Avropa İttifaqı - Dünya Bankı və Azərbaycanın birgə Çevik Sazişi

Bakı:

15 °C

72 %

9 m/s

Əlaqə

AZ RU EN

Ana səhifə / İqtisadiyyat / Avropa İttifaqı - Dünya Bankı və Azərbaycanın birgə Çevik Sazişi

Avropa İttifaqı - Dünya Bankı və Azərbaycanın birgə Çevik Sazişi

17.02.2022 [10:20]

Sənəd hansı sahələri əhatə edir?

E.CƏFƏRLİ

Məlum olduğu kimi Avropa İttifaqı (Aİ) və Dünya Bankı (DB) Azərbaycan üçün Çevik Texniki Yardım Aləti (AZTAF) üzrə saziş proqramını imzalayıb. AZTAF proqramı yeni iqtisadi çağırışları əhatə edən çoxvektorlu sənəd hesab edilə bilər. Həm Aİ, həm də DB-nın ötən illərdə Azərbaycan hökuməti ilə birgə gerçəkləşdirdiyi institusional islahatlar və biznesə təşəbbüslər layihələrinə əsasən, infrastrukturların və kommunikasiyaların bərpası, logistika və bazar infrastrukturunun idarə olunması, ekologiya, yol, nəqliyyat və eləcə də dövlət idarəetmə sistemlərində yeni texnologiyaların tətbiqi və biznesə dəstək istiqamətləri üzrə birgə əməkdaşlıq edib və əhəmiyyətli nəticələr də əldə edilib. İndiki saziş isə əsas etibarilə yeni rəqəmsal iqtisadiyyat quruculuğuna töhfə verməyə fokuslanıbdır. Saziş proqramının hədəf çərçivəsi kifayət qədər genişdir, sosial-iqtisadi həyatın təkamül yollarını müəyyənləşdirməklə post-neft iqtisadiyyatına əsaslanan biznes cəmiyyətinin quruculuğunun prioritetlərini elan edir. Belə ki, dövlət müəssisələrinin idarəçiliyinin sağlamlaşdırılması, dövlət satınalmalarının təkmilləşdirilməsi, rəqəmsal inkişaf, inklüzivlik kimi geniş spektrli prioritetləri birbaşa Azərbaycan hökumətinin hədəf seçdiyi şəffaflıq və hesabatlılıq prinsipləri ilə üst-üstə düşür.

Azərbaycan Hökuməti bir müddət əvvəl yaxın onilliyin inkişaf trayektoriyasını əks etdirən strateji konseptini - “Azərbaycan 2030: sosial-iqtisadi inkişafa dair Milli Prioritetlər”ini açıqlayıb və bu sənədlə təbii ki, beynəlxalq iqtisadi institutlar, o cümlədən Dünya Bankı, Avropa İttifaqı da yaxından tanışdır. Bu baxımdan, Azərbaycanın yeni inkişaf magistralının ideoloji tezislərini müəyyən edən həmin milli prioritetlərdə hədəf seçilmiş istiqamətlər DB və Aİ üçün də maraqlı olduğundan AZTAF çərçivəsi də bu reallıqlara uyğun hazırlanıbdır. Buna görə də, yeni saziş Azərbaycanın beynəlxalq iqtisadi icma ilə birlikdə rəqabətqabiliyyətli iqtisadiyyat və dinamik, inklüziv və sosial ədalətə əsaslanan cəmiyyət quruculuğu, rəqabətli insan kapitalı və müasir innovasiyaların təminatı, “yaşıl artım” meyarlarına çatmaqda əhəmiyyətli sənəd kimi dəyərləndirilə bilər. Belə ki, dövlət satınalmalarının açıqlığı, məhkəmə-hüquq sistemində şəffaflığın artırılması, haqsız rəqabətin qarşısının alınması, iqtisadi idarəetmədə müasir korporativ davranış mədəniyyətinin tətbiqi genişləndirilməsi, korrupsiya ilə mübarizənin gücləndirilməsi, yeni çağırışlara cavab verən müasir dövlət qulluğu sistemi və etikasının formalaşması sahəsində əsaslı nəticələr əldə etmək mümkündür. Beləliklə, əməkdaşlıq proqramı ən ali meyarlardan biri olan şəffaflıq prinsipinin tam oturuşmasına da möhkəm zəmin verəcək.

AZTAF sazişinin ən əhəmiyyətli müddəalarından biri də azad biznes üçün təşəbbüslərin artırılmasına dəstəkdir. Özəl sektorun, xüsusilə də kiçik və orta sahibkarlığın iqtisadi artımın və məşğulluğun başlıca mənbəyinə çevrilməsi üçün işgüzar mühitin əhəmiyyətli dərəcədə yaxşılaşdırılması, şəffaf özəlləşmə strategiyasının həyata keçirilməsi, biznesin təşviqi mexanizmlərinin yaradılması, sahibkarlıq fəaliyyətinin stimullaşdırılması ilə bağlı tədbirlərin həyata keçirilməsi mühüm fayda verəcək. Burada xüsusilə də sahibkar qadınların fəaliyyətinə xüsusi önəmin verilməsi də diqqətedicidir.

Saziş, həmçinin sosial mahiyyət kəsb edir. Belə ki, COVID-19-un vurduğu sosial-iqtisadi təsirlərinin yumşaldılması və post-pandemiya dövründə müxtəlif sosial xidmət sahələrində əvvəlki rentabelliyin tam bərpasını təmin etməklə həssas əhali qruplarına mühüm fayda verəcək.

Paylaş:

Baxılıb: 1088 dəfə