Azərbaycan yaxın beşillikdə yüksəkgəlirli ölkələr qrupuna daxil olacaq

Bakı:

26 °C

53 %

9 m/s

Əlaqə

AZ RU EN

Ana səhifə / Gündəm / Azərbaycan yaxın beşillikdə yüksəkgəlirli ölkələr qrupuna daxil olacaq

Azərbaycan yaxın beşillikdə yüksəkgəlirli ölkələr qrupuna daxil olacaq

25.08.2010 [10:28]

Beynəlxalq maliyyə institutlarının proqnozlarına görə, ölkəmizin valyuta sərvətləri qarşıdakı 5 ildə əhəmiyyətli dərəcədə artacaq
Dünya iqtisadi böhranı ilə əlaqədar böhran meyilləri ilə üzləşən neft bazarında ötən ilin sonlarından başlayaraq canlanmanın müşahidə olunması yanacaq ixrac edən dövlətlərin iqtisadiyyatında artım dinamikasının sürətlənməsinə səbəb olub. Beynəlxalq Valyuta Fondunun (BVF) ekspertlərinin fikrincə, dünya iqtisadiyyatı yaşadığı ağır böhrandan sonra bərpa olunmağa başlayıb və bu tendensiya daha çox neft-qaz tədarükçüsü olan ölkələrin milli iqtisadiyyatında özünü göstərməkdədir. Bu ölkələrin valyuta gəlirlərinin həcmi yenidən əhəmiyyətli dərəcədə artmağa başlayıb. BVF hesab edir ki, neftin qiyməti bundan sonrakı dövrdə 80 dollardan aşağı düşməyəcək, əksinə, qiymətlərin 100 dollara çatması gözləniləndir. Bu isə neft nəql edən dövlətlərin böyük həcmdə gəlir əldə etməsi və valyuta ehtiyatlarını artırması üçün əla fürsət deməkdir.
BVF-nin baş iqtisadçısı Olivye Blanşar bəyan edib ki, 2011-2013-cü illərdə neft birjalarında aktivlik yüksələcək və qiymət artımının davamlı olması neft istehalçılarının valyuta rezervlərini möhkəmləndirməsinə etibarlı zəmin yaradacaq. Nüfuzlu beynəlxalq maliyyə institutunun proqnozlarına görə, bölgədə zəngin neft ölkələrindən olan Azərbaycanın valyuta sərvətləri qarşıdakı 5 ildə əhəmiyyətli dərəcədə artaraq 100 milyard dolları ötəcək. Bu faktor respublikamızda milli məhsul istehsalının bir neçə dəfə artmasına implus verəcək və adambaşına düşən gəlirlərin həcmi çoxalacaq. Qarşıdakı illərdə üDM-in artım tempi yenidən ikirəqəmli göstəricilərlə müşayiət oluna bilər. Həmin dövrdə adambaşına düşən gəlirlər 250 faizdən də çox artacaq. Milli gəlirin dünya ölkələri üzrə bölgüsünə görə, Azərbaycanın mövqeyi əhəmiyyətli dərəcədə yüksələcək. Bu isə Azərbaycanın Avropa İttifaqı ölkələri, Şimali Amerika və Asiyanın inkişaf etmiş dövlətləri, həmçinin, Yaxın Şərqin əsas neft hasilatçıları, xüsusilə də, OPEK ölkələri ilə eyni səviyyədə olmasına imkan verəcək.
Azərbaycan yaxın beşillikdə yüksəkgəlirli ölkələr qrupuna daxil olacaq və respublikamız regionun ən inkişaf etmiş dövlətinə çevriləcək. Digər maliyyə institutları da ölkəmizdə inkişaf meyillərinin yüksələcəyini və ümumi daxili məhsulun (üDM) artım dinamikasının sürətlənəcəyini bəyan edir. Neft gəlirləri ilə bərabər, qeyri-neft bölməsindən əldə olunan gəlirlərin prioritet istiqamətlər üzrə səmərəli istifadə edilməsi davamlı inkişafı daha da stimullaşdıracaq. Məsələn, dövlət xarici sərmayələrlə bərabər, daxili investisiyaların axınını sürətləndirməklə qeyri-neft sektorunun inkişafına dəstəyi gücləndirəcək. Nəqliyyat, tikinti, rabitə və informasiya texnologiyaları, xidmət, turizm, emal sektoru qeyri-neft sektorunun potensial sahələri kimi inkişaf etməkdədir və bu sahələr innovativ iqtisadiyyata keçidin təmin olunmasında başlıca vasitə olacaq.
