Bakıda XXII Beynəlxalq “Xəzər Neft və Qaz” konfransı öz işinə başlayıb

Bakı:

23 °C

73 %

8 m/s

Əlaqə

AZ RU EN

Ana səhifə / İqtisadiyyat / Bakıda XXII Beynəlxalq “Xəzər Neft və Qaz” konfransı öz işinə başlayıb

Bakıda XXII Beynəlxalq “Xəzər Neft və Qaz” konfransı öz işinə başlayıb

04.06.2015 [09:44]

İyunun 3-də Bakıda XXII Beynəlxalq “Xəzər Neft və Qaz” konfransı öz işinə başlayıb.
AZƏRTAC xəbər verir ki, “ITE Group” şirkətinin baş müşaviri Ser Endryu Vud konfransda 30 ölkədən 500-dən çox nümayəndənin iştirak etdiyini, ildə bir dəfə keçirilən bu cür görüşlərin həm mütəxəssislər, həm də bütövlükdə neft-qaz sənayesi üçün çox vacib olduğunu deyib.
“Avrasiya enerji təchizatı təhlükəsizliyinin təmin olunmasında Azərbaycanın rolu” mövzusunda plenar sessiyada çıxış edən Azərbaycanın energetika naziri Natiq Əliyev bildirib ki, hər bir ölkə öz enerji mənbələrinin diversifikasiyasında maraqlıdır və bu istiqamətdə çalışır. Avropa ölkələrində ildən-ilə enerji mənbələrinə tələb və bu resursların idxalı artır.
“Bu gün Avropa ölkələri 90 faiz xam nefti, 60 faiz təbii qazı, 42 faiz kömürü idxal edir. Ümumilikdə bu ölkələr gündəlik 1 milyard avro dəyərində enerji resurslarını almağa məruz qalıblar və bu rəqəm ildən-ilə artır. 2035-ci ildə isə Avropada bu resursların idxalının xeyli artacağı gözlənilir”, - deyə nazir qeyd edib.
Polşa Respublikasının Baş nazirinin müavini, iqtisadiyyat naziri Yanuş Pexoçinski ölkəmizin Avropanın enerji təhlükəsizliyindəki rolundan danışaraq bildirib ki, bu gün Azərbaycan qitəni təbii qazla təmin etmək üçün olduqca əhəmiyyətli layihələr reallaşdırır və Polşa Azərbaycanın bu səylərini dəstəkləyir.
Türkiyənin enerji və təbii sərvətlər nazirinin müavini Səfa Sadiq Aytəkin isə Azərbaycan ilə Türkiyənin birgə reallaşdırdığı Trans-Anadolu qaz boru kəmərinin - TANAP-ın əhəmiyyətindən söhbət açıb. “TANAP “Cənub” qaz dəhlizinin ən önəmli hissəsidir və o digər layihələrinin həyata keçirilməsində önəmli rol oynayacaq”, - deyə nazir müavini qeyd edib.
Böyük Britaniyanın sabiq energetika naziri və Böyük Britaniya Baş nazirinin Azərbaycanda xarici ticarət elçisi Çarlz Hendri qeyd edib ki, Azərbaycan bu gün öz təbii ehtiyatlarının, coğrafi mövqeyinin üstünlüklərindən istifadə edərək çox cəsarətli addımlar atır və mühüm layihələr reallaşdırır.
SOCAR-ın prezidenti Rövnəq Abdullayev deyib ki, bu gün Azərbaycanda, eləcə də Xəzərin şərq sahillərində hasil olunan enerji daşıyıcıları beynəlxalq bazarlara diversifikasiya olunmuş ixrac boru kəmərləri vasitəsilə nəql edilir. “Eyni zamanda, Xəzərin Azərbaycan sektorunda yeni yataqlar, o cümlədən nəhəng “Şahdəniz” yatağı, “Əşrəfi”, “Qarabağ”, “Abşeron” və “Ümid” yataqları açılıb. Azərbaycan qarşıdakı uzun müddət üçün öz enerji təhlükəsizliyini tam təmin edib, region ölkələrinin enerji təhlükəsizliyində isə etibarlı təchizatçı kimi mühüm rol oynayıb”, - deyə R.Abdullayev qeyd edib.
bp-nin Azərbaycan, Gürcüstan və Türkiyə üzrə regional prezidenti Qordon Birrel isə son dövrlərdə “Azəri-Çıraq-Günəşli” (AÇG) yataqlar blokunda görülən işlərdən, həmçinin də Bakı-Tbilisi-Ceyhan əsas ixrac neft boru kəmərinin - (BTC) əhəmiyyətindən danışıb.
Trans-Adriatik qaz boru kəmərinin - (TAP) icraçı direktoru Yan Bradşou qeyd edib ki, İtaliya hökuməti kəmərin tikintisinə 2016-cı ilin mayından başlanılması haqqında qərar qəbul edib. Uzunluğu təxminən 870 kilometr olan bu boru kəməri Azərbaycanın “Şahdəniz-2” yatağından çıxarılan qazın Yunanıstan və Albaniya vasitəsilə, Adriatik dənizindən keçməklə İtaliyanın cənubuna, oradan da Qərbi Avropaya nəqlini nəzərdə tutur.
Sessiyada “Schlumberger” şirkətinin Rusiya və Mərkəzi Asiya üzrə prezidenti Sayqı Gökanın “İnteqrasiya - mürəkkəb strukturlu kollektorlarla bağlı həll variantı”, “Botaş” şirkətinin baş direktorunun müavini Nedim Özyolun “Botaş” layihələrinin icmalı və onları cari vəziyyəti”, “Bulgargaz” şirkətinin icraçı direktoru Petyo İvanovun “Bolqarıstanda təbii qaz nəqli üçün diversifikasiya imkanları” və “Eustream Slovak Gas” şirkətinin beynəlxalq inkişaf və xarici əlaqələr üzrə prezidenti Mirek Topolanekin “Şərq dairəsi - Xəzər qazı üçün əsas nəql istiqaməti” mövzularında məruzələri dinlənilib.
Konfrans işini “Neft və qaz sektorunda böyük sənaye layihələrinin maliyyəsi və inkişafının təmini” və “Xəzəryanı regiondan neft-qaz təchizatının diversifikasiyası” adlı sessiyalarla davam etdirib.

Paylaş:

Baxılıb: 1264 dəfə