Moskva metrosunda terror aktı...

Bakı:

24 °C

60 %

7 m/s

Əlaqə

AZ RU EN

Ana səhifə / Dünya / Moskva metrosunda terror aktı...

Moskva metrosunda terror aktı...

30.03.2010 [08:15]

Partlayışlardan sonra çeçen ekstremistlərinə yaxın saytlardan biri hadisəni çeçen silahlılarının törətdiyini bildirib
Dünən səhər tezdən Moskva metrosunun “Lubyanka” və “Park kulturı” stansiyalarında partlayış baş verib. APA-nın İTAR-TASS agentliyinə istinadən verdiyi məlumata görə, ilk partlayış Moskva vaxtı ilə saat 07.56-da “Lubyanka”da, “Komsomolskaya” stansiyasına doğru hərəkət edən qatarın ikinci vaqonunda baş verib. İkinci partlayış isə saat 08.39-da “Park kulturı”da olub. Bundan sonra Moskva milisi gücləndirilmiş iş rejiminə keçib. Moskva şəhər Daxili İşlər İdarəsinin rəisi Viktor Biryukov terrorla əlaqədar “Vulkan” planı hazırlayıb həyata keçirdiklərini, metronun bütün stansiyalarının nəzarətə götürüldüyünü bəyan edib. Paytaxtda pasport rejimi gücləndirilib. Rusiya Prokurorluğu yanında İstintaq Komitəsinin rəsmi nümayəndəsi Vladimir Markin fakt üzrə Cinayət Məcəlləsinin 205-ci (terrorçuluq) maddəsi ilə cinayət işi qaldırıldığını bildirib: “Hazırda hadisə yerində müstəntiqlər və kriminalistlər çalışır. Partlayıcı qurğunun növü və gücü aydınlaşdırılır”.
Federal Təhlükəsizlik Xidmətinin direktoru Aleksandr Bortnikov terror barədə prezident Dmitri Medvedevin məlumatlandırıldığını açıqlayıb. Rusiya KİV-i sonradan Moskva metropoliteninin “Sülh prospekti” stansiyasında üçüncü partlayışın baş verdiyi barədə xəbər yayıb. Metroda üçüncü partlayışın baş verdiyi haqda xəbərlər isə təkzib edilib.
Moskva Şəhər prokuroru Yuri Semin açıqlama verib ki, partlayış terrorçu-kamikadze tərəfindən törədilib. Rusiya Federal Təhlükəsizlik Xidmətinin rəhbəri Aleksandr Bortnikov bildirib ki, Moskva metropoliteninin stansiyalarında partlayışlar qeksogen maddəsindən hazırlanmış partlayıcı qurğu vasitəsilə törədilib. “Lubyanka” stansiyasında törədilən partlayışın gücü 4 kiloqram trotil ekvivalentində olub. “Park Kulturı” stansiyasında isə partlayış törətmək üçün 1,5-2 kiloqram trotil ekvivalentində partlayıcı istifadə olunub. Terrorçular partlayışın gücünü artırmaq üçün bolt və kəsilmiş armatur hissələrindən istifadə ediblər.
Moskva metropoliteninin “Lubyanka” və “Park Kulturı” stansiyalarında baş verən partlayışlarda 35 nəfər ölüb, 62 nəfər yaralanıb. Bu barədə Rusiya Fövqəladə Hallar Nazirliyinin mətbuat xidmətindən məlumat verilib. Mətbuat xidmətindən bildiriblər ki, “Lubyanka” stansiyasında 23 nəfər ölüb, “Park Kulturı” stansiyasında isə ölənlərin sayı 12 nəfərdir. Xilasetmə işlərinə ümumilikdə 641 nəfər cəlb olunub, onlardan 326 nəfəri FHN əməkdaşlarıdır. Bundan başqa FHN yaralıların xəstəxanalara çatdırılması üçün əraziyə 2 vertolyot göndərib. Rusiya Federasiyasının baş prokuroru Yuri çayka isə Moskva metrosundakı terror aktı nəticəsində 37 nəfərin öldüyünü söyləyib.
Partlayışlardan sonra çeçen ekstremistlərinə yaxın saytlardan biri Moskva metrosundakı partlayışları çeçen silahlılarının törətdiyini yazıb. Bu barədə CNN telekanalı xəbər yayıb. Konkret hansı saytdan söhbət getdiyi açıqlanmayıb. Terrora görə məsuliyyəti hansı qruplaşmanın öz üzərinə götürdüyü də bəlli deyil. Rusiya Federal Təhlükəsizlik Xidmətinin (FSB)direktoru Aleksandr Bortnikov terroru Şimali Qafqaza aidiyyəti olan qruplaşmaların törədə biləcəyi versiyasını təsdiqləyib. A.Bortnikov prezident yanında keçirilən fövqəladə müşavirədə bildirib ki, metroda Şimali Qafqaza bağlılığı olan iki qadın kamikadzenin cəsədi tapılıb. Rusiya hüquq-mühafizə orqanlarındakı ekspert-analitik də deyib ki, metrodakı terror aksiyasının silahlı qrupların son günlər öldürülmüş məşhur liderləri Anzor Astemirov, Salambek Əhmədov, Əbu Xalid və Səid Buryatskinin qisasını almaq məqsədilə törədildiyi istisna deyil. Federal Təhlükəsizlik Xidmətinin sabiq direktoru Nikolay Kovalyov da bu versiyanı təsdiqləyib. Onun sözlərinə görə, qadın kamikadzelər S.Buryatskinin qohumları ola bilər. N.Kovalyov əlavə edib ki, əsas partlayışın məhz FTX (FSB) binasının yerləşdiyi “Lubyanka”da törədilməsini terrorçuların Rusiya xüsusi xidmət orqanlarının uğurlu əməliyyatlarına cavabı kimi qiymətləndirmək olar.

Paylaş:

Baxılıb: 1468 dəfə