Müdafiə Sənayesi Nazirliyinin "Radioquraşdırma" zavodunun əsaslı yenidənqurmadan sonra açılışı olub

Bakı:

22 °C

53 %

2 m/s

AZ RU EN

Ana səhifə / Gündəm / Müdafiə Sənayesi Nazirliyinin "Radioquraşdırma" zavodunun əsaslı yenidənqurmadan sonra açılışı olub

Müdafiə Sənayesi Nazirliyinin "Radioquraşdırma" zavodunun əsaslı yenidənqurmadan sonra açılışı olub

17.03.2009 [13:08]

Prezident İlham Əliyev mərasimdə iştirak edib
Azərbaycan Prezidenti İlham Əliyev martın 16-da Müdafiə Sənayesi Nazirliyinin “Cihaz” İstehsalat Birliyinin əsaslı şəkildə yenidən qurulmuş “Radioquraşdırma” zavodunun açılışında iştirak edib.
Müdafiə Sənayesi Nazirliyi yaranana qədər zavodun cəmi bir neçə sexi qismən fəaliyyət göstərir, təsadüfi sifarişlər əsasında ildə 60-70 min manatlıq məhsul buraxılırdı. 2006-cı ilə qədər burada işçilərin sayı tamamilə azalıb, müəssisə tam bərbad vəziyyətə düşüb. Dövlət başçısının tapşırığına əsasən Müdafiə Sənayesi Nazirliyinin yaradılmasından sonra bu müəssisədə də köklü dəyişikliklər baş verib. Qısa müddət ərzində o, ölkənin qabaqcıl sənaye müəssisələrindən birinə çevrilib.
“Radioquraşdırma” zavodunun açılışına gələn Prezident İlham Əliyev əvvəlcə ulu öndər Heydər Əliyevin müəssisənin həyətində ucaldılan büstünün önünə gül dəstəsi qoyub.
Müdafiə sənayesi naziri Yavər Camalov Prezident İlham Əliyevə bu müəssisə və ümumilikdə respublikanın müdafiə sənayesində 2006-cı ildən bəri görülən işlər barədə geniş məlumat verib. O bildirib ki, vaxtilə zavodun bərbad vəziyyətdə olan ərazisində də geniş abadlıq və yaşıllaşdırma işləri görülüb. İnzibati binalar da əsaslı şəkildə təmir olunaraq, səmərəli fəaliyyət üçün hər cür şərait yaradılıb. Müəssisədə ulu öndər Heydər Əliyevin həyat və fəaliyyətindən bəhs edən fotoguşə yaradılıb, 250 yerlik akt salonu da yenidən qurularaq müasir görkəm alıb.
Dövlətimizin başçısı açılışı bildirən qırmızı lenti kəsib və zavodla tanış olub. Azərbaycan Prezidenti, Ali baş komandan İlham Əliyevin xüsusi diqqəti sayəsində qısa müddətdə ölkənin müdafiə sənayesinin formalaşdırılması məqsədi ilə mühüm tədbirlər həyata keçirilib. ötən müddətdə nazirliyin tabeliyindəki müəssisələrdə 16 istehsal sahəsi istismara verilib, ən müasir tələblərə cavab verən müdafiə təyinatlı məhsulların kütləvi istehsalına başlanıb. Dövlət başçısının tapşırıqlarına əsasən, 2009-cu il üçün investisiya proqramı çərçivəsində 17 obyekt üzrə tikinti və yenidənqurma işlərinə başlanması nəzərdə tutulub.
Bildirilib ki, 2007-2008-ci illərdə dövlət müdafiə sifarişi proqramında nəzərdə tutulan işlər başa çatdırılıb və buraxılan məhsullar silahlanmaya qəbul edilib. 2009-cu ildə bu işlərin proqramı daha genişdir. Atıcı silahların, yaxın məsafəli döyüş vasitələrinin, artilleriya silahlarının kiçik seriyalarla istehsalı da mənimsənilib və proqrama uyğun istehsal edilib. Bundan başqa, böyük miqdarda müxtəlif çaplı döyüş sursatları istehsal edilərək sifarişçilərə çatdırılıb. Müdafiə sənayesi müəssisələrində mühəndis texnikası, döyüş və təlim sursatları, mühəndis xidməti və kəşfiyyat vasitələrinin istehsalı da təmin edilib. 2008-ci ildə sifarişçilərə təhvil verilən müdafiə təyinatlı məhsulların həcmi 2005-ci illə müqayisədə 6,1 dəfə artıb. Cari ildə isə 435 adda müdafiə təyinatlı məhsulların və onların ehtiyat hissələrinin istehsalı nəzərdə tutulub. Əvvəlki illərə nisbətən istehsalın həcmi əhəmiyyətli dərəcədə artırılacaq. Nazirliyin müəssisələrində buraxılmağa başlanacaq 7 növ müdafiə təyinatlı məhsulun istehsal sahəsinin yaradılması üçün texnoloji avadanlığın alınıb quraşdırılması 2009-cu ildə başa çatdırılacaq. Cari ildə müdafiə sənayesi müəssisələrində mülki məhsulların istehsalını da genişləndirmək üçün silsilə tədbirlər nəzərdə tutulub.

Paylaş:

Baxılıb: 1664 dəfə