Ermənistanda seçkisonrası siyasi çəkişmələr davam edir

Bakı:

23 °C

83 %

5 m/s

Əlaqə

AZ RU EN

Ana səhifə / Dünya / Ermənistanda seçkisonrası siyasi çəkişmələr davam edir

Ermənistanda seçkisonrası siyasi çəkişmələr davam edir

25.06.2021 [09:29]

Ermənistanda keçirilən növbədənkənar parlament seçkilərindən sonra bu ölkədə kütləvi etirazlar nisbətən səngisə də, siyasi gərginlik və qarşıdurma davam edir. Belə ki, seçkidə qanun pozuntuları olması barədə rəsmi müraciətlər əsasında bəzi seçki məntəqələrində səslərin yenidən sayılması, məğlub olsa da, parlamentdə mandat qazanan siyasi qüvvələrin hüquqi prosedura əsasən mübarizəni davam etdirməsi vəziyyəti daha da gərginləşdirir. Ermənistan mediası yazır ki, seçkilərin nəticələri ilə razılaşmayan qüvvələrin konstitusiya məhkəməsinə (KM) müraciətləri yeni parlamentin fəaliyyətə başlamasını ləngidə və Paşinyanın hökuməti formalaşdırmasına mane ola bilər.
Qeyd edək ki, seçkidə qələbə qazansa belə, “Vətəndaş müqaviləsi” partiyasının Ermənistanın yeni hökumətini qura bilməyəcəyi barədə də fikirlər səsləndirilir. Buna baxmayaraq, “Aysor.am” Ermənistan hökumətinin mətbuat xidmətinə istinadən xəbər verir ki, baş nazir vəzifəsini icra edən N.Paşinyan artıq bir sıra siyasi qüvvələrin liderləri ilə siyasi məsləhətləşmələr aparır. Belə ki, bu günlərdə Paşinyanın təşəbbüsü ilə “Maariflənən Ermənistan” partiyasının lideri Edmon Marukyan, “Respublika” partiyasının lideri Aram Sarkisyan, “Vətəndaş qərarı” partiyasının nümayəndələri və başqaları ilə görüşlər baş tutub. “Hraparak” qəzeti yazır ki, səsvermənin nəticələrinə dair protokolların mürəkkəbi qurumadan Paşinyanın parlamentə düşə bilməyən partiyaların nümayəndələri ilə siyasi məsləhətləşmələrə başlaması onlara vəzifələr təklif edilməsi ilə əlaqədar ola bilər.
Bu arada, Paşinyan siyasi böhranın başa çatdığını elan etsə də, “Ermənistan” bloku, “Şərəfim var” bloku, “Milli demokratik alyans” və digərləri seçkilərin nəticələrindən şikayət edəcəklərini vurğulayıblar. Seçkilərdən şikayət prosedurunun necə işləyəcəyinə gəlincə, “Hraparak” qəzeti yazır ki, Ermənistan MSK seçkilərdən 7 gün sonra, yəni 27 iyunda seçkilərin yekun nəticələrini elan edəcək. Yalnız bundan sonra seçkilərin nəticələri haqqında qərara KM səviyyəsində rəsmi etiraz ünvanlana bilər. “Konstitusiya məhkəməsi haqqında” qanunda isə bildirilir ki, KM müvafiq müraciəti qəbul etdikdən sonra 15 gündən gec olmayaraq qərar qəbul edə bilər: “Yəni hər hansı müxalifət qüvvəsi KM-ə müraciət etmək qərarına gəlsə, yeni parlamentin formalaşdırılması prosesi təxirə salınacaq və parlamentin ilk iclası 5 iyulda deyil, daha sonra baş tutacaq”.
Göründüyü kimi, məğlub ölkədə növbədənkənar parlament seçkiləri baş tutsa da, seçkinin nəticələrinə dair etirazlar Paşinyanın tezliklə yeni hökumət qurmasını ləngidə bilər.
Qaşqay ZİYƏDDİNOĞLU

Paylaş:

Baxılıb: 985 dəfə