“Samsung Electronics” şirkətini genişmiqyaslı tətil təhlükəsi gözləyir

Bakı:

23 °C

56 %

1 m/s

Əlaqə

AZ RU EN

Ana səhifə / Dünya / “Samsung Electronics” şirkətini genişmiqyaslı tətil təhlükəsi gözləyir

“Samsung Electronics” şirkətini genişmiqyaslı tətil təhlükəsi gözləyir

21.05.2026 [15:46]

Bonus ödənişləri ilə bağlı danışıqların nəticəsiz başa çatmasından sonra “Samsung Electronics” şirkətinin həmkarlar ittifaqı 48 min əməkdaşın iştirakı ilə cümə axşamı tətil keçirməyi planlaşdırır. Qiymətləndirmələrə görə, genişmiqyaslı tətil Cənubi Koreya iqtisadiyyatına və dünya üzrə yarımkeçiricilərin tədarükünə zərbə vura bilər.

AZƏRTAC xəbər verir ki, həmkarlar ittifaqı “Samsung”dan illik əməkhaqqının 50 faizi həcmində müəyyən edilmiş bonus məhdudiyyətinin ləğv edilməsini, illik əməliyyat mənfəətinin 15 faizinin bonuslara ayrılmasını və bu dəyişikliklərin bir ildən artıq müddət üçün rəsmiləşdirilməsini tələb edib.

Həmkarlar ittifaqının rəhbəri Çxve Sın Ho bildirib ki, ittifaq hökumət tərəfindən təyin olunmuş vasitəçinin təqdim etdiyi yekun təklifi qəbul edib. Lakin rəhbərlik mübahisəli məsələlərdən biri ilə razılaşmadığı üçün 18 günlük tətil keçiriləcək.

“Mən ictimaiyyətdən üzr istəyirəm. Çünki mümkün olan bütün güzəştlərə baxmayaraq, yaxşı nəticə əldə edə bilmədim.

Biz hətta tətil dövründə də razılığın əldə olunması üçün səylərimizi dayandırmayacağıq”, – deyə o bildirib.

“Reuters” agentliyinin yazdığına görə, “Samsung Electronics” şirkətinin bəyanatında qeyd olunub ki, həmkarlar ittifaqı zərərlə işləyən bölmələr üçün bonusların məbləği də daxil olmaqla “qəbuledilməz tələblər” irəli sürüb.

Çərşənbə günü günortadan sonra “Samsung”un səhmləri 1,6 faiz ucuzlaşıb, son bir həftə ərzində isə onların dəyəri 4,5 faiz azalıb. Bəzi investorlar bildiriblər ki, onları tətilin birdəfəlik xərclərindən daha çox əmək xərclərinin davamlı artımı ehtimalı narahat edir.

İndi əsas diqqət hökumətin prosesə müdaxilə edib-etməyəcəyinə və həftəsonu xəbərdarlıq etdiyi kimi, tətilin iqtisadiyyata vura biləcəyi potensial zərərə əsaslanaraq təcili arbitraj qərarı verib-verməyəcəyinə yönələcək.

Cənubi Koreya ixracının təxminən dörddə biri “Samsung”un payına düşür. Şirkət, eyni zamanda, dünyada yaddaş çiplərinin ən böyük istehsalçısıdır. Buna görə də istehsaldakı fasilələr süni intellekt sıçrayışının yaratdığı çatışmazlıq şəraitində qiymət artımını daha da sürətləndirə bilər.

Çox nadir hallarda tətbiq olunan təcili arbitraj proseduru hökumətin danışıqlarda vasitəçilik etdiyi müddətdə 30 gün ərzində tətilin davam etdirilməsinin qarşısını alardı.

Qiymətləndirmələrə görə, ən pis halda tətil Cənubi Koreya iqtisadiyyatının bu il üçün proqnozlaşdırılan 2 faiz artımını 0,5 faiz bəndi azalda bilər.

Paylaş:

Baxılıb: 291 dəfə