Artıq ölkəmizdə neftdən kənar sahələrin artım dinamikasının daha sürətlə inkişaf etməsi müşahidə olunur və 2011-ci ildə qeyri-neft sektorunda bu tendensiyanın dərinləşəcəyi istisna deyil. Qeyri-neft sektorunun milli iqtisadiyyatın lokomotivinə çevrilməsi üçün əsaslı zəmin yaranıb və bu sektorun inkişaf perspektivləri həddindən artıq ürəkaçandır. Bu tendensiya ölkəmizin davamlı və dayanıqlı iqtisadi inkişafının təmin edilməsi istiqamətində görülən işlərin geniş xarakter almasına səbəb olacaq. Regional inkişaf və dövlət investisiya proqramlarının icrası bölgələrdə ən iri layihələrin həyata keçirilməsi üçün mükəmməl sənəd kimi iqtisadi siyasətin məzmununa yeni çalarlar əlavə edəcək. Bu mərhələdə investisiyaların həcmi 15-16 milyard manat səviyyəsində nəzərdə tutulur və həmin məbləğin 12,5 milyard manatını daxili investisiyalar təşkil edəcək. İnvestisiya portfelinin 80 faizinin yerli sərmayələrin payına düşməsi bir daha hökumətin yerli resurslar hesabına regionların simasını dəyişmək niyyətlərini şərtləndirir.
Milli iqtisadiyyatın rəqabət qabiliyyətini təmin etmək üçün liberallaşdırma tədbirlərinin, struktur islahatlarının davam etdirilməsi ölkəmizin uzunmüddətli perspektiv inkişafına böyük yol açmış olacaq. Respublikamızın milli və iqtisadi təhlükəsizliyinə təminat verən strateji layihələrin həyata keçirilməsi isə Azərbaycanın bölgədə ən güclü dövlət olmasını təmin edəcək.
Proqnozlara görə, 2013-2015-ci illərdə Azərbaycanın maliyyə dayaqlarının daha da möhkəmlənməsi və tədiyyə qabiliyyətinin artması ölkəmizin xarici sərmayədar kimi nüfuzunun da artmasına imkan verəcək. Azərbaycanın xalis xarici investor kimi çıxış etməsi ölkəmizin xaricə yatırdığı investisiyaların həcmində özünü göstərəcək. Belə ki, respublikamız bölgədə əsas investorlardan biri kimi neft-qaz, neft-kimya və sənaye sektorlarına yüksək həcmdə və davamlı sərmayələr yönəldən dövlət kimi diqqəti cəlb edəcək.
Azərbaycan iqtisadiyyatının tamamilə yeni inkişaf mərhələsinə daxil olması, maliyyə resurslarının artması, iqtisadiyyatın yüksək templə artımı nəticəsində “hərarətlənməsi”, makroiqtisadi sabitliyin həssas xarakter alması, təbii ki, mükəmməl iqtisadi siyasətin həyata keçirilməsi nəticəsində mümkün olacaq. Azərbaycan Prezidenti İlham Əliyevin həyata keçirdiyi inkişaf və tərəqqi strategiyası ölkəmizin milli təhlükəsizliyinin və uzunmüddətli inkişafının təmin olunmasına dərin əsaslar yaradacaq.
Elbrus CƏFƏRLİ

Paylaş:

Baxılıb: 1283 dəfə