Azərbaycanda demokratik seçkilərin keçirilməsi üçün zəruri ictimai-siyasi sabitlik bərqərar olub, beynəlxalq təcrübəyə söykənən mütərəqqi hüquqi baza yaradılıb

Bakı:

19 °C

82 %

5 m/s

AZ RU EN

Ana səhifə / Daxili siyasət / Azərbaycanda demokratik seçkilərin keçirilməsi üçün zəruri ictimai-siyasi sabitlik bərqərar olub, beynəlxalq təcrübəyə söykənən mütərəqqi hüquqi baza yaradılıb

Azərbaycanda demokratik seçkilərin keçirilməsi üçün zəruri ictimai-siyasi sabitlik bərqərar olub, beynəlxalq təcrübəyə söykənən mütərəqqi hüquqi baza yaradılıb

07.08.2013 [09:04]

Avqustun 6-da Mərdəkan mədəniyyət sarayında 13 saylı Xəzər-Pirallahı və 14 saylı Xəzər seçki dairələri dairə seçki komissiyalarının üzvləri və məntəqə seçki komissiyalarının sədrləri üçün kurslar keçirilib.
AzərTAc xəbər verir ki, kursda çıxış edən Xəzər rayon Polis İdarəsinin rəis müavini Ələddin Səfərov seçkilərin hazırlanmasında və keçirilməsində daxili işlər orqanlarının qarşısında duran vəzifələrdən danışıb. Bildirib ki, əsas vəzifələrdən biri də ölkədə mövcud olan sabitliyi qoruyub saxlamaq və təmin etməkdir. Daxili İşlər Nazirliyi (DİN) seçicilərin səsvermə hüququnun reallaşdırılması üçün onların hər birinin şəxsiyyət vəsiqəsi ilə təmin olunması məsələsini ciddi nəzarətdə saxlayır. DİN seçkilər prosesinə hər hansı müdaxilənin baş verməməsi, təhlükəsizliyin tam təmin olunması istiqamətində də seçki komissiyaları ilə qarşılıqlı əlaqə şəraitində fəaliyyət göstərəcəkdir. Daxili işlər orqanlarının əməkdaşları DİN tərəfindən seçkilərlə bağlı hazırlanmış tədbirlər planına uyğun olaraq artıq fəaliyyət göstərməkdədirlər.
Dairə seçki komissiyalarının sədrləri Mütəllim Balaqardaşov və İmran Qəmbərov çıxış edərək kursların əhəmiyyətini vurğulayıblar. Bildirilib ki, kurslar Azərbaycan Prezidentinin “Azərbaycan Respublikasında insan hüquqlarının müdafiəsi üzrə Milli Fəaliyyət Planının təsdiq edilməsi haqqında” 2006-cı il 28 dekabr tarixli və “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramının təsdiq edilməsi haqqında” 2011-ci il 27 dekabr tarixli sərəncamlarına uyğun olaraq təşkil edilib.
Natiqlər bildiriblər ki, respublikamızda həyata keçirilən uğurlu siyasət nəticəsində demokratik seçkilərin keçirilməsi üçün zəruri ictimai-siyasi sabitlik bərqərar olub, beynəlxalq təcrübəyə söykənən mütərəqqi hüquqi baza yaradılıb. Dövlətimizin başçısının siyasi iradəsi, diqqəti və qayğısı nəticəsində ölkəmizdə demokratik seçki təcrübəsi ildən-ilə mükəmməlləşdirilir. Qarşıdan gələn seçkilər tam azad, şəffaf və demokratik şəraitdə keçiriləcək.
Həmin gün 26 saylı Sabunçu birinci və 27 saylı Sabunçu ikinci seçki dairələri dairə seçki komissiyalarının inzibati binalarında da seçki hüququ üzrə ixtisaslaşdırılmış kurslar keçirilib.
Prezident seçkilərinin ölkəmizin ictimai-siyasi həyatındakı mühüm rolundan danışan 26 saylı Sabunçu birinci seçki dairəsi dairə seçki komissiyasının sədri Hacı Əliyev seçkilərə hazırlıq prosesində dairə və məntəqə seçki komissiyalarının üzərinə düşən məsul vəzifələrdən, bu sahədə hər kəsin yüksək məsuliyyətindən ətraflı danışıb.
27 saylı Sabunçu ikinci seçki dairəsi dairə seçki komissiyasının sədri Nadir Əjdərov seçki hüququ üzrə ixtisaslaşdırılmış kursların əhəmiyyətindən danışıb. Bildirib ki, Prezident İlham Əliyevin müvafiq sərəncamlarına uyğun olaraq keçirilən kurslar bu sahədə görülən genişmiqyaslı işlərin tərkib hissəsidir.
Kurslarda MSK-nın üzvü Şaitdin Əliyev “Seçki prosesində kütləvi informasiya vasitələrinin rolu, yerli və xarici müşahidəçilərin hüquq və vəzifələri” mövzusunda çıxış edib, seçicilərin hüquqlarının qorunması, seçkiqabağı təşviqatın aparılmasına normal şəraitin yaradılması və s. məsələlərdən ətraflı söhbət açıb.
Sonda kurs iştirakçılarını maraqlandıran suallar cavablandırılıb, geniş fikir mübadiləsi aparılıb.

Paylaş:

Baxılıb: 2003 dəfə