Hərtərəfli inkişafımız üçün...

Bakı:

7 °C

87 %

5 m/s

Əlaqə

AZ RU EN

Ana səhifə / MEDİA / Hərtərəfli inkişafımız üçün...

Hərtərəfli inkişafımız üçün...

18.06.2025 [09:37]

Təhsilin media üzərindən təbliği vacib şərtlərdəndir...

Elm və təhsil hər bir xalqın inkişafında mühüm yerə malikdir. Azərbaycan xalqı da hər zaman elmə, təhsilə, maariflənməyə marağı ilə seçilib. Tarixə nəzər saldıqda bu, öz təsdiqini tapır. Ölkəmizin ərazisində yerləşən tarixi abidələr, rəsədxanalar, azərbaycanlı alimlərin, elm xadimlərinin çoxsaylı ixtiraları, elmə verdikləri töhfələr bir daha xalqımızın bu sahəyə irsi həssaslığından xəbər verir.

Müasir dövrdə elm və təhsil proqramlı inkişaf üzərində gələcəyə yol alıb. Bu, həm qlobal səviyyədə elmin mübadiləsinə imkan yaradır, həm də inteqrasiyaya yardım edir. Elmin inkişafı üçün həyata keçirilən proqramlar insanların savadlanması və inkişafı ilə yanaşı, cəmiyyətin ümumi səviyyəsinin yüksəlişində əsaslı rol oynayır.

Bu təhsil prosesinin təbliği isə ən ümdə məsələlərdəndir. Təhsilin inkişaf istiqamətlərini geniş auditoriyaya çatdırmaq, onun inteqrasiyasını daha da sadələşdir mək üçün isə yeni texnologiyalardan istifadə olunur. Qəzet və jurnallar, internet portalları, hətta bloqlar, televiziyalar vasitəsilə təhsil proqramlarının geniş cəmiyyətə yaxından tanıdılması üçün işlər görülür.

Televiziyalarda bu proqramlara üstünlük verilməlidir

Mövzunu “Yeni Azərbaycan”a şərh edən təhsil üzrə ekspert Elşən Qafarov bildirib ki, elmi-kütləvi, mədəni-maarif, təhsil proqramlarının, bu sahə üzrə yazılan yazıların ümumilikdə cəmiyyətin bilik səviyyəsinin artmasında, dünyagörüşünün genişlənməsində və daha faydalı informasiya ilə cəmiyyətin təmin olunmasında çox böyük əhəmiyyəti var: “Bu istiqamətdə samballı proqramlarımız məvcuddur. Həmin proqramların sayını kifayət qədər artırmaq lazımdır. Hansı ki, bu proqramlar cəmiyyəti düşündürməli, məntiqi təfəkkürü inkişaf etdirməlidir. Bu proqramlar cəmiyyəti savadlandırmalıdır və eyni zamanda cəmiyyətin ümumilikdə maariflənməsinə xidmət etməlidir. Bu səpkidə olan verilişlərdə mütləq şəkildə Azərbaycanın tarixi, tanınmış şəxslər, elm və mədəniyyət xadimləri, milli qəhrəmanlarımız, Vətən uğrundan canından keçən igidlərimiz təbliğ olunmalıdır. Həm də belə verilişlərin özündə də bir intellektuallıq olmalıdır”.

Verilişlərin əhatə dairəsi genişlənməlidir

E.Qafarov hesab edir ki, bütün bunları rellaşdırmaq üçün peşəkarların imkanlarından istifadə düzgün həyata keçirilməlidir: “Cəmiyyəti silkələyəcək və maraq doğuracaq həmin proqramların davamlı olmasının nə qədər böyük əhəmiyyət daşımasına təsadüfən toxunmuram. Heydər Əliyev Fondunun bu istiqamədə böyük qayğısı və diqqəti hər kəsə məlumdur. Bütövlükdə bu kimi tədbirlərin daha da kütləviliyinin təmin olunmasına ehtiyac var. Bunlar Azərbaycanda milli ruhun təbliğ olunmasını daha da stimullaşdırır. Bu kimi verilişlər məntiqi təfəkkürü inkişaf etdirir, gənclərə, övladlarımıza düşünməyi öyrədir. Belə proqramlar hər yaş xüsusiyyətlərinə uyğun ruhun təbliğinə xidmət etməlidir. Eyni zamanda maraqlar mütləq nəzərə alınmalıdır. Digər cəhətdən burada həm də milli-mənəvi dəyərlər ön planda olmalıdır. Bu istiqamətdə verilişlərin daha da genişlənməsinin və əhatəliyinin artırılmasının tərəfdarıyam”.

İşə peşəkarlar cəlb olunmalıdır...

“Bu kimi proqramların peşəkar şəkildə hazırlanması çox vacib əhəmiyyət daşıyır. Aparılan işlər genişləndirilməli, bu kimi proqramlar hazırlanarkən mütləq şəkildə prosesə peşəkarlar cəlb olunmalıdır. Fərqli sahələrdə olan intellektualların bura dəstək göstərməsi çox vacibdir. Yazıçıların, elm adamlarının, təhsil sektoru nümayəndələrinin, mədəniyyət və incəsənət xadimlərinin birgə səyi olmalıdır”, -deyən müsahib onu da qeyd edib ki fərqli yaradıcı insanların səfərbər olması olduqca vacibdir. Bu iş təkcə təhsil ilə məşğul olan bir qrupun hazırlaya biləcəyi və yaxud yetərli keyfiyyətdə ərsəyə gətirə biləcəyi iş deyil - peşəkarlıq səviyyəsu bu məsələdə ön planda durur.

Dünya təcrübəsini tətbiq etməliyik

Ekspert qeyd edib ki, eyni zamanda başqa ölkələrdən də nümunələr götürməli, təcrübə mübadiləsi aparmalıyıq. “Təəssüflər olsun ki, bizdə şagirdlərin və tələbələrin hazırladıqları məhsulların bazara çıxarılmasında çətinliklər müşahidə olunur. Bəzi universitet və məktəblər istisna olmaqla, qalan təhsil müəssisələrimiz bu prosesə cəlb olunmur. Bu istiqamətdə bir növ təkcə təhsilvermə yox, bilik və bacarıqların formalaşdırılması, əldə olunan biliyi istehsalata cəlb etmək, ölkə iqtisadiyyatına dəstək xarakterli addımlar atılmasına təş?iq etməliyik. Hansı ki, dünyanın qabaqcıl ölkələrində bu proses var və tətbiq olunur. Dövlət elmi-kütləvi, mədəni-maarif və təhsil sahəsində addımlar atır. Bu işi daha da genişləndirmək isə gələcəyimiz üçün çox önəmlidir”.

Yeganə

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Elmi-kütləvi, mədəni-maarif, təhsil proqramlarının hazırlanması” istiqaməti üzrə hazırlanmışdır.

Paylaş:

Baxılıb: 247 dəfə