Azərbaycanın ərazi bütövlüyü dünya birliyi tərəfindən tanınır

Bakı:

17 °C

67 %

7 m/s

Əlaqə

AZ RU EN

Ana səhifə / Gündəm / Azərbaycanın ərazi bütövlüyü dünya birliyi tərəfindən tanınır

Azərbaycanın ərazi bütövlüyü dünya birliyi tərəfindən tanınır

10.08.2011 [10:38]

Prezident İlham Əliyev: Biz çalışırıq ki, məsələ tezliklə beynəlxalq hüquq normaları əsasında öz həllini tapsın və Azərbaycanın beynəlxalq birlik tərəfindən tanınan ərazi bütövlüyü bərpa edilsin
Ermənistanın Azərbaycana qarşı yürütdüyü işğalçılıq siyasəti nəticəsində 20 ildən artıqdır ki, Azərbaycanın ərazi bütövlüyü pozulub, torpaqlarımız işğal olunub. Beynəlxalq hüquq normalarını, insan hüquqları kodekslərini pozan, müstəqil dövlətin sərhədlərini zorla dəyişdirməyə cəhd edən Ermənistan ötən illər ərzində münaqişənin tənzimlənməsi prosesində qeyri-konstruktiv mövqe sərgiləməklə, işğalçılıq siyasətini davam etdirdiyini bütün dünyaya nümayiş etdirib. Son dövrlərdə problemin nizamlanması istiqamətində danışıqlar dinamikliyi ilə seçilsə də, rəsmi İrəvan dəfələrlə imitativ manevrlərlə bu danışıqları pozmağa çalışıb və bölgədəki müvəqqəti status-kvonun saxlanmasına cəhd göstərib. Bununla yanaşı, Azərbaycanın nizamlanma prosesindəki birmənalı mövqeyini bilə-bilə xarici ölkələri, ən əsası isə münaqişənin tənzimlənməsində vasitəçi rolunu oynayan ATƏT-in Minsk qrupunu aldatmağa çalışan Ermənistan, rəsmi şəkildə sülhün bərqərarına maneçilik törətdiyini nümayiş etdirir.
Azərbaycan dövlətinin apardığı təmkinli və davamlı xarici siyasət kursu, göstərilən fəaliyyət münaqişənin tənzimlənməsi prosesində artıq öz nəticəsini göstərməkdədir. Ermənilərin illərlə yaratdıqları informasiya blokadasını yararaq dünyaya əsl həqiqətləri çatdıran Azərbaycan dövləti artıq beynəlxalq təşkilatların və böyük dövlətlərin məsələyə münasibətinin ədalət prinsipi əsasında formalaşmasına nail olub. Bu isə münaqişənin Azərbaycanın ərazi bütövlüyü çərçivəsində həll olunmasına təkan verən amillərdəndir.
Vurğulamaq lazımdır ki, Ermənistan-Azərbaycan, Dağlıq Qarabağ münaqişəsi ölkəmizin qarşısında duran yeganə böyük problemdir. 26 İyun-Azərbaycan Respublikası Silahlı Qüvvələr Günündə keçirilən hərbi paradda çıxış edən Azərbaycan Prezidenti İlham Əliyev torpaqlarımızın uzun illərdir ki, işğal altında olduğunu, o cümlədən, azərbaycanlılara qarşı etnik təmizləmə siyasəti aparıldığını vurğulayıb. Dövlət başçısı bildirib ki, bir milyondan artıq azərbaycanlı öz doğma torpağında qaçqın-köçkün vəziyyətinə düşüb: “Torpaqlarımızın 20 faizi işğal altındadır. Əfsuslar olsun ki, bu ədalətsizlik hələ də davam edir. Halbuki, Azərbaycanın ərazi bütövlüyü dünya birliyi tərəfindən tanınır və son zamanlar verilən yeni bəyanatlar, mötəbər beynəlxalq təşkilatlar tərəfindən verilən qərarlar, qəbul edilmiş qətnamələr bir daha Azərbaycanın ərazi bütövlüyünü dəstəkləyir. Buna baxmayaraq, məsələ öz həllini hələ ki, tapmır. Birləşmiş Millətlər Təşkilatı Təhlükəsizlik Şurasının - dünyanın ən mötəbər qurumunun 4 qətnaməsi, digər beynəlxalq təşkilatların oxşar qərar və qətnamələri icra edilmir”.
Münaqişənin tənzimlənməsi prosesində Azərbaycanın mövqeyi birmənalıdır-Azərbaycanın ərazi bütövlüyü bərpa edilməlidir. Dövlət başçısı öz çıxışında qəti surətdə bildirib ki, Azərbaycanın ərazi bütövlüyü danışıqlar mövzusu deyil, olmayıbdır və olmayacaqdır: “Biz çalışırıq ki, məsələ tezliklə beynəlxalq hüquq normaları əsasında öz həllini tapsın və Azərbaycanın beynəlxalq birlik tərəfindən tanınan ərazi bütövlüyü bərpa edilsin. Bunun üçün biz diplomatik səylərimizi davam etdirəcəyik. Bizim işimiz haqq işidir. Biz heç bir başqa ölkənin torpağını zəbt etməmişik, heç bir başqa ölkənin torpağında bizim gözümüz yoxdur, baxmayaraq ki, bugünkü Ermənistan tarixi Azərbaycan torpaqlarında yaranıbdır. Dağlıq Qarabağ əzəli Azərbaycan torpağıdır, tarixi Azərbaycan torpağıdır. Bu, həmişə belə olub, bu gün də belədir. Sadəcə, müvəqqəti olaraq işğal altına düşübdür. Ancaq bu işğal çox çəkə bilməz. Mən tam əminəm ki, Azərbaycanın ərazi bütövlüyü istənilən yolla bərpa ediləcəkdir”.
Münaqişənin tənzimlənməsi prosesində sülh danışıqlarına sadiqlik nümayiş etdirən Azərbaycan danışıq xatirinə danışıq aparmaq niyyətində deyil. İqtisadi cəhətdən yerləşdiyi Cənubi Qafqaz regionunun lider dövlətinə çevrilən Azərbaycanın istər siyasi, istər iqtisadi, istərsə də hərbi gücü Ermənistandan qat-qat çoxdur. Bu isə ölkəmizin öz ərazi bütövluyünü hərbi yolla bərpa etməsinə imkan verir. Prezident İlham Əliyev də çıxışında ölkəmizin müharibə şəraitində yaşadığını önə çəkib. Silahlı Qüvvələrin Ali Baş Komandanı bildirib ki, müharibə hələ bitməyib, müharibənin birinci mərhələsi başa çatıbdır və müharibə şəraitində yaşayan ölkə, ilk növbədə, ordu quruculuğuna diqqət göstərməlidir: “Bu gün Azərbaycanın dövlət büdcəsində hərbi təyinatlı xərclər birinci yerdədir və torpaqlarımız işğaldan azad olunmayana qədər bu, belə olacaqdır. Sülh müqaviləsi bağlanarsa, işğala son qoyulandan sonra əlbəttə ki, bu qədər xərcə bəlkə də ehtiyac olmayacaqdır. Ancaq eyni zamanda, ondan sonra da istənilən şəraitdə ordumuz daim yüksək hazırlıq nümayiş etdirməlidir. Ordumuzun maddi-texniki bazasının möhkəmləndirilməsi və modernləşdirilməsi üçün biz bütün imkanlardan istifadə edəcəyik”.
Pərviz SADAYOÄžLU

Paylaş:

Baxılıb: 996 dəfə