Ərzaq təhlükəsizliyini hədəfə alan sənəd

Bakı:

26 °C

57 %

9 m/s

Əlaqə

AZ RU EN

Ana səhifə / İqtisadiyyat / Ərzaq təhlükəsizliyini hədəfə alan sənəd

Ərzaq təhlükəsizliyini hədəfə alan sənəd

31.03.2022 [09:51]

Mübariz ABDULLAYEV

Prezident İlham Əliyevin 29 mart 2022-ci il tarixində imzaladığı müvafiq Fərmanda ölkəmizin ərzaq təhlükəsizliyinin daha da möhkəmləndirilməsini hədəfləyən bir sıra müddəalar yer alıb. Sənəddə Azərbaycan Respublikası Prezidentinin 2016-cı il 11 aprel tarixli 859 nömrəli Fərmanı ilə təsdiq edilmiş “Dövlət müəssisə və təşkilatları (idarələri) tərəfindən ərzaq məhsullarının mərkəzləşdirilmiş qaydada dövlət büdcəsinin vəsaitləri hesabına satın alınması Qaydası”nda müəyyən dəyişikliklər edilməsi nəzərdə tutulub. Dəyişikliklər, həmçinin dövlət başçısının 2019-cu il 23 dekabr tarixli 897 nömrəli Fərmanı ilə təsdiq edilmiş “Elektron kənd təsərrüfatı” informasiya sistemi haqqında Əsasnamə”ni də əhatə edəcək.

Sözügedən dəyişikliklər ölkəmizin ərzaq təhlükəsizliyinin təmin edilməsi mexanizminin daha da optimallaşdırılması məqsədi daşıyır. İndiyədək istehsal-təchizat zəncirində əlaqələndirilmiş fəaliyyət arzuedilən səviyyədə deyildi. Bir sıra hallarda daxili tələbat nəzərə alınmadan məhsulların ixracına üstünlük verilirdi.

Beləliklə, daxili bazar qorunmurdu, mal qıtlığı yaranır və qiymətlər artırdı. Fərmanla “Dövlət müəssisə və təşkilatları (idarələri) tərəfindən ərzaq məhsullarının mərkəzləşdirilmiş qaydada dövlət büdcəsinin vəsaitləri hesabına satın alınması Qaydası”nda nəzərdə tutulan dəyişiklik istehsal-təchizat zəncirindəki bu kimi boşluqların aradan qaldırılmasına zəmin yaradacaq. Sənədə əsasən, sözügedən Qaydaya aşağıdakı məzmunda dəyişiklik ediləcək: “Ərzaq məhsullarının satıcıları satmaq niyyətində olduqları məhsulların növü, qiyməti və miqdarı barədə məlumatı hər il sentyabrın 1-dək portalda yerləşdirirlər”. Bu qayda həm istehsalçı-satıcıların, həm də alıcı təşkilatların maraqlarına tam cavab verir. İstehsalçı məhsulunu “harada satmaq”, “bazarlara necə çıxmaq” kimi qayğılardan birdəfəlik azad olacaq. Eyni zamanda, alıcı-təchizatçı təşkilatlar təklif olunan malların həcmi və qiymətləri barədə məlumatları portal üzərindən əldə edəcəklər.

Yuxarıda qeyd olduğu kimi, sənədə əsasən, “Elektron kənd təsərrüfatı” informasiya sistemi haqqında Əsasnamə”də bir sıra dəyişikliklər edilməsi nəzərdə tutulub. Bu dəyişikliklər özündə satınalan təşkilatlar tərəfindən ərzaq məhsullarının dövlət büdcəsinin vəsaiti hesabına satın alınmasına dair tələb və təkliflərin “ərzaq məhsullarının dövlət sifarişi ilə satın alınması” elektron portalı” altsistemində yerləşdirilməsini ehtiva edir.

Bundan sonra istehsalçılar və yaxud satıcılar bilavasitə satınalan təşkilat tərəfindən seçiləcək. Altsistemdə həmçinin satıcıların və satınalan təşkilatların müxtəlif məlumatları yerləşdiriləcək. Tərəflər alqı-satqı müqavilələrini elektron sənəd formasında bağlayacaqlar. Bütün bu kimi dəyişikliklərin edilməsində məqsəd isə ölkədə ərzaq məhsulları istehsalını stimullaşdırmaqdan, keyfiyyətin yüksəldilməsinə nail olmaqdan və neqativ halların, gizli sövdələşmələrin aradan qaldırılmasını təmin etməkdən ibarətdir.

Ölkəmizdə ərzaq məhsulları istehsalına və təchizatına diqqətin artırılması isə heç də təsadüfi deyil. Rusiya -Ukrayna müharibəsi qlobal iqtisadiyyata, o cümlədən də dünya üzrə ərzaq təminatına ciddi təhdidlər yaradıb.

İstehlak bazarlarında müxtəlif ərzaq məhsulları üzrə təklifin azalması, ilk növbədə, müharibə tərəfləri olan Ukraynadan və Rusiyadan ixracın azalması ilə bağlıdır. Hər iki dövlətin dünyanın ərzaq təminatında böyük payı var idi. Rusiyanın illik ixracı 332 milyard 200 milyon dollara çatmışdı. Ukrayna isə illik 68 milyard 240 milyon dollarlıq ixraca malik idi. İndi dünya ölkələri belə böyük həcmdə təklifdən məhrum qalıblar. Buna görə də ölkələr üçün ərzaq təhlükəsizliyinə hesablanan prevantiv tədbirlər görmək çağırışı yaranıb. Məsuliyyətli dövlət olan Azərbaycan da özünün ərzaq təhlükəsizliyinin təminatı üçün zəruri addımlar atır.

Paylaş:

Baxılıb: 1343 dəfə