Antiterror əməliyyatları hər zaman aktualdır

Bakı:

26 °C

49 %

0 m/s

Əlaqə

AZ RU EN

Ana səhifə / Gündəm / Antiterror əməliyyatları hər zaman aktualdır

Antiterror əməliyyatları hər zaman aktualdır

21.04.2022 [09:55]

Azərbaycan bu hüququndan istifadə edə bilər

Pərviz SADAYOĞLU

Cənubi Qafqaz regionun gələcək inkişafı ilə bağlı bütün perspektivlər regionda formalaşacaq dayanıqlı sülhdən asılıdır. Brüssel danışıqlarının ardından səslənən müsbət fikirlər isə sülhün təmininə olan inamı artır. Yeni mərhələdə Azərbaycan ilə Ermənistan arasında olan problemlərin həllinə böyük ümid yaranıb. Təbii ki, Azərbaycan torpaqlarında olan separatçı dəstələr də unudulmamalıdır. Vətən müharibəsindən sonrakı dövrdə onların bir hissəsi zərərsizləşdirilsə də, tör-töküntüləri hələ də Qarabağda qalmaqdadır. Nəzərə alsaq ki, dünyanın əksər dövlətləri sərhədlərinin təhlükəsizliyi ilə bağlı antiterror əməliyyatları keçirirlər, Azərbaycanın da bu müstəsna hüququndan istifadə etməsi istisna oluna bilməz. İndiki halda bu əməliyyatlar nə qədər aktualdır? Məsələn, bir neçə gün öncə Türkiyədə başlanan genişmiqyaslı “Pəncə-kilit” əməliyyatlarının analojiyasını Qarabağda görə bilərikmi?

Bununla bağlı fikirlərini bölüşən politoloq İlqar Vəlizadə bildirib ki, Vətən müharibəsindən ötən dövrdə işğaldan azad edilmiş regionlarımızda antiterror əməliyyatlarının keçirilməsi üçün zəmin yaradılıb, infrastruktur formalaşdırılıb. Həmin regionda Azərbaycanın xüsusi təyinatlıları, komanda qüvvələri fəaliyyət göstərir, mövqelərimiz möhkəmləndirilir. Mühüm strateji yüksəkliklər Azərbaycan hərbçilərinin nəzarətindədir. Bu istiqamətdə işlər davam etdirilir: “Azərbaycanın əsas məqsədi bu əməliyyata zərurət yaranacağı halda onu effektiv şəkildə həyata keçirməkdən ibarətdir. Yəni qısa zamanda, itki vermədən həmin silahlı dəstələr zərərsizləşdirilməlidir. Digər məsələ isə, siyasi effektivlik məsələsidir. Hazırda Ermənistanla sülh müqaviləsinin imzalanması ilə bağlı aktiv danışıqlar aparılır. Danışıqların əsas predmetlərindən biri isə sərhədlərin delimitasiyası və demarkasiyasıdır. Düşünürəm ki, bu həssas məqamda proses sürətləndirməli və müəyyən nəticələr əldə olunmalıdır. İndi antiterror əməliyyatlarına başlamaq isə prosesi ləngidə bilər”.

Qarabağdakı silahlı dəstələrin öz ömrünü başa vurduğunu söyləyən İ.Vəizadənin fikrincə, qalanlar sadəcə tör-töküntülərdir. İndiki halda siyasi müstəvidə gedən mühüm müsbət prosesləri sürətləndirmək daha vacibdir və Azərbaycan buna köklənməlidir. “İndi belə bir əməliyyatın aparılması siyasi prosesə əngəllər törədə bilər. Bundan isə separatçılar, erməni diasporu, hətta bəzi xarici qüvvələr də istifadə edə bilərlər. Antiterror əməliyyatları hər zaman aktualdır, sadəcə indiki dönəm üçün əlverişli deyil. Biz hər şeyə hazır olmalıyıq. Separatçı dəstələr də bilməlidir ki, Azərbaycan hər an bu əməliyyata başlaya bilər. Amma bu günün prioritetləri başqadır”, - deyən İlqar Vəlizadə onu da əlavə edib ki, separatçıların zərərsizləşdirilməsi Ermənistan ilə sərhədlərin müəyyənləşdirilməsi prosesinə aid olunmamalıdır.

Onlar birmənalı şəkildə həmin regiondan çıxarılmalıdırlar: “Araik Arutunyan, Vitali Balasanyan kimi cinayətkarlar isə hüquq qarşısında, məhkəmə qarşısında cavab verməlidirlər. Onlar cinayətkardır və əlləri azərbaycanlıların qanına batıb, məsuliyyətlərini daşımalıdırlar. Bu, prinsipial məsələdir. Dünyada bununla bağlı presedentlər var. Bütün terrorçular, qatillər məsuliyyətə cəlb olunmalıdır. Separatçı dəstələrin torpaqlarımızı hansı formada tərk edəcəyi ilə bağlı yəqin ki, müzakirələr aparılacaq. Onlar fiziki cəhətdən məhv edilmək istəmirlərsə, bu torpaqlardan çıxmalıdırlar. Cinayətkarlara güzəştdən söhbət gedə bilməz”.

Paylaş:

Baxılıb: 1339 dəfə