Astara əhalisi təklif edilən əlavə və dəyişikliklərə səs verəcək

Bakı:

25 °C

54 %

3 m/s

Əlaqə

AZ RU EN

Ana səhifə / Gündəm / Astara əhalisi təklif edilən əlavə və dəyişikliklərə səs verəcək

Astara əhalisi təklif edilən əlavə və dəyişikliklərə səs verəcək

04.03.2009 [16:55]

“Yeni Azərbaycan” təşviqat qrupu astaralılarla görüşüb
Referendum keçirilməsi ərəfəsində olan ölkəmizdə vətəndaşların yaşayış səviyyəsinin yüksəldilməsi və onların layiqli həyat səviyyəsinin təmin olunmasına, eyni zamanda, hüquq və azadlıqlarının genişləndirilməsinə yönəlik əlavə və dəyişikliklərlə bağlı maarifləndirmə işləri davam etdirilir.
Dünən “Yeni Azərbaycan” təşviqat qrupu Astara rayon sakinləri ilə görüşlər keçirib. Rayonun Süparibağ, Səngərədi, Şüvi kənd seçki məntəqələrində baş tutan görüşləri “Yeni Azərbaycan” təşviqat qrupu Astara rayon şöbəsinin sədri Natiq İbadov açaraq vətəndaşlara referendum və onun keçirilməsini şərtləndirən amillərdən danışıb. O, xatırladıb ki, müstəqil Azərbaycanın Konstitusiyası ulu öndər Heydər Əliyevin rəhbərliyi ilə qəbul edilib: “O zaman Azərbaycan müstəqillik yoluna yenicə qədəm qoyduğundan indiki kimi güclü və inkişaf etmiş bir dövlət deyildi. Artıq nail olduğumuz inkişaf, beynəlxalq müstəvidə tutduğumuz mövqe ölkəmizin qarşısına yeni tələblər qoyur ki, bu da Konstitusiyaya yeni dəyişikliklər etməyin vacibliyini ortaya çıxarır”.
“Yeni Azərbaycan” təşviqat qrupunun səlahiyyətli nümayəndəsi, millət vəkili Hadı Rəcəbli öncə bütün astaralıları martın 18-də hamılıqla səsvermə məntəqələrinə gəlməyə çağırıb. H.Rəcəbli deyib ki, təklif edilən əlavə və dəyişikliklər insan hüquq və azadlıqlarının daha səmərəli qorunmasına, demokratiyanın, yerli özünüidarənin inkişafına xidmət edir: “Konstitusiyamıza əlavə və dəyişikliklərin edilməsi zərurətdən yaranan bir məsələdir. Bütün ölkələrdə Konstitusiyalara zaman-zaman əlavə və dəyişikliklər edilir. 1992-ci ildən bəri dünyanın 36 ölkəsində Konstitusiyaya bir neçə dəfə dəyişikliklər edilib. Bu da təbiidir. çünki konstitusiyalar, qanunlar mütləq həqiqət kimi qəbul olunmur, inkişaf olduqca daha da təkmilləşir, yeniləşir. Yəni, bu və ya digər qanunların dəyişməsi zamanın tələbinə uyğun olaraq baş verir. 1995-ci ildə qəbul etdiyimiz Konstitusiyada zamanın tələbinə uyğun olaraq müəyyən dəyişikliklər edilib. İlk belə dəyişikliklər 2002-ci ilin avqust ayında keçirilən ümumxalq səsverməsi zamanı olub. Bu gün Konstitusiyamıza yenidən əlavə və dəyişikliklər edilməsi zərurəti yaranıb. Bəllidir ki, bu dəyişikliklərin təşəbbüskarı da Yeni Azərbaycan Partiyasıdır. Əslində, partiyamız xalqdan gələn istək və arzunu ifadə edib. Təklif olunan dəyişikliklər isə, təbii ki, insanların həyat səviyyəsinin daha da yaxşılaşdırılmasına, demokratik inkişaf prosesinin sürətləndirilməsinə, insan hüquqlarının qorunmasına xidmət edir”.
çıxışının sonunda “Yeni Azərbaycan” təşviqat qrupunun səlahiyyətli nümayəndəsi bütün Azərbaycan xalqını ölkəmizin inkişafını daha da sürətləndirəcək Referendum Aktına səs verməyə çağırıb.
Rəvanə Ağayeva:
- Konstitusiyada təklif olunan əlavə və dəyişikliklər yalnız bizə xidmət edir: insanların hüquq və azadlıqlarını artırır, yaşayış şəraitini yaxşılaşdırır. Bu baxımdan mən xalqımızı bu əlavə və dəyişikliklərə səs verməyə çağırıram.
Humay Hüseynova:
- 18 mart günü referenduma-daha da işıqlı gələcəyimizə səs verəcəyik.
Bayram Hacıyev:
- İnsan yaşadıqca həyatda yaxşı və pisi bir-birindən ayıra bilir. Xalqımızın firavan yaşamasına, dövlətimizin yüksəlməsinə xidmət edən əlavə və dəyişiklikləri dəstəkləyirəm. çünki mən bu xalqın oğluyam.
Sakitə Əliyeva:
- Həmişə inkişaf etmiş ölkələrin qanunları və əhalisinin həyat səviyyəsi haqqında ağızdolusu danışırıq. Biz sevinməliyik. Və mən öz ailəm, övladlarım adından deyirəm ki, referendum gününü böyük sevinclə gözləyirəm.
Qürbət İbrahimov:
- Dövlətimizin inkişafına xidmət edən əlavə və dəyişikliklərə 18 martda səs verəcəyəm və hamını buna çağırıram.
Nailə Əliyeva:
- Mən belə bir ölkədə yaşamağımla fəxr edirəm! Həm də qəzetiniz vasitəsilə bütün yaşıdlarıma səslənmək istəyirəm: gəlin, bu vətənin layiqli övladı olmağı bacaraq!
KƏBUTƏR

Paylaş:

Baxılıb: 1760 dəfə