Makron: Aİ “tənzimləmə bazarı”na çevrilməmək üçün ortaq Avropa borcuna ehtiyac duyur

Bakı:

26 °C

65 %

9 m/s

Əlaqə

AZ RU EN

Ana səhifə / Dünya / Makron: Aİ “tənzimləmə bazarı”na çevrilməmək üçün ortaq Avropa borcuna ehtiyac duyur

Makron: Aİ “tənzimləmə bazarı”na çevrilməmək üçün ortaq Avropa borcuna ehtiyac duyur

12.02.2026 [13:20]

Fransa Prezidenti Emmanuel Makron Avropa İttifaqının (Aİ) qlobal rəqabətdə geri qalmaması üçün ortaq Avropa borc mexanizminin yaradılması təşəbbüsünü yenidən gündəmə gətirib. O hesab edir ki, ABŞ və Çinlə rəqabət qabiliyyətini qorumağın yeganə yolu strateji investisiyalar üçün ümumi borclanma mexanizminə keçməkdir.

AZƏRTAC xəbər verir ki, Belçikanın Antverpen şəhərində keçirilən Avropa Sənaye Sammitində çıxış edən dövlət başçısı Avropa ölkələrinin birgə maliyyə alətindən istifadə etməsinin vacibliyini vurğulayıb. Onun sözlərinə görə, müdafiə və kosmik təhlükəsizlik, təmiz texnologiyalar, süni intellekt və kvant texnologiyaları kimi sahələrdə kifayət qədər investisiya yatırmaq üçün ortaq borc emissiyası qaçılmazdır.

“Əgər biz müdafiə və kosmik təhlükəsizlik, təmiz texnologiyalar, süni intellekt və kvant sahələrinə yetərli sərmayə qoymaq, məhsuldarlığımızı və rəqabət qabiliyyətimizi artırmaq istəyiriksə, yeganə həll yolu ümumi borc buraxılışıdır”, – deyə Makron sənaye nümayəndələri qarşısında bildirib.

Prezident sosial media platforması X-də paylaşdığı mesajda daha sərt xəbərdarlıq edib: “Əgər Avropa uyğunlaşmasa və strateji müstəqilliyini sürətləndirməsə, rəqiblərinin tənzimləmə bazarına çevriləcək”. Onun fikrincə, bu ssenarinin qarşısını almaq üçün Aİ daxili bazarını daha çevik və vahid etməli, sənaye üçün mövcud qaydaları sadələşdirməlidir.

Makron, həmçinin Avropanın dəyər zəncirlərini qorumaq üçün tərəfdaşlıqları şaxələndirməyə və “Avropada istehsal” prinsipini gücləndirməyə çağırıb. O, “Avropa üstünlüyü” yanaşmasının strateji sektorlarda açıq şəkildə tətbiq olunmasının vacibliyini vurğulayıb.

Fransa lideri gələcəyin gücünü müəyyən edəcək sahələrə – kvant texnologiyaları, süni intellekt, yaşıl texnologiyalar və müdafiə sənayesinə – birlikdə və genişmiqyaslı sərmayə qoyulmasının zəruri olduğunu qeyd edib. “Daha sürətli. Daha güclü. Daha avropalı”, – deyə Emmanuel Makron çıxışını yekunlaşdırıb.

Makron uzun illərdir Aİ-nin strateji muxtariyyətinin gücləndirilməsini və beynəlxalq rəqabət fonunda əsas sənaye və texnoloji sahələrin ortaq maliyyələşdirilməsini müdafiə edir. Onun fikrincə, qlobal iqtisadi balansın dəyişdiyi bir dövrdə Avropa yalnız birlik və ortaq maliyyə alətləri vasitəsilə öz mövqeyini qoruya bilər.

Paylaş:

Baxılıb: 603 dəfə