BMT-nin Təhlükəsizlik Şurasındakı nümayəndələri: Livan fəlakət astanasındadır

Bakı:

20 °C

83 %

3 m/s

Əlaqə

AZ RU EN

Ana səhifə / Dünya / BMT-nin Təhlükəsizlik Şurasındakı nümayəndələri: Livan fəlakət astanasındadır

BMT-nin Təhlükəsizlik Şurasındakı nümayəndələri: Livan fəlakət astanasındadır

01.04.2026 [13:14]

BMT-nin yüksək vəzifəli nümayəndələri çərşənbə axşamı Təhlükəsizlik Şurasında çıxış edərək Livanda vəziyyətin sürətlə pisləşdiyini bildiriblər. Toqquşmalar şiddətlənir, mülki əhali arasında itkilər artır. Təhlükəsizlik sahəsində vəziyyətin ağırlaşması sülhməramlı və humanitar əməliyyatlara da mənfi təsir göstərir.

AZƏRTAC xəbər verir ki, bu barədə BMT Baş katibinin Yaxın Şərq üzrə köməkçisi Xalid Hiyari bildirib.

Qeyd edib ki, münaqişə genişlənir və getdikcə daha da intensiv xarakter alır. Livan hakimiyyətinin məlumatına görə, ölkədə 1247 nəfər həlak olub, 3680 nəfər yaralanıb. Mülki infrastruktur ciddi zərər görüb. Tibb müəssisələri, məktəblər və əsas nəqliyyat xətləri dağıdılıb.

X.Hiyari xəbərdarlıq edib ki, zorakılıq təkcə yaşayış məntəqələrini məhv etmir, həm də Livanın onsuz da kövrək daxili sabitliyini sarsıdır. “Livan xalqı bu müharibəni seçməyib”, – deyə o vurğulayıb və BMT Baş katibinin son bəyanatını xatırladıb. “Hərbi həll yolu yoxdur. Yalnız diplomatiya, dialoq və BMT Nizamnaməsinə, eləcə də Təhlükəsizlik Şurasının qətnamələrinə tam əməl olunması dayanıqlı sülhə gətirib çıxara bilər”, – deyə o əlavə edib.

BMT-nin fövqəladə yardım üzrə koordinatoru Tom Fletçer Beyrutdan videobağlantı ilə çıxış edərək humanitar vəziyyəti kritik adlandırıb. İnsanlar evlərini tərk etməyə məcbur qalıb. 1,1 milyondan çox insan ölkə daxilində köçkünə çevrilib, 200 mindən çox insan isə qonşu Suriyaya qaçıb.

T.Fletçer onsuz da zəif olan infrastrukturun üzərinə düşən ağır yükü qeyd edib. Xəstəxanalar və tibb mərkəzləri bağlanır və ya imkanlarının son həddində işləyir. Məktəblər sığınacaqlara çevrilib. Dağıdılmış körpülər və yollar bütöv regionları xarici aləmdən təcrid edib.

Humanitar qurumlar yardımın həcmini artırıb, milyonlarla ərzaq payı, su, dərman və ilkin tələbat mallarını çatdırır. Bununla belə, maliyyə çatışmazlığı və münaqişə zonalarına çıxışın məhdudluğu əməliyyatları çətinləşdirir. Hazırda tələb olunan 308 milyon dolların yalnız kiçik hissəsi toplanıb.

T.Fletçer vurğulayıb ki, insanlar ilk növbədə təhlükəsizlik istəyir. “Onlar bunun dayanmasını istəyir. Bu böhranlar dövründən çıxmaq istəyirlər”, – deyə o əlavə edib.

BMT Baş katibinin sülhməramlı əməliyyatlar üzrə müavini Jan-Pyer Lakrua BMT-nin Livandakı Müvəqqəti Qüvvələrinin tərkibində xidmət edən “mavi dəbilqəlilər” üçün artan təhlükələrə diqqət çəkib. O bildirib ki, bir sutka ərzində İndoneziyadan olan üç sülhməramlı həlak olub, daha bir neçəsi ağır yaralanıb. BMT Baş katibi hərbçilərin ölümü ilə nəticələnən hərəkətləri pisləyib.

BMT missiyasının əməkdaşları davamlı atəşlər, partlayışlar və hərəkət azadlığının məhdudlaşdırılması barədə məlumat verir. Lakrua bildirib ki, sülhməramlılar heç vaxt hədəf olmamalıdır. O, bütün tərəfləri BMT obyektlərinin toxunulmazlığına riayət etməyə çağırıb.

Bu arada döyüş əməliyyatları daha da intensivləşir. Son günlər minlərlə mərmi atılıb. BMT dərhal atəşkəsin təmin olunmasının və Təhlükəsizlik Şurasının qətnaməsinin tam icrasının vacibliyini vurğulayır.

Paylaş:

Baxılıb: 695 dəfə