Bakının Azadlıq və Ziya Bünyadov prospektlərinin kəsişməsindəki tunelin açılış mərasimi olub

Bakı:

24 °C

54 %

6 m/s

Əlaqə

AZ RU EN

Ana səhifə / Gündəm / Bakının Azadlıq və Ziya Bünyadov prospektlərinin kəsişməsindəki tunelin açılış mərasimi olub

Bakının Azadlıq və Ziya Bünyadov prospektlərinin kəsişməsindəki tunelin açılış mərasimi olub

12.12.2009 [11:12]

Azərbaycan Respublikasının Prezidenti İlham Əliyev mərasimdə iştirak edib
Dünən Azərbaycan Respublikasının Prezidenti İlham Əliyev Bakı şəhərində Azadlıq və Ziya Bünyadov prospektlərinin kəsişməsində müxtəlif səviyyəli yol qovşağına daxil olan tunelin açılış mərasimində iştirak edib. Dövlətimizin başçısını inşaatçılar və nəqliyyat işçiləri hərarətlə qarşılayıblar.
Nəqliyyat naziri Ziya Məmmədov Prezident İlham Əliyevə məlumat verib ki, ölkədə aparılan geniş iqtisadi quruculuq tədbirləri sırasına nəqliyyat infrastrukturları da daxildir. Dövlətimizin başçısı tərəfindən imzalanmış sərəncamlara əsasən hazırda Bakı şəhərində nəqliyyat infrastrukturunun təkmilləşdirilməsi layihəsi uğurla həyata keçirilir. Bu gün (dünən - red.) istifadəyə verilən tunel isə Ziya Bünyadov və Azadlıq prospektlərinin kəsişməsində inşa edilən yol qovşağının ikinci mərhələsinə daxildir. Dövlətimizin başçısı tuneldə inşaat işlərinin gedişini əks etdirən fotoşəkillərə baxıb, layihənin baş planı ilə tanış olub. Bildirilib ki, nəqliyyatın hərəkətinin sıxlığı ilə seçilən bu ərazidə Prezident İlham Əliyevin 2006-cı il 1 fevral tarixli Sərəncamına əsasən inşa olunan yol qovşağı tıxacların aradan qaldırılmasında mühüm rol oynayacaq.
Prezident İlham Əliyevə məlumat verilib ki, müxtəlif səviyyəli yol qovşağının birinci mərhələsi uzunluğu 300 metrə yaxın olan körpünün 2008-ci ilin sentyabrında istifadəyə verilməsi ilə başa çatıb. İkinci mərhələdə tikilmiş tunel isə ikimərtəbəlidir. Birinci mərtəbə dördzolaqlı ikitərəfli avtomobil yolundan ibarətdir. İkinci mərtəbə isə müxtəlif məqsədlər üçün nəzərdə tutulubdur. Tunelin örtülü hissəsi 310 metr, giriş və çıxışları ilə birlikdə ümumi uzunluğu 616, eni isə 20 metrdir.
Qeyd olunub ki, inşaat işləri zamanı 130 min kubmetr torpaq, 32 min kubmetr beton işləri görülüb, 4,2 min kvadratmetr üzlük plitə işlədilib. Tikinti zamanı 3,2 min ton asfalt döşənib, 3,5 min kvadratmetr ərazi yaşıllaşdırılıb və abadlaşdırılıb. Yol qovşağında piyadalar üçün 5 keçid inşa olunub.
Prezident İlham Əliyev rəmzi açılışı bildirən lenti kəsib, görülmüş işlərlə tanış olub.
Məlumat verilib ki, tunelin hündürlüyü 5,5 metrdir. Bu, ən iri ölçülü nəqliyyat vasitələrinin də buradan rahat keçməsinə imkan yaradır. Yol ötürücüsündə avtomat rejimdə işləyən müasir işıqlandırma, havalandırma, videomüşahidə sistemləri və yağış sularının kənara vurulması üçün nasos qurğusu quraşdırılıb.
Prezident İlham Əliyev ikinci mərtəbədə müxtəlif məqsədlər üçün nəzərdə tutulmuş 6 min kvadratmetrlik sahədə tikinti işlərinin gedişi ilə də tanış olub. Məlumat verilib ki, buraya piyadalar üçün üç yeraltı, bir yerüstü keçidi və qovşağın yan yolları daxildir. Yol qovşağının bu hissəsinin gələn ilin birinci yarısında istifadəyə verilməsi nəzərdə tutulur.
Dövlətimizin başçısı inşaatçıları təbrik edərək, tapşırıq və tövsiyələrini verib.
Mərasim başa çatandan sonra tuneldə nəqliyyatın hərəkəti başlanıb.

Paylaş:

Baxılıb: 1334 dəfə