Ermənistanda siyasi böhran: ziddiyyətlər dərinləşir, qarşıdurma güclənir

Bakı:

18 °C

52 %

1 m/s

Əlaqə

AZ RU EN

Ana səhifə / Dünya / Ermənistanda siyasi böhran: ziddiyyətlər dərinləşir, qarşıdurma güclənir

Ermənistanda siyasi böhran: ziddiyyətlər dərinləşir, qarşıdurma güclənir

20.03.2021 [08:56]

Məlum olduğu kimi, Ermənistanın baş naziri Nikol Paşinyan 20 iyun tarixində bu ölkədə növbədənkənar parlament seçkiləri keçiriləcəyini elan edib. Yerli KİV yazır ki, bununla da Ermənistanda siyasi böhran yeni mərhələyə qədəm qoyub. Digər tərəfdən, müxalifət seçki tarixinin elan edilməsi ilə bütün məsələlərin həll olunmadığını, hakimiyyətə qarşı mübarizənin davam etdiyini bildirib.

Qeyd edək ki, növbədənkənar seçkilərin keçirilməsi ilə bağlı parlament müxalifətinin Paşinyanla razılığa gəlməsi birmənalı qarşılanmır. Ekspertlərin fikrincə, Ermənistanda növbədənkənar seçkilər baş nazirin istefası və parlamentin 3 dəfə baş naziri seçə bilmədiyi halda, qanunverici orqan buraxıldıqdan sonra keçirilə bilər. “Aysor.am”ın yazdığına görə, konstitusiya hüququ üzrə ekspert Gövhər Meloyan deyib ki, Ermənistanın əsas qanununda təsbit edilən müddəaya görə, növbədənkənar seçkilər prezident tərəfindən təyin edilir. Bununla belə, ölkədə ötən ilin sentyabrından tətbiq edilən hərbi vəziyyət ləğv edilməlidir. Belə çıxır ki, məğlub ölkədə martın 18-də baş verən sadəcə parlamentdə təmsil olunan 3 siyasi qüvvənin 3 ay sonra növbədənkənar seçkilərin keçirilməsi ilə bağlı razılaşmasının elan edilməsidir. Parlamentdən kənarda olan qüvvələrin məsələyə reaksiyasına gəlincə, sabiq prezident Levon Ter-Petrosyanın rəhbəri olduğu “Erməni milli konqresi” qəti şəkildə seçkilərin əleyhinə çıxış edib. Bu günlərdə Paşinyana istefa verərək ölkəni tərk etməyi təklif edən eks-prezident L.Ter-Petrosyan onun biabırçı məğlubiyyətə görə daşıdığı məsuliyyətdən yayınmaq və hakimiyyətini saxlamaq məqsədi güddüyünü deyib.

Yeri gəlmişkən, “news.am” yazır ki, “Vətənin xilası naminə hərəkat”ın baş nazir postuna namizədi Vazgen Manukyan isə deyib ki, hakimiyyətin seçki keçirməsinə icazə verilməməlidir. “Paşinyanın açıqlaması hələ onun seçki keçirə biləcəyi demək deyil. Seçkilərin keçirilməsinin qarşısını almaq üçün bütün vasitələrə əl atmaq lazımdır. Paşinyanın hakimiyyəti dövründə seçkilərin keçirilməsi Ermənistan üçün fəlakətdir”, -deyə o bildirib. “Panorama.am”ın yazdığına görə, politoloq Stepan Danielyan isə məsələ ilə bağlı “Mənə elə gəlir ki, iyun seçkiləri blefdir və əslində, eks-prezident Ter-Petrosyanın təklif etdiyi ssenarisi həyata keçirilir: komanda üzvündən biri baş nazir seçiləcək və Paşinyan xaricə qaçacaq”, - deyib.

Beləliklə, Paşinyanın növbədənkənar seçki gedişi məğlub Ermənistanda siyasi böhran fonunda ziddiyyətlərin dərinləşməsini, qarşıdurmanın güclənməsini şərtləndirir. Bütövlükdə isə, ekspertlər Paşinyanın seçkiyə getməyə razı olmasını müxtəlif cür qiymətləndirirlər. Bəziləri bunu blef, digərləri öz hakimiyyətini möhkəmləndirmək cəhdi hesab edirlər.

Qaşqay ZİYƏDDİNOĞLU

Paylaş:

Baxılıb: 820 dəfə