İtaliyanın “Exportiamo” portalı Azərbaycandakı biznes mühitindən bəhs edib

Bakı:

16 °C

88 %

16 m/s

Əlaqə

AZ RU EN

Ana səhifə / İqtisadiyyat / İtaliyanın “Exportiamo” portalı Azərbaycandakı biznes mühitindən bəhs edib

İtaliyanın “Exportiamo” portalı Azərbaycandakı biznes mühitindən bəhs edib

05.11.2015 [10:19]

İtaliyanın “Exportiamo” portalında Azərbaycanda mövcud əlverişli investisiya mühitindən bəhs edən yazı yerləşdirilib.
Məqalədə vurğulanır ki, Azərbaycan son illər cəlbedici bazarı ilə İtaliya şirkətlərinin böyük marağına səbəb olub. Uzun illər enerji sektoru ilə tanınan bu ölkədə iqtisadiyyatın şaxələndirilməsi siyasətinin uğurla həyata keçirilməsi nəticəsində artıq qeyri-neft sektorunun inkişafı da müşahidə olunmaqdadır. Bu, xarici investorların diqqətini cəlb edən başlıca amildir. Bakının Qafqazın episentrinə çevrildiyi hər kəsə məlumdur. Bu şəhərdə önəmli tədbirlər keçirilir və meqa-investisiya layihələri reallaşdırılır. Bu baxımdan “Xəzər inşaat həftəsi”, “BakuBuild-2015” kimi beynəlxalq sərgiləri misal göstərmək olar.
Yazıda İtaliyanın Azərbaycandakı səfiri Ciampaolo Kutillonun fikirləri də yer alıb. Səfir bildirib ki, Azərbaycan-İtaliya əlaqələrinin inkişafında qeyri-neft sektorunun payı getdikcə artmaqda və tərəfdaşlıq əlaqələrimiz genişlənməkdədir.
Portalda, həmçinin Azərbaycan İxracın və İnvestisiyaların Təşviqi Fondunun (AZPROMO) rəhbəri Rüfət Məmmədovun geniş müsahibəsinə də yer verilib. Qurumun fəaliyyətindən danışan R.Məmmədov vurğulayıb ki, fondun məqsədi Azərbaycanda fəaliyyət göstərmək istəyən xarici şirkətlərə dəstək vermək, eyni zamanda, şirkətlərimizin xarici bazarlardakı fəaliyyətinə imkanlar açmaqdır. O deyib: “Əsas missiyamız Azərbaycanın davamlı iqtisadi inkişafını dəstəkləmək, milli infrastrukturdan və imkanlarımızdan istifadə etməklə ixrac fəaliyyətimizi səmərəli şəkildə təşviq etməkdir. Xarici ölkələrin müvafiq sahədə fəaliyyət göstərən qurumları ilə əməkdaşlıq etmək AZPROMO üçün önəmli amildir. Bu baxımdan İtaliyanın İCE Agentliyi ilə əlaqələri misal göstərmək olar”.
Azərbaycan iqtisadiyyatının müxtəlif istiqamətlərindən danışan R.Məmmədov ölkəmizin əlverişli iqlimə malik olduğunu və bunun kənd təsərrüfatının inkişafına müsbət təsir göstərdiyini bildirib. O, həmçinin neft-kimya sənayesi, tikinti, xidmət, nəqliyyat, İKT, turizm, ətraf mühit və digər sahələrdə əldə olunmuş mühüm nailiyyətlərdən və Sumqayıt Kimya Sənaye Parkında investorlar üçün təklif olunan imkanlardan bəhs edib. Diqqətə çatdırıb ki, Azərbaycanda 66 İtaliya şirkətinin fəaliyyət göstərməsi əlverişli biznes mühitinin mövcudluğunun göstəricisidir.
“İtaliya şirkətlərinin Azərbaycanda fəaliyyət göstərmələrinə hansı amillər təsir edir?” sualına R.Məmmədov belə cavab verib: “Ən önəmli faktor ölkəmizdəki sabitlikdir. Davamlı iqtisadi inkişafa malik Azərbaycan makroiqtisadi sabitlik və dayanıqlıq üzrə dünya ölkələri arasında ön sıralarda qərarlaşıb. Ölkəmizdə yerli və xarici iş adamlarının fəaliyyəti üçün bərabər imkanlar yaradılıb”.

Paylaş:

Baxılıb: 1188 dəfə