Azərbaycan icması xarici ölkələrin rəhbərliyinə müraciətlər ünvanlayır

Bakı:

23 °C

88 %

8 m/s

Əlaqə

AZ RU EN

Ana səhifə / MEDİA / Azərbaycan icması xarici ölkələrin rəhbərliyinə müraciətlər ünvanlayır

Azərbaycan icması xarici ölkələrin rəhbərliyinə müraciətlər ünvanlayır

27.10.2022 [12:01]

Azərbaycan diasporunun aktiv fəaliyyəti

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Diaspor quruculuğu, lobbiçilik və dünya azərbaycanlılarının həmrəyliyi” istiqaməti üzrə hazırlanmışdır

Günel ABBAS

Son günlər xarici ölkələrdəki Azərbaycan icması İkinci Qarabağ müharibəsi zamanı Ermənistan silahlı qüvvələrinin bombardman etdiyi Azərbaycan şəhərləri ilə bağlı yaşadıqları ölkələrin hökumətinə və parlamentinə müraciətlər ünvanlayırlar. Ümumiyyətlə, Azərbaycanın haqq səsinin və erməni vandalizminin dünya ictimaiyyətinə çatdırılması olduqca mühüm məsələlərdən biridir. Bu gün də məsələ aktivliyini qoruyub saxlayır. İstər müharibə, istərsə də postmüharibə dövründə Azərbaycan diasporu xaricdə ölkəmiz adına önəmli inkişafa nail oldu. Hazırda beynəlxalq münasibətlərdə hər bir xalqın diasporu həm mənsub olduğu dövlətin mədəni-siyasi prosesləri haqqında dünyaya məlumat verir, həm də təşkilatlanaraq tarixi həqiqətləri dünyaya çatdırır. Sevindirici haldır ki, Azərbaycan diasporunun düzgün təşkilatlanması nəticəsində 44 günlük Vətən müharibəsində həqiqətlər dünyaya çatdırıldı. Bununla bərabər, haqq səsimizi müvafiq qurumların qarşısında aksiyalar keçirməklə də yaydılar.

Milli Məclisin deputatı Ramin Məmmədov bildirib ki, xarici ölkələrdə yaşayan soydaşlarımızın vahid ideya ətrafında birləşdirilməsi istiqamətində işlər bu gün də uğurla davam etdirilir: “Artıq Azərbaycan diasporu daha geniş və əhatəli fəaliyyət göstərir. Formalaşmış və tam təşkilatlanmış diasporumuz indi praktiki işlər görmək mərhələsindədir. Bu mərhələnin də özünəməxsus çətinlikləri və mürəkkəblikləri var. Demək olar ki, diaspor təşkilatlarımıza yetkin insanlar rəhbərlik edir, bu qurumlarda getdikcə siyasi və ideoloji cəhətdən daha hazırlıqlı insanlar cəmləşirlər. Onlar yaşadıqları ölkələrdəki siyasi proseslərə, eləcə də dünya siyasəti müstəvisində baş verənlərə Azərbaycanın maraqları baxımından reaksiya verə bilirlər. Azərbaycan diaspor təşkilatları artıq müasir iş üsulları ilə çalışmağa başlayıblar. Bu da Azərbaycanın haqq səsinin daha geniş və əhatəli duyulmasına şərait yaradır. Artıq Azərbaycanın qarşılaşdığı problemlər dünya ictimaiyyətınə daha tez çatdırılır. Azərbaycan həqiqətlərinin dünyaya çatdırılmasında diasporumuzun əvəzsiz rolu var. Bunların nəticəsində Azərbaycanı getdikcə dünyada daha çox tanıyırlar”.

Deputatın sözlərinə görə, soydaşlarımız yaşadıqları ölkələrin ictimai-siyasi həyatında yaxından iştirak etməyə çalışırlar: “Xarici ölkələrdə yaşayan azərbaycanlıların ictimai-siyasi fəallığının artırılması işinə yardım göstərilməsi, eləcə də onların hüquqi sahədə qarşılaşdıqları problemin həlli, soydaşlarımızın hüquq və azadlıqlarının qorunması dövlətimizin əsas fəaliyyət sahələrindən biridir. Xaricdəki soydaşlarımızın hüquq və azadlıqlarının qorunmasının təmin edilməsi məqsədilə dünyanın müxtəlif ölkələrində hüquqi maarifləndirmə işlərinin aparılması davam etdirilir. Soydaşlarımızın daha çox yaşadığı ölkələrin miqrasiya məsələləri və əcnəbilərlə bağlı, habelə vətəndaşlıq statusu haqqında qanunvericilik aktları barədə soydaşlarımızın məlumatlandırılması istiqamətində də lazımi işlər görülür. Dünyanın müxtəlif ölkələrinin parlament və hökumət nümayəndələri, ictimai xadimləri, ziyalıları, mətbuat nümayəndələri, siyasi partiyaları ilə Azərbaycan diaspor təşkilatları arasında əlaqələrin qurulması, diaspor və lobbi quruculuğu sahəsində prioritet vəzifələrdəndir. Bu məqsədlə ötən müddət ərzində Azərbaycan diaspor təşkilatları fəaliyyət göstərdiyi ölkələrin siyasi və dövlət xadimləri ilə əlaqələr qurub, qeyri-hökumət təşkilatları, dövlət orqanları ilə əməkdaşlıq yaradılıb”.

Deputat Azərbaycanın xarici ölkələrdəki icmasının fəaliyyətini yüksək qiymətləndirib: “Azərbaycan diasporunun gündən-günə inkşaf etməsi bizi də sevindirir. Çünki biz başa düşdük ki, güc birlikdədir. Baxmayaraq ki, erməni diasporu uzun illərdir fəaliyyət göstərir, buna qarşı olaraq haqq səsimizi dünyaya çatdırmaq üçün bizim xaricdə yaşayan soydaşlarımız fəal işlər gördülər. Müharibə bizim birliyimizi bir daha dünyaya göstərdi. Dünyanın ən nüfuzlu ölkələrində mitinqlər, parlament səviyyəsində müraciətlər olundu. Biz bununla səsimizi çatdırmağa çalışdıq, düşünürəm ki, bunu bacara bildik. Eyni zamanda informasiya müharibəsində də Azərbaycan diasporu mütəşəkkil şəkildə mübarizə apardı. Bu istiqamətdə diasporun fəaliyyətini yüksək qiymətləndirmək olar. Bu gün artıq reallıq dəyişib. Artıq Azərbaycan öz sözünü deyən bir ölkədir. Bunu 44 günlük müharibə dövründə də göstərdik. Təbii ki, bu qələbəni şərtləndirən çox vacib amillər olub. Zəfərin qazanılmasında əsas faktorlardan biri Azərbaycanın xalqının təşkilatlanmağı idi”.

Paylaş:

Baxılıb: 932 dəfə