Azərbaycanın nümunəsi...

Bakı:

13 °C

76 %

3 m/s

Əlaqə

AZ RU EN

Ana səhifə / Maraqlı / Azərbaycanın nümunəsi...

Azərbaycanın nümunəsi...

08.10.2024 [09:55]

Ordumuz Vətən müharibəsində və antiterror tədbirlərində beynəlxalq humanitar hüquqa tam riayət edib

Oktyabrın 7-də Bakıda “Hərbi əməliyyatların idarə olunmasında beynəlxalq qaydalar üzrə yüksək səviyyəli seminar” (SWIRMO) öz işinə başlayıb. Seminar Azərbaycan Müdafiə Nazirliyinin və Beynəlxalq Qızıl Xaç Komitəsinin (BQXK) birgə təşkilatçılığı ilə təşkil olunub. Beynəlxalq Qızıl Xaç Komitəsinin əhəmiyyətli tədbirlərindən biri olan bu seminarda 70-dən çox ölkəni təmsil edən yüksəkrütbəli zabit iştirak edir.

Seminar əsasən müharibə təcrübəsi olan ölkələrdən məhz beynəlxalq humanitar hüququn əsaslarına, norma və prinsiplərinə riayət edən ölkələrin ərazilərində keçirilir. Azərbaycan Ordusunun hərbi qulluqçuları seminarda öz təcrübələrini bölüşürlər. Azərbaycanın Vətən müharibəsi, sonrakı döyüş əməliyyatları, xüsusilə antiterror əməliyyatında beynəlxalq humanitar hüquqa riayət etməsi nümunəvi xarakter daşıyır. 44 günlük müharibədə mülki insanlara dəymiş zərər nisbəti 1960-cı ildən bəri dünya hərb tarixində bir möcüzə hesab olunur. Antiterror əməliyyatında isə mülki tələfat ümumiyyətlə olmayıb. Bütün bunlar Azərbaycanın beynəlxalq humanitar hüquqa ciddi riayət etməsinin bariz nümunəsidir. Elə bu səbəbdən də 17-ci seminarın məhz ölkəmizdə keçirilməsi təsadüfi deyil.

Seminarda müdafiə nazirinin müavini Aqil Qurbanov açılış nitqi ilə çıxış edərək Azərbaycana qarşı törədilən hərbi cinayətlər nəticəsində mülki şəxslərin həlak olmasından danışıb. Nazir müavini çıxışında bildirib ki, Azərbaycan torpaqlarında 30 il ərzində müharibə cinayətləri törədilib, itkin düşən dörd min azərbaycanlı haqqında məlumat verilmir. Bölgədə basdırılan minaların təhdid olduğunu deyən nazir müavini qeyd edib ki, 2020-ci il noyabrın 10-da imzalanmış üçtərəfli Bəyanatdan sonra 379 nəfər mina qurbanı olub.

Beynəlxalq Qızıl Xaç Komitəsinin (Cenevrə) Silahlı və Təhlükəsizlik Qüvvələri ilə əməkdaşlıq departamentinin rəhbəri Pit Evans isə “Silahlılarla dialoqun aparılması” mövzusunda təqdimatında bildirib ki, dünyada 210 milyon insan silahlı qrupların təsiri altında yaşayır. Silahlı münaqişələr zamanı mülki əhali, mülki obyektlər qorunma altındadır, əhaliyə dəyən ziyanın minimuma, sıfra endirilməsi hədəflənib. Lakin təəssüf ki, indiyədək zərəri sıfra endirmək mümkün olmayıb. “Silah daşıyıcıları, hərbçilər, zabitlər, mühafizə qurumları ilə, o cümlədən silahlı münaqişələrin təsirlərinə məruz qalanlarla danışıqlar aparırıq. Biz bütün tərəflərlə ünsiyyət qurmaqla neytrallığı qoruya bilərik”, - deyə P.Evans qeyd edib.

Qeyd edək ki, seminarda BQXK-nın yaranma tarixi və indiki fəaliyyəti, silahlılarla dialoqun aparılması, hərbi əməliyyatlar və hüquq, hüququn inteqrasiyası, beynəlxalq humanitar hüquq və hədəfəalma, Azərbaycan Ordusunda Beynəlxalq Humanitar Hüququn tətbiqi və digər mövzularda çıxışlar olub.

Seminarın keçirilməsində başlıca məqsəd hərbi əməliyyatların idarə olunmasına dair beynəlxalq qaydaların anlaşılmasını dərinləşdirmək, müasir döyüş meydanında beynəlxalq humanitar hüququn tətbiqi ilə bağlı problemləri araşdırmaq, bu hüququ hərbi planlaşdırma, əməliyyatların aparılması və əxlaqi dəyərlərin gücləndirilməsinə inteqrasiya etmək, həmçinin eyni məkanda çalışan hərbçilərlə BQXK arasında qarşılıqlı anlaşmanı inkişaf etdirməkdir.

Seminar oktyabrın 12-dək davam edəcək.

NARDAR

Paylaş:

Baxılıb: 733 dəfə