Faydası çox, zərəri...

Bakı:

23 °C

76 %

15 m/s

Əlaqə

AZ RU EN

Ana səhifə / Maraqlı / Faydası çox, zərəri...

Faydası çox, zərəri...

22.10.2024 [08:43]

Limon nəyə və niyə xeyirlidir?

Limon sitrus meyvələri arasında unikallığı ilə seçilir. Bu sitrus meyvəsi soyuqdəymə xəstəliklərinə qarşı əla profilaktiki vasitə sayılır. İmmuniteti möhkəmləndirir, orqanizmin müqavimətini artırır. Müalicəvi keyfiyyəti onun antiseptik təsirində də özünü biruzə verir. Bir sözlə, bu meyvə insan orqanizmi üçün olduqca faydalı və zəruridir.

C vitamini ilə bol olan meyvə maqnezium və lif cəhətdən zəngindir. Bağırsaqların fəaliyyətini stimullaşdırır, mikroflorasını yaxşılaşdırır. Limon şirəsi yaranı bərpa edən və iltihab əleyhinə təsirə də malikdir, eyni zamanda, mikrobları öldürür.

Matroslara gündə 30 qram...

Limonun vətəni qədim Hindistandır. Əfsanəvi hindli yoqları onu sağlamlığın qorunmasında universal vasitə sayırdılar. Onların dediklərinə görə, hər adam özünü gündə bir limon yeməyə və bir limonun şirəsini içməyə öyrətməlidir. Güman edilir ki, “limon” sözü malay dilində bu meyvəni adlandıran “lerno” sözündən əmələ gəlib. Çində isə bu bitkini “limunq” adlandırırlar və tərcümədə bu “analar üçün xeyirli” deməkdir. XVIII əsrdə ingilis donanmasında uzun səfər zamanı matroslara gündə 30 qram limon şirəsi qəbul etmək məcburi sayılırdı ki, bu da onları sinqa xəstəliyindən qoruyurdu. Keçən əsrdə limonu taun xəstəliyindən qoruyan və ilan zəhəri əleyhinə vasitə hesab edirdilər. Qafqazda belə bir qədim əfsanə var ki, hökmdarın sevimlisi ağılsız hərəkət edərək qəzəbə düçar olur və həbsxanaya düşür. Ona həbsxanada yemək üçün dadına görə yemək seçməyi təklif edirlər. Məhbus limon seçir və hamının təəccübünə səbəb olur. O deyir ki, limonun qoxusu şadlandırır, qabığı və toxumları ürəyə faydalıdır, limonun ləti qidadır, şirəsi isə susuzluğu yatırır.

Limonun tərkibi...

Limonun lətində limon turşusu var ki, bu da meyvənin əsasını təşkil edir. Limonun qabığı isə flavonoidlər, efir yağları, pektin birləşmələri, qida lifləri ilə zəngindir. Təbii ki, bu maddələr əsasən meyvə lətində toplaşır. Limonun tərkibində bir çox vitamin var. Onlar arasında foli və C vitamini, pantoten turşusu, D vitamini, tokoferol, tiamin, retionl, piridoksin, riboflavin, PP vitaminləri xüsusi yer tutur.

İçərisinə duz səpilmiş limon

Mütəxəssislər insanın yatarkən yaxınlığında dörd hissəyə bölünmüş və içərisinə duz səpilmiş limon qoymasının onun sağlamlığı üçün faydalı olduğunu bildirirlər. Belə ki, limon gərginlik vəziyyətində yuxusuzluq problemi yaşayan insanın beynini sakitləşdirir. Psixoloqlar davamlı olaraq yuxusuzluq problemi olan insana özünü həmişə müsbət fikirlərə cəmləşdirməyi məsləhət görürlər. Bu işdə limon qoxusu əvəzsiz rol oynayır.

Ağcaqanadlara qarşı...

Limon həm də ağcaqanadların, böcəklərin sevmədiyi və həmişə ondan uzaq durduğu sitrus meyvəsidir. Limonun daha bir faydalı xüsusiyyəti isə səhər tezdən oyanmaqda çətinlik çəkən insanlara kömək etməsidir. Limon qoxusu beyindəki serotonin səviyyəsini artırır. Ətrafa xoş qoxu verən limon, həmçinin havanı təmizləyir. Hətta otaqdan boya qoxusunu tez çıxarmaq üçün limondan istifadə etmək olar.

Bir sözlə, mütəxəssislər hər bir insana yatarkən yaxınlığında olan stulun üzərinə dörd hissəyə bölünmüş və içərisi duzlanmış limon qoymağı məsləhət görürlər.

Təzyiqi tənzimləyir

Ətri belə insandakı qan təzyiqini azaldan limon iştah açır, həzmi asanlaşdırır. Limon həm də damar sərtliyininin qarşını alır, soyuqdəymə, qrip və öskürək hallarını azaldır, mikrobları öldürür, qida zəhərlənmələri zamanı faydalıdır. Ürək-damar problemləri olan insanlar üçün də faydalı olan limon rahatlaşdırıcı təsiri ilə bədəndəki ağrıları yüngülləşdirir.

Pas ləkələrinin “düşməni”

Limonun digər faydası pas ləkələrini təmizləməyidir. Kimyəvi təmizlik vasitələrinə xeyli pul xərcləmək əvəzinə, problemi adi limonla həll etmək olar. Paslı əşyanı limon suyunda bir qədər saxlamaq, sonra isə təmiz su ilə durulamaq kifayətdir.

Çox qəbul edilərsə...

Limonun çoxaylı faydalarını qeyd etsək ki, bu sitrus meyvəsinin çox qəbul edildiyi halda zərərləri da ola bilər. Belə ki, çiy limonu yemək və şirəsini içmək diş emalını aparır, çürüdür, kariyesi artırır və ağız boşluğunun selikli qişasının zədələnməsinə səbəb olur. Limon turşusu mədə girəcəyindəki əzələni, klapanı zəiflədir, nəticədə mədə turşuluğu geri qayıdır, reflüks yaranır. İnsanın həzm sistemi çox miqdarda limon turşusunu həll etməyə qadir deyil. Ona görə limon turşusu qarında spazm, mədədə yanğı, xora, böyrəklərdə daş, sidikdə pozulma və bağırsaqlarda problem yarada bilir.

Çox limon yemək dəmirin də sovrulmasını gücləndirir, bu zaman hemoromatoz əmələ gəlir, dəmir uyğun olmayan orqanlarda yığlıb qalır. Gündəlik limon norması 2 dilimdən artıq olmamalıdır.

Yeganə BAYRAMOVA

Paylaş:

Baxılıb: 686 dəfə