2 ildə 4,4 milyard manat...

Bakı:

28 °C

48 %

11 m/s

Əlaqə

AZ RU EN

Ana səhifə / Gündəm / 2 ildə 4,4 milyard manat...

2 ildə 4,4 milyard manat...

06.05.2022 [09:56]

İşğaldan azad edilmiş ərazilərdə təxirəsalınmaz işlərin görülməsi üçün əlavə vəsait ayrılacaq

Nurlan QƏLƏNDƏRLİ

Prezident İlham Əliyev Şərqi Zəngəzur iqtisadi rayonuna daxil olan Zəngilan rayonunda xüsusi nümayəndənin təyin olunması ilə bağlı qəbulda çıxışı zamanı çox mühüm məsələlərə toxundu, vacib mesajlar verdi. Dövlət başçısı erməni vandalizmindən, işğaldan azad edilmiş ərazilərdə həyata keçirilən bərpa-quruculuq işlərindən, Böyük Qayıdışın reallaşdırılmasından, Zəngəzur dəhlizinin açılması ilə əlaqədar görülən işlərdən və digər bir sıra məsələlərdən bəhs etdi.

Zəngilan rayonunun böyük dağıntılara məruz qaldığını vurğulayan dövlət başçısı söylədi ki, bu, bir daha erməni vandalizminin eybəcər sifətini bütün dünyaya göstərir. Dünya, eyni zamanda, başqa bir reallığa şahidlik edir. Bu, işğaldan azad edilmiş ərazilərə həyatın qaytarılması - bərpa və quruculuq işlərinin uğurla davam etdirilməsidir. Yəni beynəlxalq ictimaiyyət erməni vandalizmini də görür, Azərbaycan xalqının qurduğunu, yaratdığını və yaşatdığını da. Zəngilan rayonunda tarixi-dini abidələrin bərpası işləri artıq başlanıb. Heydər Əliyev Fondunun maliyyə dəstəyi ilə Zəngilan şəhər məscidi əsaslı şəkildə təmir olunur. Bununla yanaşı, Böyük Qayıdışın qısa müddətdə və yüksək səviyyədə həyata keçirilməsi üçün zəruri infrastruktur yaradılır. Prezident İlham Əliyevin qeyd etdiyi kimi, “Zəngilan rayonu birinci rayondur ki, artıq keçmiş məcburi köçkünlər yaxın gələcəkdə oraya qayıdacaqlar”. Birinci pilot layihə Zəngilanın Ağalı kəndində həyata keçirilir. Ümumiyyətlə, işğaldan azad edilmiş ərazilərin qurulması - Qarabağın və Şərqi Zəngəzurun cənnət məkana çevrilməsi üçün zəruri resurslar səfərbər olunub. Keçən il və cari il bu məqsədlər üçün hər il üzrə 2,2 milyard manat vəsait nəzərdə tutulub, yəni toplam 4,4 milyard manat. Təxirəsalınmaz işlərin görülməsi üçün əlavə vəsait ayrılacaq.

Zəngilan rayonunda icra edilən layihələr sırasında nəqliyyat infrastrukturunun yaradılması mühüm əhəmiyyətə malikdir. Burada Zəngəzur dəhlizinin tərkib hissəsi olan nəqliyyat infrastrukturu xüsusi yer tutur. Dövlət başçısının qeyd etdiyi kimi, bu il Zəngilan Beynəlxalq Hava Limanı istismara veriləcək. Bununla yanaşı, dörd və altı zolaqdan ibarət olan avtomobil yolu sürətlə inşa olunur. Zəngilan rayonunun ərazisindən keçən həm dəmir yolu, həm də avtomobil yolu nəinki Azərbaycanın əsas hissəsini Naxçıvan Muxtar Respublikası ilə birləşdirəcək, eyni zamanda, beynəlxalq yükdaşımaları üçün yeni beynəlxalq bir yol olacaq. Prezidentin diqqətə çatdırdığı kimi, Zəngilandan Qubadlıya və Qubadlıdan Laçına bir çox zolaqdan ibarət yol çəkilir. Bu yol Şərqi Zəngəzur iqtisadi rayonundakı rayonlar arasında birləşməni təmin edəcək. Bununla yanaşı, Horadizdən Ağbəndə gedən dəmir yolunun inşası sürətlə aparılır. Bu dəmir yolu həm vətəndaşlar üçün, həm də beynəlxalq yükgöndərənlər üçün çox əlverişli infrastruktur olacaq. Bütövlükdə, görülən işlər, rayonun coğrafi mövqeyi, beynəlxalq bazarlara yaxın olması Zəngilanın beynəlxalq nəqliyyat-logistika mərkəzi kimi inkişafını təmin edəcək.

