"Qızıl Qran-Pri" turnirinin ilk günündə Azərbaycan güləşçiləri 8 medal qazanıb

Bakı:

24 °C

48 %

6 m/s

Əlaqə

AZ RU EN

Ana səhifə / İdman / "Qızıl Qran-Pri" turnirinin ilk günündə Azərbaycan güləşçiləri 8 medal qazanıb

"Qızıl Qran-Pri" turnirinin ilk günündə Azərbaycan güləşçiləri 8 medal qazanıb

17.07.2010 [11:09]

Dünən Heydər Əliyev adına İdman-Konsert Kompleksində sərbəst, yunan-Roma və qadın güləşi üzrə Azərbaycan xalqının ümummilli lideri Heydər Əliyevin xatirəsinə həsr olunmuş “Qızıl Qran-Pri” III Beynəlxalq turnirinin final mərhələsinin açılış mərasimi olub. Beynəlxalq turnirin təntənəli açılış mərasimindən öncə Beynəlxalq Güləş Federasiyasının (FİLA) prezidenti Rafael Martinetti, yarışın Təşkilat Komitəsinin sədri, Azərbaycan Güləş Federasiyasının (AGF) prezidenti Fazil Məmmədov və qonaqlar kompleksin foyesində ümummilli lider Heydər Əliyevin və Azərbaycan Respublikasının Prezidenti, Milli Olimpiya Komitəsinin Prezidenti İlham Əliyevin idmana göstərdiyi diqqət və dövlət qayğısından bəhs edən fotostendlə tanış olublar. Sonra iştirakçı komandaların paradı olub.
Gənclər və idman nazirinin müavini İsmayıl İsmayılov son illər Azərbaycanda idmanın sürətlə inkişaf etdiyini vurğulayıb. O, bildirib ki, ötənilki turnirdə 30 ölkədən 400-ə yaxın idmançı iştirak edirdisə, bu dəfə 35-dən çox ölkədən 450-dən artıq pəhləvan yarışacaq. Mərasimdə çıxış edən FİLA prezidenti Rafael Martinetti Heydər Əliyevin xatirəsinə həsr olunmuş “Qızıl Qran-Pri” beynəlxalq turnirinin FİLA-nın təqvim planında önəmli yer tutduğunu bildirib, yüksək təşkilatçılığa görə ölkə rəhbərliyinə və AGF-yə təşəkkür edib.
Ulu öndər Heydər Əliyevin xatirəsinə həsr olunmuş bu turnirin miqyasının ildən-ilə genişləndiyini vurğulayan AGF prezidenti Fazil Məmmədov idmançılarımızdan yüksək nəticələr gözləndiyini diqqətə çatdırıb. Azərbaycan Respublikasının Dövlət himni səsləndirildikdən sonra Milli Olimpiya Komitəsinin vitse-prezidenti çingiz Hüseynzadə Azərbaycan Prezidenti, MOK-un Prezidenti İlham Əliyevin idman karyerasına yekun vuran və məşqçilik fəaliyyətinə başlayan tanınmış idmançı, Olimpiya çempionu, ikiqat dünya çempionu Fərid Mansurova ünvanlamış məktubunu oxuyub.
FİLA-nın prezidenti Rafael Martinetti Fərid Mansurova qurumun fəxri medalını təqdim edib.
Fərid Mansurov Prezident İlham Əliyevə idmana göstərdiyi diqqət və qayğıya görə öz təşəkkürünü bildirib, məşqçilik fəaliyyəti dövründə ölkə güləşinə layiqli töhfələr verəcəyini deyib.
Sonra yarışlara start verilib. Yarışın ilk günü xalça üzərinə 122 sərbəst güləşçi çıxıb. Turnirdə Siciki Yumuto (55 kq, Yaponiya), Vasil Fedorişin (60 kq, Ukrayna), Cəbrayıl Həsənov (66 kq, Azərbaycan), Aleksandr Qostiyev (74 kq, Rusiya), Nauruz Temrezov (84 kq, Azərbaycan), Xetaq Qazyumov (96 kq, Azərbaycan) və Fatih çakıroğlu (120 kq, Türkiyə) fəxri kürsünün ən yüksək pilləsinə qalxıblar. Azərbaycan güləşçiləri Emin Əzizov (66 kq), Cəmaləddin Maqomedov (96 kq) gümüş, Camsulvara Camsulvarayev (74 kq), Şərif Şərifov (84 kq) və Əli İsayev (120 kq) isə bürünc medal qazanıblar. Komanda hesabında Azərbaycan yığması birinci olub.
“Qızıl Qran-Pri” turniri iyulun 18-də başa çatacaq.

Paylaş:

Baxılıb: 1395 dəfə