Bakı Avropanın idman mərkəzinə çevrilib

Bakı:

28 °C

57 %

5 m/s

Əlaqə

AZ RU EN

Ana səhifə / İdman / Bakı Avropanın idman mərkəzinə çevrilib

Bakı Avropanın idman mərkəzinə çevrilib

29.04.2010 [10:24]

Azərbaycanda müşahidə olunan iqtisadi inkişaf, digər sahələrdə olduğu kimi, idman sahəsində də özünü bariz şəkildə göstərir. ölkəmizdə idmanın inkişafı üçün gözəl şərait yaradılıb və Azərbaycan beynəlxalq idman aləmində artıq öz layiqli yerini tutub. Bütün bunlar Prezident İlham Əliyevin həyata keçirdiyi siyasətin uğurlu nəticələri kimi dəyərləndirilməlidir. Uşaq və gənclərin problemlərinin ardıcıl olaraq həll edilməsi, onların imkan və bacarıqlarını reallaşdırmaları üçün hərtərəfli və geniş şərait yaradılması dövlətimizin bu sahədəki fəaliyyətinin ən mühüm istiqamətlərindən birinə çevrilib. Bu gün ölkəmizdə 64 idman növü inkişaf edir. Respublikamızda 53 idman federasiyası, 66 idman təşkilatı, 60 idman klubu, 170 idman məktəbi fəaliyyət göstərir. Federasiyalardan 23-ü olimpiya, 36-sı qeyri-olimpiya idman növlərinin inkişafı üçün fəaliyyətini davam etdirir. Hazırda, Azərbaycanda 365489-dan çox şəxs idman və bədən tərbiyəsi ilə məşğul olur. Bu, əlbəttə, Azərbaycanda gedən proseslərin məntiqi nəticələri kimi dəyərləndirilməlidir.
Onu da qeyd etmək yerinə düşər ki, son illərdə Azərbaycanda müxtəlif idman növləri üzrə keçirilən Avropa, Dünya çempionatları silsilə xarakter daşıyır. Belə ki, hər il müxtəlif beynəlxalq yarışlar, bədii gimnastika, taekvando, güləş, boks, karate və digər bu kimi olimpiya növlərinə daxil olan idman yarışlarının, məhz Azərbaycanda keçirilməsi bir daha inkişaf etmiş bir dövlət olaraq, hər bir sahədə olduğu kimi, idmanda da ölkəmizə böyük imic qazandırıb. Elə bu günlərdə Bakıda keçirilən güləş üzrə Avropa çempionatını xatırlatmaq yerinə düşər. Avropanın ən güclü güləşçilərinin iştirakı ilə keçirilən yarışda Azərbaycan pəhləvanları parlaq qələbələr əldə etdilər. Eyni zamanda, yarışda iştirak edən ölkələrin nümayəndələri və Beynəlxalq Güləş Federasiyası Azərbaycanın yarışı yüksək səviyyədə təşkil etməsindən razılıqlarını ifadə etdilər. Avropanın idman paytaxtına çevrilən Bakıda keçirilən yarışlar bir-birini əvəzləməkdədir. Güləş üzrə qitə çempionatından qısa müddət sonra paytaxtımız daha bir mötəbər yarışa ev sahibliyi edir. Hazırda Bakıda yeniyetmələr və gənclər arasında boks üzrə Dünya çempionatı keçirilir. 96 ölkənin 500 idmançısının mübarizə apardığı yarış miqyasına və nüfuzuna görə fərqlənir. Burada idman amili ilə yanaşı, başqa məqamları da qeyd etmək lazımdır. Doğrudur, bu yarış ölkədə idmanın daha çox təbliği və inkişafına xidmət baxımından mühüm əhəmiyyət kəsb edir. Adətən, belə yarışlardan sonra həmin idman növünə yeniyetmələrin və uşaqların marağının artması müşahidə olunur. Bu, onu göstərir ki, Azərbaycanda idmanın inkişafı çox düşünülmüş qaydada davam etdirilir. Həm böyüklər