Gənclər yüksək dövlət qayğısı ilə əhatə olunub

Bakı:

19 °C

82 %

3 m/s

Əlaqə

AZ RU EN

Ana səhifə / MEDİA / Gənclər yüksək dövlət qayğısı ilə əhatə olunub

Gənclər yüksək dövlət qayğısı ilə əhatə olunub

23.02.2024 [10:33]

Gənclər Fondunun Naxçıvan filialı yaradıldı

Gənclər siyasəti müstəqil Azərbaycanın dövlət siyasətinin ən mühüm istiqamətlərindən birini təşkil edir. Gəncliyin inkişafına böyük əhəmiyyət verən dövlətimiz onlara geniş imkanların yaradılmasına, milli şüurun, yüksək vətənpərvərlik ruhunun formalaşdırılmasına xüsusi diqqət yetirir. Görülən effektiv tədbirlərin, göstərilən yüksək səviyyəli diqqət və qayğının nəticəsidir ki, hazırda idarəetmə strukturlarında, o cümlədən, qanunverici orqanda, bələdiyyə qurumlarında çalışan gənc kadrların sayı hiss olunacaq dərəcədə artıb. Habelə, müxtəlif dövlət orqanlarına vakant yerlər üzrə keçirilən müsabiqələrdə

gənclərin irəli çəkilməsi onların dövlət idarəçiliyinə fəal cəlb olunması xüsusilə diqqəti cəlb edir.

Qeyd edildiyi kimi gənc nəslin inkişafı müvafiq qanunverici aktlarla da təmin edilir. Azərbaycan Prezidenti İlham Əliyevin müvafiq sərəncamları ilə 2007-ci ilin “Gənclər ili” elan edilməsi, “Azərbaycan gəncliyi 2011-2015-ci illərdə Dövlət Proqramı”nın təsdiq edilməsi gənclərin ictimai fəaliyyətinin, yaradıcılığının və təşəbbüslərinin dövlət tərəfindən dəstəklənməsinin bariz göstəriciləridir.

Bu kimi, uğurlu və gələcək perspektivə hesablanan addımların nəticəsidir ki özünün inkişaf dövrünü yaşayan Azərbaycan gəncliyi cəmiyyətin ən dinamik təbəqəsi qismində çıxış edir, milli dəyərlərə və maraqlara müvafiq səmərəli fəaliyyət göstərir. Bütün bunlar, eyni zamanda, gənclər təşkilatlarının fəaliyyətinə xüsusi stimul və töhfələr verməkdədir.

Bu baxımdan Azərbaycan Respublikası Prezidenti yanında Gənclər Fondu gənclərin intellektual potensialından istifadə olunması, onların elmi-intellektual və digər sahələrdə fəallığının artırılması baxımından müstəsna əhəmiyyət kəsb edir. Ölkəmizdə yüzlərlə gənc, gənclər təşkilatları müxtəlif ideya və təkliflərlə Fonda müraciət edirlər. Prezident İlham Əliyevin 19 dekabr 2011-ci il tarixli Fərmanı ilə yaradılan Azərbaycan Gənclər Fondu dövlət başçısı tərəfindən təsdiq olunan “Azərbaycan Gəncliyi 2011-2015-ci illərdə Dövlət Proqramı” çərçivəsində və daha sonra gənclərin layiqli və intellektual vətəndaş kimi yetişməsi üçün bir sıra maraqlı layihələrin həyata keçirilməsinə dəstək verir.

Yeri gəlmişkən, gənclərin fəaliyyətinə dair göstərilən dəstəyin əhatə dairəsinin daha da genişləndirilməsi məqsədilə Azərbaycan Respublikası Gənclər Fondunun Müşahidə Şurasının qərarı ilə fondun Naxçıvan filialı yaradılıb.

Məsələ barədə öz fikirlərini bölüşən Yeni Azərbaycan Partiyası Naxçıvan Muxtar Respublika Təşkilatının Gənclər Birliyinin sədri Arzu Qasımov deyib ki, Azərbaycanın dinamik inkişafı, ictimai həyatın bütün sahələrində əldə etdiyi nailiyyətlər dövlət gənclər siyasətində də özünü bariz şəkildə göstərir: “Uğurlu daxili siyasətin ən mühüm istiqamətlərindən biri cəmiyyətin fəal təbəqəsi olan gənclərin yüksək dövlət qayğısı ilə əhatə olunmasıdır. Dövlət başçısı tərəfindən ötən illər ərzində gənclərin hərtərəfli inkişafı ilə əlaqədar bir sıra Dövlət proqramları imzalanıb ki, həmin sənədlərdə də gənclərin cəmiyyət həyatında fəallığının təmin edilməsi yönündə bütün məsələlər əksini tapıb”.

A.Qasımov bildirib ki, gənclərlə iş sahəsində atılan daha bir addım Azərbaycan Respublikasının Gənclər Fondunun Naxçıvan filialının yaradılmasıdır. “Bu, Naxçıvanda yaşayan gənclər üçün böyük imkandır, gəncləri yüksək perspektivlər gözləyir. Əminəm ki, Azərbaycan Respublikasının Gənclər Fondunun Naxçıvan filialının yaradılması muxtar respublikada gənclər sektorunun inkişafına yeni təkan verəcək. Filial gənclər siyasətinin daha səmərəli həyata keçirilməsinə nail olmaq, cəmiyyətin bütün sahələrində gənclərin fəal iştirakına şərait yaratmaq, onların yaradıcı və innovativ potensialının üzə çıxarılmasını dəstəkləmək, gənclərin sağlamlığını qorumaq, təhsil və məşğulluq məsələlərinə diqqəti artırmaq, könüllülük hərəkatının daha da inkişaf etdirilməsi baxımından çox əhəmiyyətlidir. Gənclər siyasətindəki yeni çağırış və hədəflər də nəzərə alınaraq qeyd etmək olar ki, bundan sonra dövlət və yerli özünüidarəetmə orqanlarının işində gənclərin daha fəal iştirakı təmin olunacaq, beynəlxalq tədbirlərdə iştirakına yol açılacaq, gəncləri əhatə edən qeyri-hökumət təşkilatlarının sayı artacaq, onlar ölkədə gedən bütün proseslərin mərkəzində olmaqla böyük inkişaf yoluna qədəm qoyacaqlar. Gənclər Fondunun filialı ilk dəfə Naxçıvanda yaradılıb və inanıram ki, böyük perspektiv mənbəyinə çevriləcək və gələcəkdə yarana biləcək filiallar üçün baza, nümunə rolunu yerinə yetirəcək”, - deyə o fikirlərini yekunlaşdırıb.

Günel ABBAS

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Gənc nəslin milli mənlik şüurunun inkişaf etdirilməsi və vətənpərvərlik hisslərinin tərbiyəsi” istiqaməti üzrə hazırlanmışdır

Paylaş:

Baxılıb: 763 dəfə