Beynəlxalq aləm Dağlıq Qarabağ münaqişəsi ilə bağlı qəti addımlar atmalıdır

Bakı:

13 °C

94 %

4 m/s

Əlaqə

AZ RU EN

Ana səhifə / Gündəm / Beynəlxalq aləm Dağlıq Qarabağ münaqişəsi ilə bağlı qəti addımlar atmalıdır

Beynəlxalq aləm Dağlıq Qarabağ münaqişəsi ilə bağlı qəti addımlar atmalıdır

01.12.2010 [09:41]

Prezident İlham Əliyev: ümid edirik ki, bu məsələ ilə məşğul olan qurumlar, tərəflər, vasitəçilər nəhayət, öz kəskin sözünü deyəcəklər
Ermənistan-Azərbaycan, Dağlıq Qarabağ münaqişəsinin həllinə nail olmaq üçün göstərilən səylər təəssüf ki, hələlik heç bir nəticə vermir. Azərbaycan tərəfinin istəyi odur ki, münaqişə beynəlxalq hüquq normaları çərçivəsində sülh yolu ilə həll olunsun. Azərbaycandan fərqli olaraq Ermənistan rəhbərliyinin bu vaxta qədər konfliktə münasibətdə sərgilədiyi mövqe isə status-kvonu mümkün qədər çox saxlamağa hesablanıb. Ermənistan, eyni zamanda, dünya ictimaiyyətinin gözündə sülhə tərəfdar ölkə kimi də görünməyə çalışır. Buna görə də, işğalçı ölkə rəhbərliyi istəməsə belə, Dağlıq Qarabağ münaqişəsinin müzakirə olunduğu ikitərəfli və çoxtərəfli görüşlərdə iştirak etməli olur.
Məlumdur ki, münaqişənin həlli ilə birbaşa məşğul olan ATƏT-in Minsk qrupu həmsədrlərinin, Rusiya prezidentinin təşəbbüsü və digər beynəlxalq tədbirlər çərçivəsində Azərbaycanın və Ermənistanın dövlət başçıları, həmçinin, xarici işlər nazirləri arasında çoxsaylı görüşlər keçirilib. Atəşkəsin imzalanmasından indiyədək danışıqlarda qazanılan çoxillik təcrübə isə onu göstərir ki, məsələ yalnız görüşlərin keçirilməsi, problemin müzakirə olunması ilə bitmir. Münaqişənin aradan qalxması üçün konkret addımlar atılmalıdır. Doğrudur, beynəlxalq aləm Dağlıq Qarabağ münaqişəsinə hüquqi qiymət verib. BMT Təhlükəsizlik Şurası, İKT, ATƏT, Avropa Şurası, Avropa Parlamentinin çoxsaylı qərar və qətnamələrində Azərbaycan torpaqlarının işğal faktı təsdiqlənib, Ermənistan qoşunlarının zəbt olunmuş ərazilərdən çıxarılmasını, məcburi köçkünlərin yurd-yuvasına qayıtmasını tələb edilib. Lakin göründüyü kimi, işğalçı Ermənistan bu qərarların heç birinə məhəl qoymur. Bu ölkənin danışıqlarda iştirakı yalnız imitasiya xarakteri daşıyır. Ona görə də, hələlik münaqişənin həlli yönündə hansısa nəticədən danışmaq mümkün deyil.
Yeri gəlmişkən, 4-cü çağırış Milli Məclisin ilk iclasında iştirak edən Prezident İlham Əliyev bildirib ki, uzun illərdir danışıqlar aparılmasına, Minsk qrupunun 18 ildir ki, fəaliyyət göstərməsinə baxmayaraq, heç bir nəticə əldə olunmayıb. Dövlət başçısının sözlərinə görə, Azərbaycanın istəyi odur ki, beynəlxalq təşkilatların qərarları icra olunsun: “Bu qərarlar və qətnamələr ona görə qəbul edilib ki, onlar icra olunmalıdır. Əgər onların icra mexanizmi yoxdursa, Ermənistan bu beynəlxalq hüquq normalarına məhəl qoymursa və beynəlxalq birlik öz növbəsində buna qarşı heç bir tədbir görmürsə, onda məsələ çətinləşə bilər”.
Bir sözlə görünən odur, əsas problem qərarların icra mexanizmi ilə bağlıdır. çünki beynəlxalq təşkilatların çağırışlarına baxmayaraq, işğalçı ölkə irəliyə doğru heç bir addım atmaq istəmir. Buna görə də, işğalçı ölkə beynəlxalq birlikdən layiq olduğu münasibəti görməli, qoşunlarını zəbt etdiyi Azərbaycan ərazilərindən çıxarması üçün Ermənistana qarşı ciddi siyasi, iqtisadi, hərbi sanksiyalar tətbiq olunmalıdır. çünki XXI əsrdə bir ölkənin başqa bir dövlətin ərazisini illərlə işğalda saxlaması dünyada münaqişələrin aradan qaldırılması, ədalətin, dövlətlərin suveren hüquqlarının bərpası funksiyasını üzərinə götürən qlobal miqyaslı təşkilatların və həmin qurumların aparıcı qüvvəsi olan güclü dövlətlərin nüfuzuna xələl gətirir. Bu səbəbdən, beynəlxalq birlik Ermənistan-Azərbaycan, Dağlıq Qarabağ münaqişəsinə münasibətdə daha qətiyyətli mövqe nümayiş etdirməli, Azərbaycanın pozulan hüquqlarının bərpası üçün ciddi səy göstərməlidir. Dövlət başçısının sözlərindən də məlum olur ki, Azərbaycan bu məsələdə dünya ictimaiyyətindən daha adekvat münasibət gözləyir: “ümid edirik ki, bu məsələ ilə məşğul olan qurumlar, tərəflər, vasitəçilər nəhayət, öz kəskin sözünü deyəcəklər. Bunun vaxtı çoxdan çatıbdır”.
Bu baxımdan, Qazaxıstanda keçirilən ATƏT-in növbəti sammiti bütövlükdə Cənubi Qafqazda sülh və sabitliyin bərqərar olmasına əngəl törədən Ermənistanın təcavüzkar siyasətinə son qoymaq üçün əlverişli imkandır.
Hülya MƏMMƏDLİ

Paylaş:

Baxılıb: 1058 dəfə