Böyük Qayıdışı, Zəngəzur dəhlizinin reallaşdırılmasını “siyasi romantizm” adlandıranlar var idi. Elə bu gün də “korun tutduğunu buraxmaması” prinsipi ilə eyni “yanaşma”nı davam etdirirlər. Reallıqlar isə onların geniş dünyadakı dar dünyagörüşünün sərhədlərini çoxdan aşıb, dezinformasiya silahını zərərsizləşdirib - yalanlarını ifşa edib. Yəni artıq sülhün və əməkdaşlığın birgə addımlayacağı Zəngəzur dəhlizinin inşasına start verilib, Böyük Qayıdış təntənəli Zəfər yürüşünün bir halqasına çevrilib.

Ümumiyyətlə, Azərbaycan bu günə qədər Şərq-Qərb, Şimal-Cənub, Şimal-Qərb nəqliyyat dəhlizləri kimi regional kommunikasiya layihələrinin icrasında çox fəal rol oynayıb, ölkəmizin təşəbbüsü ilə əhəmiyyətli addımlar atılıb. İndiki mərhələdə Azərbaycan Avrasiyada geniş bir coğrafiyanı əhatə edən, Asiya ilə Avropanı birləşdirən Şərq-Qərb dəhlizinin tərkib hissəsi olacaq Zəngəzur nəqliyyat dəhlizi üzərində çalışır. Bu layihənin gerçəkləşdirilməsi ilə regionda əməkdaşlığa xidmət edən inteqrasiya prosesi güclənəcək. Bu dəhliz, eyni zamanda, ölkəmizin Avrasiyanın nəqliyyat və logistika mərkəzi kimi geostrateji mövqeyini möhkəmləndirəcək, tranzit imkanlarını genişləndirəcək, Azərbaycan mühüm siyasi-iqtisadi dividendlər qazanacaq. Başqa sözlə, perspektivə dair aydın strateji baxışları olan Azərbaycanın yaratdığı bu reallıqlar təkcə respublikamız üçün deyil, bütövlükdə region dövlətləri və dünya siyasətinin aparıcı subyektləri üçün də mühüm dividendlər vəd edir. Bu məsələlərə toxunan Prezident İlham Əliyev “Biz həm Azərbaycanın əsas hissəsini Naxçıvan Muxtar Respublikası ilə Zəngəzur dəhlizi vasitəsilə birləşdirəcəyik, tam yeni nəqliyyat dəhlizi açılacaq. Nəzərə alsaq ki, son vaxtlar Azərbaycana Xəzər dənizinin Şərq hissəsindən çoxlu müraciətlər daxil olub. Azərbaycan ərazisindən yük göndərmək istəyənlərin həm sayı, həm də yüklərin həcmi artır, əlbəttə, Zəngəzur dəhlizi bizim üçün və qonşu dövlətlər üçün əlavə imkanlar yaradacaq”, - deyə vurğulayıb. Beləliklə, qalib Azərbaycan strateji hədəflərinə doğru addım-addım irəliləyir.

Paylaş:

Baxılıb: 1047 dəfə