İqtisadiyyatın əsas prinsiplərindən biri

Bakı:

15 °C

77 %

10 m/s

Əlaqə

AZ RU EN

Ana səhifə / MEDİA / İqtisadiyyatın əsas prinsiplərindən biri - sahibkarlıq

İqtisadiyyatın əsas prinsiplərindən biri - sahibkarlıq

29.12.2023 [11:21]

Azad sahibkarlığın və liberal iqtisadiyyatın təşviqi ilə bağlı ölkəmizdə mühüm proqramlar həyata keçirilir. Bəllidir ki, sahibkarlıq fəaliyyəti iqtisadiyyatın əsas prinsiplərindən birini təşkil edir. Bu gün azad olunmuş ərazilərimizdə azad sahibkarlıq fəaliyyətinin həyata keçirilməsi üçün mühüm layihələr icra olunmaqdadır. İşğaldan azad olunmuş ərazilərdə yaşayan vətəndaşlarımızın sahibkarlıq fəaliyyəti üçün müəyyən zərurət yaranıb.

Qeyd edək ki, həmin ərazilərdə ticarət, ictimai iaşə, məişət xidməti və digər istiqamətlərdə bəzi müəssisə və obyektlərin fəaliyyətinin bərpası planlaşdırılır. Bu məqsədlə kiçik, orta və iri sahibkarlıq subyektlərinə aid olan sahibkarlara və hüquqi şəxslərə əməkdaşlıq təklif edilir. Bu barədə Dövlət Vergi Xidmətindən məlumat verilib.

Yanvarın 1-dən 10 il müddətinə...

Bildirilib ki, işğaldan azad edilmiş ərazinin rezidentləri 2023-cü il yanvarın 1-dən etibarən 10 il müddətində mənfəət, əmlak, torpaq və sadələşdirilmiş vergidən azaddırlar. Həmin ərazilərdə vergi uçotuna alınan və bu fəaliyyəti göstərən vergiödəyicilərinə istehsal, o cümlədən emal və hasilat fəaliyyəti sahəsi üzrə vergi azadolması tətbiq edilir. Bu vergi azadolması istehsal, o cümlədən emal və ya hasil edilərək işğaldan azad edilmiş ərazi daxilində və ölkəmizdən ixrac edilən mallara görə əldə olunan gəlirlərə şamil edilir.

Həmçinin qeyd olunub ki, fiziki şəxs olan istehlakçılar tərəfindən işğaldan azad edilmiş ərazilər daxilində yerləşmə vasitələri hesab edilən mehmanxanalar tərəfindən göstərilən gecələmə və qalma xidmətlərinə görə nağdsız qaydada ödənilən ƏDV-nin 30 faizi, nağd qaydada ödənilən ƏDV-nin 5 faizi geri qaytarılır.

Sahibkarlara güzəştli kreditlər veriləcək

Sahibkarlıq subyektləri tərəfindən işğaldan azad edilən ərazilərdə xidmət, logistika, istehsal sahələri üzrə fəaliyyət göstərməklə bağlı Sahibkarlığın İnkişafı Fonduna müraciətlər daxil olmaqda davam edir. Fond həm dövlət zəmanətli kredit, həm güzəştli kredit istiqamətində bu sahibkarlarlıq subyektlərinə dəstək göstərir. Eləcə də işğaldan azad olunan ərazilərlə bağlı Fond tərəfindən əlavə maliyyələşmə mexanizmləri üzrə təhlillər aparılır. Bir sözlə, bütün bu sadalananlar Azərbaycanda azad sahibkarlığın və liberal iqtisadiyyatın inkişafının diqqət mərkəzində olduğunu bir daha təsdiqləyir.

2023-cü ilin ötən aylarında Sahibkarlığın İnkişafı Fondu tərəfindən azad olunmuş ərazilərdə çalışan sahibkarların, illik 5 faizədək olmaqla, 1-10 milyon manat arasında güzəştli kreditlərlə çıxışı da təmin edilib. Bu dövr ərzində bir neçə sahibkarın 4 layihəsinə 6 milyon manatadək güzəştli kredit verilib. Kreditlər əsasən yeni istehsal, emal müəssisələrinin yaradılması, eləcə də mövcud müəssisələrin genişləndirilməsi və modernləşdirilməsinə yönəldilir. İşğaldan azad olunmuş ərazilərə indiyədək verilən kreditlər də daha çox sənaye məhsullarının istehsalı və emalı, eyni zamanda, kənd təsərrüfatı məhsullarının istehsalı sahələrinin payına düşür. Yaxın vaxtlarda isə bu ərazilərdə çalışan sahibkarlara daha geniş və əhatəli kredit xətti istifadəyə veriləcək. Biznesin İnkişafı Fondu tərəfindən dövlət zəmanəti ilə təmin ediləcək həmin kreditlərin verilməsi qaydaları müəyyənləşib.

Qaydalara əsasən, sahibkarların əldə edəcəkləri biznes kreditlərinin 90 faizədək hissəsinə dövlət zəmanəti veriləcək və həmin kreditlərin 10 faizi 36 ay müddətinə subsidiyalaşdırılacaq. Məlumdur ki, sahibkarların kredit əldə edən zaman qarşılaşdıqları ən böyük çətinliklərdən biri girov, zəmanət məsələsidir. Subsidiyalaşdırma mexanizminə əsasən, dövlət sahibkarın təminat yükünü öz üzərinə götürəcək. Ümumilikdə, dövlət sahibkara 36 ay ərzində, illik 15 faiz olmaqla, ən yüksək məbləğ kimi 5 milyon manat kredit əldə etməyə imkan yaradacaq. Həmin 15 faizin 10 faizini dövlət özü ödəyəcək, sahibkar cəmi 5 faizini ödəyəcək. Ona görə də azad edilmiş ərazilərdə sahibkarlara dövlət zəmanəti ilə kredit verilərkən onların etibarlılığı və intizamlılığı da nəzərə alınacaq.

Göründüy? kimi, dövlətimiz işğaldan azad olunan ərazilərimizdə sahibkarlığın inkişafı istiqamətində vətəndaşlara güzəştli şərtlər kreditin verilməsi istiqamətində mühüm proqramlar həyata keçirir. Bütün bunlar isə xüsusilə azad edilən ərazilərimizdə liberal iqtisadiyyatın təşviqi üçün böyük zəmin yaradacaq.

Yeganə BAYRAMOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azad sahibkarlığın və liberal iqtisadiyyatın təşviqi” istiqaməti üzrə hazırlanmışdır

Paylaş:

Baxılıb: 680 dəfə