Hökumətə tapşırıq verildi

Bakı:

16 °C

63 %

10 m/s

Əlaqə

AZ RU EN

Ana səhifə / İqtisadiyyat / Hökumətə tapşırıq verildi

Hökumətə tapşırıq verildi

15.04.2022 [10:01]

Nəzarət tədbirləri gücləndirilir

Mübariz ABDULLAYEV

Sonu görünməyən Rusiya-Ukrayna müharibəsi və bir sıra digər mənfi xarici amillər bütün dünyada olduğu kimi, Azərbaycanda da istehlak bazarına müəyyən təzyiqlər yaradıb. Son vaxtlarda ticarət şəbəkələrində, xüsusilə ərzaq məhsullarının qiymətlərində bahalaşma müşahidə edilir. Eyni zamanda, insanlar hansısa məhsulların təchizatında problemlər yaranacağından ehtiyatlanaraq ehtiyaclarından artıq həcmlərdə ərzaq məhsulları alırlar.

İstehlak bazarında bolluğu və aşağı qiymətləri təmin etmək üçün

Qeyd olunan qlobal gərginliklər fonunda respublikamızda daxili bazarın qorunmasını hədəfləyən ardıcıl tədbirlər görülür. Prezident İlham Əliyevin 29 mart 2022-ci il tarixində imzaladığı müvafiq Fərmanda ölkəmizin ərzaq təhlükəsizliyinin daha da möhkəmləndirilməsini hədəfləyən bir sıra müddəalar yer alıb. Həmin müddəalar ölkəmizin ərzaq təhlükəsizliyinin təmin edilməsi mexanizminin daha da optimallaşdırılması məqsədi daşıyır.

Eyni zamanda, Prezident İlham Əliyevin hökumətə verdiyi müvafiq tapşırıqlara uyğun olaraq Baş nazir Əli Əsədov “Minimum istehlak səbətinin tərkibinə daxil olan bir sıra əsas ərzaq mallarının və onların istehsalında istifadə olunan malların ölkə ərazisindən aparılmasının tənzimlənməsinə dair tədbirlər haqqında” Nazirlər Kabinetinin müvafiq Qərarını imzalayıb. Sözügedən sənədlərə uyğun olaraq, ilk növbədə, ölkənin ərzaq ehtiyatları artırılır. Müşavirədə dövlət başçısına məruzə edilib ki, əhali tərəfindən gündəlik istifadə olunan 12 əsas ərzaq məhsulunun həm qiymət baxımından, həm anbarlarda, respublikada olan ehtiyatlar baxımından gündəlik monitorinqi aparılır.

İndiyədək Azərbaycan bir sıra pozisiyalar üzrə daxili istehlakın bütünlüklə yerli istehsal hesabına qarşılanmasına nail olub. Prezident İlham Əliyevin tapşırığına uyğun olaraq qarşıya qoyulan hədəf isə siyahını genişləndirmək və ərzaq məhsulları ilə özünütəminat səviyyəsini yüksəltməkdir. Yerli istehsalın qorunması da əsas prioritetlərdən biri kimi müəyyənləşdir?lib. Bu məqsədlə müəyyən məhsulların idxal prosedurları sadələşdirilib, eyni zamanda, ixracla məşğul olan sahibkarların da maraqları qorunur.

Ərzaqlıq buğda ilə təminat diqqət mərkəzində saxlanılır

Prezident İlham Əliyev Onun sədrliyi ilə bu ilin birinci rübünün yekunlarına həsr olunan müşavirədə söylədiyi nitqində çağırış edərək bildirib ki, bizim ərzaqlıq buğda ilə təminatımız, əlbəttə ki, diqqət mərkəzində olmalıdır. Hazırda Azərbaycan taxıla olan tələbatının yalnız 60 faizini yerli istehsal hesabına təmin edir. Ərzaqlıq buğda ilə özünütəminat isə cəmi 25 faiz səviyyəsindədir. Qlobal gərginliklərin artdığı indiki dövrdə belə vəziyyətlə heç cür barışmaq mümkün deyil. Prezident İlham Əliyev diqqəti qarşıya qoyulan hədəflərə çəkib. “Ona görə məsələ qoyulub ki, ərzaqlıq buğda ilə biz özümüzü ən azı 70-75 faiz təmin edək. Buna nail olmaq üçün potensial var, imkanlar var - həm azad edilmiş torpaqlarda, həm ölkəmizin digər yerlərində”, - deyə dövlət başçısı vurğulayıb.

Xatırladaq ki, post-müharibə dövründə işğaldan azad edilən ərazilərdə genişmiqyaslı əkinlərə başlanıb. Cari ildə təxminən 50 min hektar ərazidə əkin aparılması nəzərdə tutulub. Prezident İlham Əliyev tapşırıqlarını verərək bildirib ki, həm azad edilmiş torpaqlarda, həm də bütün başqa yerlərdə məhsuldarlığı artıra biləcək tədbirlərə əlavə vəsait ayrılmalıdır. İlk növbədə, suvarma, suvarma sistemləri, gübrələr və digər məsələlər öz həllini tapmalıdır.

Antiinflyasiya tədbirlərinin görülməsi zərurətdir

Müşavirədə Prezident İlham Əliyevin diqqət çəkdiyi vacib məsələlərdən biri də qiymət artımı ilə bağlıdır. Məlum hadisələr fonunda respublikamızda ərzaq məhsulları üzrə inflyasiya 18 faizə yüksəlib, ümumi inflyasiya isə 12,2 faiz səviyyəsindədir. Əlbəttə qiymətlərin artmasını şərtləndirən obyektiv amillər var. Ancaq süni qiymət artımı ilə bağlı faktlar da kifayət qədər çoxdur. Sirr deyil ki, indiki vəziyyətdən sui-istifadə edərək qiymətləri artıran sahibkarlar da var. Belə halların qarşısı alınmalıdır. Prezident İlham Əliyev bildirib ki, antiinflyasiya tədbirlərinin görülməsi, gücləndirilməsi zəruridir.

Paylaş:

Baxılıb: 1172 dəfə