Ekoaksiyanın nəticəsi nə olacaq?

Bakı:

25 °C

54 %

1 m/s

Əlaqə

AZ RU EN

Ana səhifə / MEDİA / Ekoaksiyanın nəticəsi nə olacaq?

Ekoaksiyanın nəticəsi nə olacaq?

24.02.2023 [10:04]

Erməni separatçıları daha bir bəyannaməni pozur

Günel ABBAS

Ətraf mühitə və inkişafa dair Rio-de-Janeyro bəyannaməsinə görə, müharibələr davamlı inkişaf prosesinə dağıdıcı təsir göstərməməlidir. Ona görə də dövlətlər silahlı konfliktlər zamanı ətraf mühiti mühafizə edən beynəlxalq hüquqa hörmət etməlidirlər. Lakin, ermənilər nəinki bu prinsipləri gözləmir, əksinə həmin prinsipləri kobud surətdə pozaraq işğal etdikləri ərazilərdə təbiəti viran qoyublar. İşğal olunmuş ərazilərimizdə nadir fauna və floraya malik meşə sərvətləri, çox qiymətli su mənbələri var. Erməni işğalçı qüvvələri Azərbaycanın təbii sərvətlərini bacardıqca tükəndirməyi qarşılarına ən ali məqsəd kimi qoyublar. Ermənilər işğal etdiyi ərazilərdə bu qiymətli sərvətləri amansızcasına dağıdır, Ermənistana daşıyır, daşınması mümkün olmayanları isə yandırmaqla ekologiyaya ciddi ziyan vururlar.

Torpaqlarımız azad olunduqdan sonra proseslərin bilavasitə şahidi olduğumuz üçün ermənilərin ölkəmizin faydalı qazıntı yataqlarının qanunsuz istismarına qarşı tədbirlər görməyə başladıq. Bu etirazın ən bariz nümunəsi məhz Azərbaycanlı eko-fəalların Laçın-Xankəndi yolunda keçirdikləri dinc etiraz aksiyasıdır. İki aydan uzun müddətdir ki, davam edən aksiyanın məqsədi Volkovun aksiya iştirakçıları qarşısında cavab verməsi ilə bağlı olsa da, suallar hələ də cavabsız qalıb.

Milli Məclisin təbii ehtiyatlar, energetika və ekologiya komitəsinin üzvü Anar Məmmədov bildirib ki, Azərbaycan Respublikası Konstitusiyasının 39-cu maddəsinə əsasən, hər kəsin sağlam ətraf mühitdə yaşamaq, ətraf mühitin əsl vəziyyəti haqqında məlumat toplamaq, ekoloji hüquqpozma ilə əlaqədar onun sağlamlığına və əmlakına vurulmuş zərərin əvəzini almaq hüququ var: “Eyni zamanda, “Ətraf mühitin mühafizəsi haqqında” Azərbaycan Respublikası Qanununa əsasən, ictimai birliklər ətraf mühitin mühafizəsi sahəsində ictimai nəzarəti həyata keçirmək, təqsirkar təşkilatların, vəzifəli şəxslərin və vətəndaşların məsuliyyətə cəlb edilməsi barədə məsələləri qaldırmaq hüququna malikdirlər. Göründüyü kimi, milli və beynəlxalq hüquq normalarının pozulması ilə müşayiət olunan bu faktlar Ermənistan hərbi-siyasi rəhbərliyinin ekoloji terror siyasəti yürütdüyünü, ekoloji cinayətlər törətdiyini sübut edir”.

Deputat qeyd edib ki, Laçın-Xankəndi yolunda keçirilən ekoaksiya çox önəmli bir aksiyadır: “Hər şeydən öncə Azərbaycanın həyata keçirdiyi bu eko-aksiya dinc bir şəkildə həyata keçirilir. Bütün dünya bizim mədəni addımlarımızın bir daha şahidi olur. Azərbaycanın gənc ekoloqları öz dövlətinin sərvətinə sahib çıxır. Ermənistan və Qarabağdakı separatçı rejim 30 il ərzində işğal altında olan torpaqlarımızda ekoloji terror törədiblər. Həmin ərazilərdə təbii sərvətlərimiz ermənilər tərəfindən talan olunub, yandırılıb, su ehtiyatları çirkləndirilib, on minlərlə hektar meşə sahəsi məhv edilib. Ermənistanın Azərbaycana qarşı həyata keçirdiyi ekoloji terrorda xarici şirkətlərin iştirakına dair çoxsaylı faktlar mövcuddur. Dövlətimiz tərəfindən həmin şirkətlərlə bağlı hüquqi tədbirlər görüləcək, onlar beynəlxalq məhkəmələrə veriləcək. Bu istiqamətdə işlər davam edir.

A.Məmmədov vurğulayıb ki, Azərbaycan Ermənistanın ekoloji terror siyasəti ilə bağlı həm işğal dövründə, həm də işğaldan sonra müvafiq beynəlxalq təşkilatlara müraciətlər edib. Təəssüf ki, problem özünün adekvat qiymətini almayıb. Bu da dünyada mövcud olan ikili standartların təzahürüdür. Amma bütün hallarda bu məsələ daim dövlətin diqqət mərkəzindədir. Dövlətimiz imkan verməyəcək ki, Qarabağın təbii sərvətləri ermənilər və onların havadarları tərəfindən talansın və ekologiyamıza ziyan vurulsun”.

“Ermənilər tərəfimizdən başladılan bu prosesdən ciddi təşvişə düşüblər. Azərbaycan dövləti bu hüquqların pozulması ilə bağlı beynəlxalq instansiyalara müraciət edib və bundan sonra da edəcək. Bir sıra məsələlərlə bağlı Avropa Məhkəməsinə müraciət edilib. Belə ki, Azərbaycan Avropa İnsan Haqları Məhkəməsinə yeni dövlətlərarası şikayət təqdim edib. Avropa Məhkəməsinə göndərilmiş şikayətdə Laçın, Zabux və Susda azərbaycanlıların yüzlərlə mülkünün məhv edilməsinə görə Ermənistanın məsuliyyət daşımasına dair faktlar təqdim edilib”, - deyə deputat qeyd edib.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Ekologiya və ətraf mühitin mühafizəsi” istiqaməti üzrə hazırlanmışdır

Paylaş:

Baxılıb: 791 dəfə