU EN

Ana səhifə / Mədəniyyət / Heydər Əliyev Mərkəzində məşhur belçikalı rəssam Vim Delvuanın fərdi sərgisi açılacaq

Heydər Əliyev Mərkəzində məşhur belçikalı rəssam Vim Delvuanın fərdi sərgisi açılacaq

10.04.2015 [10:01]

Aprelin 13-də Heydər Əliyev Mərkəzində məşhur belçikalı rəssam, müasir incəsənətin tanınmış simalarından olan Vim Delvuanın fərdi sərgisinin açılış mərasimi keçiriləcək.
AZƏRTAC xəbər verir ki, sentyabrın 27-dək davam edəcək sərgidə müəllifin 50-dək əsəri təqdim olunacaq.
Açılış mərasimi ərəfəsində Vim Delvuanın əsərlərinin reproduksiyasını əhatə edən kataloq nəşr olunub. Nəşrə ön sözü Heydər Əliyev Fondunun vitse-prezidenti Leyla Əliyeva yazıb. “Müasir incəsənət sərgiləri bu gün cəmiyyətin mədəni həyatında maraqlı mövzulardan biri kimi yer alır. İnsanların müasir incəsənətə olan marağının artmasına baxmayaraq, bəzən yeni ideya axtarışları, əsərin yaradılmasında orijinal yanaşma, özünəməxsus tərz formalaşdırmaq istəyi ilə fərqlənən yaradıcı insanların fəaliyyəti ictimaiyyət tərəfindən birmənalı qəbul edilmir. Belə rəssamlardan biri, ətrafında baş verənlərə istehzalı münasibəti ilə tanınan, yaradıcılığı məna cəsarəti ilə seçilən, müasir incəsənətin ən xarizmatik nümayəndələrindən biri olan Vim Delvuadır”, - deyə Leyla Əliyeva qeyd edib.
Leyla Əliyeva bildirib ki, incəsənət vurğunlarına müxtəlif ölkələrin mədəni həyatının ən parlaq hadisələrini görməyə şərait yaradan Heydər Əliyev Mərkəzində ziddiyyətli, bəzən hətta qalmaqallı yaradıcılığı ilə şöhrət qazanmış Vim Delvuanın əsərlərinin sərgisinin keçirilməsi tamaşaçılara dövrümüzün ən tanınmış neokonseptualistinin əsərləri ilə yaxından tanış olmağa əvəzsiz şans verir. “Siz bədii dilin müxtəlifliyi və özünəməxsus kompozisiyası ilə səciyyələnən valehedici sənət nümunələrinin əhatəsində olacaqsınız. Əminəm ki, Vim Delvua yaradıcılığının heyranedici mühiti hər birinizin yaddaşına unudulmaz təəssüratlarla həkk olunacaqdır”, - deyə Leyla Əliyeva qeyd edib.
Vim Delvua 1965-ci ildə Belçikada anadan olub, Gent şəhərində Kral İncəsənət Akademiyasını bitirib. O, 1985-ci ildən Avropanın sənət ənənələrini müasir kütləvi mədəniyyət kontekstində təqdim edərək özünəməxsus əsərlər yaradır. Rəssamın psevdoqotik üslubda yaratdığı heykəllər - naxış və ornamentlərin müasir süjetlərlə birləşdiyi əsərlər ona şöhrət qazandırıb. V.Delvua əsərlərində müxtəlif kontekstli elementləri birləşdirir, bununla da əşyalar öz məlum xarakterlərini itirir, yeni məna və məzmun alır.
Vim Delvuanın indiyə qədər Luvr Muzeyində, Parisin Jorj Pompidu adına Milli Mədəniyyət və İncəsənət Muzeyində, Nyu-York Yeni Muzeyində, Lion Müasir İncəsənət Muzeyində, Venesiyanın Peqqi Quqqenhaym Muzeyində fərdi sərgiləri açılıb. O, 1990-cı ildə Venesiya Biennalesinin, 1992-ci ildə isə Almaniyanın Kassel şəhərində keçirilmiş “Documenta IX” sərgisinin iştirakçısı olub.

Paylaş:

Baxılıb: 1129 dəfə