Vergi Xidmətinin Tədris Mərkəzində antikorrupsiya strategiyası mövzusunda müzakirələr aparılıb

Bakı:

9 °C

87 %

8 m/s

AZ RU EN

Ana səhifə / İqtisadiyyat / Vergi Xidmətinin Tədris Mərkəzində antikorrupsiya strategiyası mövzusunda müzakirələr aparılıb

Vergi Xidmətinin Tədris Mərkəzində antikorrupsiya strategiyası mövzusunda müzakirələr aparılıb

17.03.2021 [13:29]

Son illər Prezident İlham Əliyevin siyasi iradəsi və qətiyyəti sayəsində ölkəmizdə korrupsiyaya qarşı mübarizə daha ciddi və kəskin xarakter alıb, ölkədə sistem xarakterli institusional islahatlar geniş şəkildə həyata keçirilir. Vergi orqanlarında da korrupsiyaya qarşı mübarizə tədbirləri çərçivəsində müvafiq sahə üzrə hüquqi təbliğat materiallarının hazırlanması, təlim və treninqlərin keçirilməsinə xüsusi diqqət yetirilir.

Dövlət Vergi Xidmətindən AZƏRTAC-a bildirilib ki, xidmətin Tədris Mərkəzinin təşkilatçılığı ilə videoformat şəklində “Azərbaycanda antikorrupsiya strategiyası və gələcəyə baxış” mövzusunda tədbir keçirilib. Tədris Mərkəzinin rəisi vəzifəsini icra edən Mirəli Kazımov Prezident İlham Əliyevin bu sahədə həyata keçirdiyi institusional tədbirlər və islahatlar barədə məlumat verib.

Tədbirdə çıxış edən Açıq Hökumətin təşviqinə dair Hökumət-Vətəndaş Cəmiyyəti Dialoq Platformasının, Korrupsiyaya qarşı mübarizə üzrə QHT-lərin Məlumat və Əməkdaşlıq şəbəkəsinin koordinatoru, “Konstitusiya Araşdırmaları Fondu”nun Prezidenti Əliməmməd Nuriyev antikorrupsiya strategiyasının əsas istiqamətləri, bu sahədə yeni fəaliyyət planı barədə danışıb.

Natiq dövlət orqanlarında risk qiymətləndirilməsinin aparılması, nəzarət mexanizmlərinin səmərəliliyinin artırılması üçün müstəqil qiymətləndirmənin aparılması, ictimai iştirakçılığın genişləndirilməsi və gücləndirilməsi, maraqların toqquşması və digər məsələlər üzrə müvafiq qanunvericilik aktlarının qəbul edilməsi, dövlət orqanlarında korrupsiya hüquqpozmaları ilə bağlı yaradılmış komissiyalarda, şuralarda vətəndaş cəmiyyəti və media nümayəndələrinin təmsil olunması haqqında ətraflı məlumat verib.

Vergi Xidmətinin İnsan resursları baş idarəsinin rəis müavini Toğrul Əhmədov “Şəffaflığın artırılması və korrupsiyaya qarşı mübarizə üzrə Milli Strategiya və ondan irəli gələn Fəaliyyət Planı” mövzusu üzrə təqdimatla çıxış edib. O, “Açıq hökumətin təşviqinə dair 2020-2022-ci illər üçün Milli Fəaliyyət Planı”nın Dövlət Vergi Xidmətinin fəaliyyətində praktiki tətbiqi məsələlərinə toxunub, Milli Strategiyada dövlət orqanlarının fəaliyyəti ilə bağlı nəzərdə tutulan istiqamət və tövsiyələr, Milli Fəaliyyət Planından irəli gələn tədbirlər, o cümlədən, Vergi Xidmətində korrupsiya risklərinin qiymətləndirilməsi, vergi orqanı əməkdaşları üçün elektron təlim kurslarının hazırlanması, etik davranış və korrupsiyaya qarşı mübarizə sahəsində maarifləndirmə işlərinin aparılmasının əhəmiyyətindən danışıb.

Müzakirələrin aparıldığı tədbirdə Vergi Xidmətinin və İqtisadiyyat Nazirliyinin tərkibində fəaliyyət göstərən digər dövlət xidmətlərinin vəzifəli şəxsləri iştirak ediblər.

Qeyd edək ki, İqtisadi Əməkdaşlıq və İnkişaf Təşkilatının (OECD) Antikorrupsiya Şəbəkəsinin Monitorinq Raundları ilə bağlı tövsiyələrdə İqtisadiyyat Nazirliyi yanında Dövlət Vergi Xidmətinin Tədris Mərkəzi korrupsiya ilə mübarizə sahəsində maarifləndirmə və tədrisin genişləndirilməsi, təlimlərin keçirilməsi üzrə icraçı strukturlardan biri kimi müəyyən olunub.

Paylaş:

Baxılıb: 700 dəfə