arasında çıxış edən idmançılar öz peşəkarlığını artırırlar, həm də uğurlarımızın sayı ildən-ilə çoxalmaqdadır. Eyni zamanda, Azərbaycanda çox güclü və peşəkar gənc nəsil yetişir. Digər tərəfdən, bu yarışlar ölkəyə iqtisadi cəhətdən də xeyir gətirməklə yanaşı, Azərbaycanın təbliğatına da yardım etmiş olur. Belə ki, bu yarışlarla bağlı 95 ölkənin KİV orqanında yazılar dərc olunur və həmin yazılarda Bakı və Azərbaycanla bağlı məlumatların yer alması ölkənin təbliğatı baxımından böyük önəm kəsb edir. Artıq beynəlxalq qurumlar dünya və Avropa miqyaslı yarışların keçirilməsini Azərbaycana etibar etməkdən çəkinmirlər. Əksinə, seçim edərkən üstünlüyü ölkəmizə verirlər. çünki Azərbaycanın inkişaf etmiş dövlət olması və idmana böyük diqqət ayırması onlarda əminlik yaradıb ki, Bakıda keçirilən istənilən yarışın təşkilində heç bir problem yaşanmayacaq. Bu yarışların ölkələrdə keçirilməsinin iqtisadi səbəbləri də var. Məsələn, dünya və Avropa miqyaslı yarışları ölkələrə etibar edərkən həmin ölkələrdə idman qurğularının vəziyyəti, hava limanları, otellər şəbəkəsinin vəziyyəti ciddi şəkildə nəzərə alınır. İqtisadi artım tempinə görə, dünyanın lider dövləti olan Azərbaycanda həyata keçirilən infrastruktur layihələri, yeni olimpiya-idman komplekslərinin inşası, yol-nəqliyyat təsərrüfatının yüksək səviyyədə qurulması, yeni, müasir otellərin inşası ölkəmizi bu seçim mərhələsində bir addım önə çıxarır. Bu uğurların əldə edilməsində ölkəmizdəki idman təşkilatlarının vahid komanda şəklində fəaliyyət göstərməsi də mühüm rol oynayır. Dövlət başçısı, Milli Olimpiya Komitəsinin Prezidenti İlham Əliyev bu məsələni belə xarakterizə edib: “İdman Azərbaycanda ənənəvi olaraq diqqət mərkəzindədir. Həm televiziyalar və həm də kütləvi informasiya vasitələri idman yarışlarını geniş işıqlandırırlar. Eyni zamanda, Azərbaycanda idman həyatımızın ayrılmaz hissəsidir, ictimai həyatın önəmli amilidir. Əminəm ki, gələcək illərdə idmana, idmançılara daim diqqət və qayğı göstəriləcəkdir. Həm dövlət tərəfindən, həm də idman cəmiyyətləri, klublar, federasiyalar tərəfindən. Azərbaycanda bütün idman qurumları öz fəaliyyətlərini əlaqəli şəkildə qurublar və hesab edirəm ki, uğurlarımızın əsas səbəbi məhz ondadır. çünki biz beynəlxalq aləmdə baş verən hadisələri izləyirik və bilirik ki, bir çox ölkələrdə olimpiya komitələri ilə nazirliklər, federasiyalar arasında ixtilaflar, ziddiyyətlər, qarşıdurma vardır. Azərbaycanda isə idmana cavabdehlik daşıyan bütün qurumlar - həm Milli Olimpiya Komitəsi, Gənclər və İdman Nazirliyi, federasiyalar, klublar, idman cəmiyyətləri vahid komanda şəklində fəaliyyət göstərirlər. Bu, bizim uğurlarımızı şərtləndirir”.
İdmana cavabdeh qurumların qarşılıqlı anlaşma şəraitində fəaliyyət göstərməsi, birgə əməkdaşlığı həm idman uğurlarının, həm də bu sahəyə dövlət qayğısının ilbəil artmasına kömək edir.
Anar MİRİYEV

Paylaş:

Baxılıb: 1561 dəfə