Berlində mühüm tədbir!

Bakı:

19°C

68%

12m/s

Əlaqə

AZ RU EN

Ana səhifə / MEDİA / Berlində mühüm tədbir!

Berlində mühüm tədbir!

03.07.2024 [10:25]

Avropada yaşayan azərbaycanlı mühəndislərin Forumu...

Y.SAHİB

Son illər Diasporla İş üzrə Dövlət Komitəsi xarici ölkələrdə yaşayan mütəxəssislərin iştirakı ilə ixtisaslaşmış forumlar təşkil edir. Bugünədək xaricdə yaşayan azərbaycanlı alimlərin və həkimlərin bir neçə mühüm əhəmiyyətli forumu keçirilib. Həmin forumlar Azərbaycan diasporu arasında böyük rəğbətlə qarşılanıb.

Belə forumlardan biri bu günlərdə Azərbaycanın Almaniyadakı səfirliyinin və Diasporla İş üzrə Dövlət Komitəsinin birgə təşkilatçılığı ilə baş tutub. Belə ki, Berlində “Avropada yaşayan azərbaycanlı mühəndislərin Forumu” öz işinə başlayıb. Tədbir “Yaşıl dünya naminə həmrəylik ili” çərçivəsində gerçəkləşib.

Beynəlxalq səviyyədəki təsirimiz artacaq

Qeyd edək ki, forumun “COP-29” tədbiri ərəfəsində təşkili, azərbaycanlı mütəxəssislərin bu mötəbər tədbirlə bağlı müzakirələr aparmasına və müvafiq təkliflərin ümumiləşdirilməsinə imkan yaradıb. Eyni zamanda forum Azərbaycanın beynəlxalq səviyyədəki təsirini artırıb və bu sahədə fəaliyyət göstərən azərbaycanlı mütəxəssislərin beynəlxalq səviyyədə təcrübələrini paylaşmaq üçün bir platforma təqdim edib.

Forumda çoxsaylı qonaqlar iştirak ediblər. Həmin qonaqlar içərisində Avropadan 125 mühəndis, alim, eləcə də tanınmış və nüfuzlu diaspor nümayəndələri, Diasporla İş üzrə Dövlət Komitəsinin sədr müavini Elşad Əliyev, mədəniyyət nazirinin müavini Fərid Cəfərov, Azərbaycanın Almaniyadakı səfiri Nəsimi Ağayev və s. olub.

Forumun əvvəlində Azərbaycan Respublikasının Dövlət Himni səsləndirilib, torpaqlarımızın bütövlüyü uğrunda canından keçən şəhidlərin əziz xatirəsi bir dəqiqəlik sükutla yad edilib.

“Xaricdəki mühəndislərimizi dəstəkləyirik”

Diasporla İş üzrə Dövlət Komitəsinin sədri Fuad Muradovun forum iştirakçılarına təbrikində bildirilib: “Mühəndislər forumu müzakirə və əməkdaşlıq üçün konstruktiv bir platformadır. Bu gün mühəndislərimizin, fərqli mühəndislik sahələrində işləyən azərbaycanlı mütəxəssislərin foruma toplaşması bilik, təcrübə və ideyaların mübadiləsi üçün unikal imkan yaradır. Komitə olaraq biz də öz növbəmizdə xaricdə yaşayan mühəndis və alimlərimizi dəstəkləyir, onlara karyera və inkişaf üçün imkanlar yaratmağa çalışırıq”.

Bundan başqa tədbirdə iştirak edən qonaqlar forumun əhəmiyyəti, aparılan müzakirələrin elmi faydaları, azərbaycanlı mühəndislərin bilik və bacarıqlarından səmərəli istifadənin üstünlüklərini diqqətə çatdırıb, iştirakçılara uğurlar arzulayıblar.

Tədbirdə bu il ölkəmizdə keçiriləcək COP29-la bağlı videoçarx nümayiş olunduqdan sonra Avropanın ayrı-ayrı ölkələrində yaşayan azərbaycanlı alim və mütəxəssislər müxtəlif mövzularda təqdimatlar ediblər.

Alman Azərbaycan Mədəniyyət Evinin həmtəsisçisi, Köln Azərbaycan Evinin həmsədri Altay Rüstəmov təqdimatda Almaniya modeli olan enerji qənaətli evlərdən danışıb. Tədqiqat və İnkişaf sahəsi üzrə Baş ekspert, İrəvan xanının Almaniyada yaşayan varisi Əmir Əli Sərdari İrəvani “Odlar Yurdu və Texnologiya” mövzusunda təqdimat edib.

Avropadakı mühəndislərimizlə əməkdaşlıq...

Daha sonra Forum öz işini panel müzakirələri ilə davam etdirib. “Azərbaycanda mühəndisliyin inkişafı: çağırışlar və perspektivlər” mövzusundakı panel iclasında SOCAR-ın Bakı Ali Neft Məktəbinin (BANM) rektoru Elmar Qasımov çıxış edib.

Rektor dünyanın aparıcı texnoloji mərkəzlərində çalışan azərbaycanlıların ölkəmizə təcrübə mübadiləsinə, tədqiqatlara dəvət olunmasının, onların yaratdıqları şirkətlərin rezident kimi cəlb edilməsinin əhəmiyyətini vurğulayıb. O, azərbaycanlı mühəndislərin bilik və bacarıqlarından səmərəli istifadənin üstünlüklərini diqqətə çatdırıb. Habelə Avropada yaşayan və çalışan mühəndislərimizlə görüş təşkil edilib və gələcək əməkdaşlığa dair fikir mübadiləsi aparılıb.

İştirakçılarda böyük təəssüratlar yarandı

Forum iştirakçıları Diasporla İş üzrə Dövlət Komitəsinə və Almaniya Azərbaycanlıları Alyansına məktublar ünvanlayıblar. Qeyd edək ki, tədbir iştirakçılarda böyük təəssüratlar yaradıb.

Avropanın ən qabaqcıl elm və təhsil müəssisələrinin məzunu olan forum iştirakçıları orada qazandıqları iş təcrübəsi ilə ölkəmizdə gənc mühəndislərinin yetişdirilməsinə və bu sahənin daha da inkişaf etdirilməsinə öz töhfələrini verirlər. İştirakçılar dünyanın aparıcı texnoloji mərkəzlərində çalışan azərbaycanlıların ölkəmizə təcrübə mübadiləsinə, tədqiqatlara dəvət olunmasının, onların yaratdıqları şirkətlərinin rezident kimi cəlb edilməsinin əhəmiyyətini vurğulayıblar.

Bu kimi tədbirlərin həm onların xaricdə diaspor fəaliyyətini davam etdirməsinə, həm də Azərbaycanın dünya miqyasında tanınmasına faydalı olacağını söyləyən forum iştirakçıları tədbirin təşkilinə görə Diasporla İş üzrə Dövlət Komitəsi, Almaniya Azərbaycanlıları Alyansı və Azərbaycan Respublikasının Almaniyadakı səfirliyinə öz dərin təşəkkürlərini bildiriblər.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Diaspor quruculuğu, lobbiçilik və dünya azərbaycanlılarının həmrəyliyi” istiqaməti üzrə hazırlanmışdır

Paylaş:

Baxılıb: 447 dəfə