Milli siyasətin humanizm nümunəsi milli inkişafı və həmrəyliyi təmin edən faktor kimi

Bakı:

24 °C

61 %

2 m/s

Əlaqə

AZ RU EN

Ana səhifə / Gündəm / Milli siyasətin humanizm nümunəsi milli inkişafı və həmrəyliyi təmin edən faktor kimi

Milli siyasətin humanizm nümunəsi milli inkişafı və həmrəyliyi təmin edən faktor kimi

04.06.2011 [09:22]

Prezident İlham Əliyev tərəfindən sayca 49-cu əfv Sərəncamının imzalanması rol və statusundan asılı olmayaraq sosial münasibətlər sistemində iştirak edəcək cəmiyyətə yararlı fərdlərin yetişdirilməsi, onların reabilitasiyası və reinteqrasiyası işinə fundamental töhfələr bəxş edəcək
Azərbaycan insan hüquq və azadlıqlarının yüksək səviyyədə təmin olunduğu demokratik ölkələrdəndir. Məlum olduğu kimi, ölkəmizdə vətəndaş cəmiyyətinin formalaşdırılması və hüquqi dövlətin mütləq komponentlərinin bərqərar olunması siyasətinin əsası Ulu öndər Heydər Əliyev tərəfindən qoyulub. Belə ki, ümummilli lider Heydər Əliyevin həyata keçirdiyi demokratikləşmə siyasəti özündə məhz humanist prinsipləri ehtiva edib.
Təsadüfi deyil ki, Azərbaycanda insan hüquq və azadlıqlarının yüksək səviyyədə təmin olunması, hər bir fərdə ictimai-siyasi proseslərdə və sosial münasibətlər sistemində iştirak etmək üçün əlverişli şəraitin yaradılması dövlət quruculuğu prosesinin humanist səciyyəli prioritet istiqamətlərindən birini təşkil edir. Bu isə nəticə etibarilə çoxşaxəli humanizm siyasətinin həyata keçirilməsini şərtləndirən başlıca amillərdəndir. Sözügedən çoxşaxəli humanizm siyasətinin əsas məqsədlərindən birini də rol və statusundan asılı olmayaraq sosial münasibətlər sistemində iştirak edəcək cəmiyyətə yararlı fərdlərin yetişdirilməsi və onların reabilitasiyası təşkil edir. Bunun üçün dövlət tərəfindən səmərəlilik dərəcəsinə görə olduqca yüksək səviyyədə dəyərləndirilən ən müxtəlif addımlar atılıb və hazırda da atılmaqdadır. Bunlardan birini də azadlıqdan məhrumetmə və azadlığın məhdudlaşdırılması cəzasına məhkum edilmiş şəxslərin əfv edilməsi ilə bağlı dövlət başçısı tərəfindən imzalanan əfv haqqında sərəncamlar və amnistiya haqqında fərmanlar təşkil edir.
Yuxarıda da qeyd etdiyimiz kimi, ölkəmizdə təcəssümünü tapmış bu cür humanizm siyasətinin əsası Ulu öndər Heydər Əliyev tərəfindən qoyulub. Hələ 1995-ci ildə əfv və amnistiya təsisatlarının bərpa edilməsi, Ombudsman institutunun yaradılması, bunun ardınca cəmiyyətin ən müxtəlif təbəqələrini əhatə edən əfv sərəncamlarının və amnistiya haqqında fərmanların verilməsi qısa zaman kəsiyində cəmiyyətə yararlı, qanunların aliliyi prinsipini tərəddüdsüz qəbul edən vətəndaşların reabilitasiyasına və reinteqrasiyasına fundamental töhfələr verdi. Bu isə ədalətli və sağlam təməllərə əsaslanan cəmiyyət quruculuğu işini sürətləndirən misilsiz amil kimi dəyərləndirilməlidir.
Bu gün isə özündə yüksək dəyərləri və normaları ehtiva edən humanizm siyasəti Prezident İlham Əliyev tərəfindən ən yüksək səviyyədə həyata keçirilməkdədir. Son olaraq bir neçə gün öncə Prezident İlham Əliyev tərəfindən sayca 49-cu əfv Sərəncamının imzalanması bəhs edilən humanizm siyasətinin növbəti nümunəsi qismində çıxış etdi. Həmin sərəncama əsasən, azadlıqdan məhrumetmə cəzasına məhkum edilmiş 70 nəfər cəzanın çəkilməmiş hissəsindən azad edilib, azadlıqdan məhrumetmə cəzasına məhkum edilmiş iki nəfərin cəzasının çəkilməmiş hissəsi yarıyadək azaldılıb, azadlığın məhdudlaşdırılması cəzasına məhkum edilmiş 10 şəxs isə cəzanın çəkilməmiş hissəsindən, cərimə cəzasına məhkum edilmiş 6 şəxs müvafiq cəzadan, islah işləri cəzasına məhkum edilmiş iki şəxs isə cəzalarının çəkilməmiş hissələrindən azad ediliblər.
Bir sözlə, Prezident İlham Əliyevin imzaladığı əfv Sərəncamı humanizm siyasətinin növbəti təntənəsini təşkil etməkdədir. Bu, öz növbəsində dövlətin öz vətəndaşlarına verdiyi dəyəri əks etdirən bariz nümunə kimi dəyərləndirilməlidir.
Nurlan QƏLƏNDƏRLİ

Paylaş:

Baxılıb: 1085 dəfə