Səbail rayonunda 2013-cü ilin birinci yarısının yekunları və qarşıda duran vəzifələr müzakirə olunub

Bakı:

17 °C

82 %

3 m/s

AZ RU EN

Ana səhifə / Daxili siyasət / Səbail rayonunda 2013-cü ilin birinci yarısının yekunları və qarşıda duran vəzifələr müzakirə olunub

Səbail rayonunda 2013-cü ilin birinci yarısının yekunları və qarşıda duran vəzifələr müzakirə olunub

23.07.2013 [10:42]

Azərbaycan Respublikasının Prezidenti İlham Əliyevin Sədrliyi ilə Nazirlər Kabinetinin 2013-cü ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasındakı nitqindən irəli gələn məsələlər Səbail rayon İcra Hakimiyyəti başçısı yanında şuranın R.Behbudov adına Dövlət Mahnı Teatrında keçirilən iclasında müzakirə olunub.
Rayon İcra Hakimiyyətindən AzərTAc-a bildiriblər ki, iclasda sənaye, təhsil və səhiyyə müəssisələrinin, təsərrüfat xidmətlərinin, hüquq mühafizə orqanlarının rəhbərləri, bələdiyyələrin, gənclər təşkilatlarının və rayon ictimaiyyətinin nümayəndələri iştirak ediblər.
Səbail rayon İcra Hakimiyyətinin başçısı Asif Əsgərov Prezident İlham Əliyevin Sədrliyi ilə Nazirlər Kabinetinin 2013-cü ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclası barədə məlumat verib. Qeyd olunub ki, ölkədə altı ay ərzində ümumi daxili məhsul 5 faiz, qeyri-neft sektoru 11 faiz, kənd təsərrüfatı 5 faiz artıb. İnflyasiyanın cəmi 2 faiz artması müqabilində əhalinin pul gəlirlərində təxminən 7 faiz artım baş verib. Ölkənin strateji valyuta ehtiyatları 48 milyard dollara çatıb ki, bu da Prezident İlham Əliyevin apardığı uğurlu daxili və xarici siyasətin real nəticəsidir.
İclasda 2013-cü ilin birinci yarısında Səbail rayonunda görülən işlərdən də bəhs olunub və bildirilib ki, ötən dövrdə sənaye müəssisələri tərəfindən 11616,4 milyon manatlıq məhsul istehsal edilib, 2012-ci müvafiq dövrü ilə müqayisədə əhaliyə göstərilən nəqliyyat və rabitə xidmətlərinin həcmi və keyfiyyəti yüksəlib. Bütün maliyyə mənbələri hesabına əsas kapitala 1854,8 milyon manat investisiya yönəldilib ki, bu da keçən ilin altı ayına nisbətən 30,7 faiz çoxdur. Tikinti-quraşdırma işlərinə yönəldilmiş investisiyanın həcmində isə 3,3 dəfə artım qeydə alınıb.
Vurğulanıb ki, hesabat dövründə əhaliyə 122,2 milyon manat məbləğində və ya ötən ilin eyni dövründə olduğundan 22,6 faiz çox istehlak malları satılıb, xidmət müəssisələri tərəfindən 146,2 milyon manatlıq pullu xidmət göstərilib, pullu xidmətlərin həcmi 2012-ci ilin eyni dövrünə nisbətən 2,5 faiz artıb.
Məlumat verilib ki, ötən dövrdə rayon ərazisində 879 daimi iş yeri açılıb. “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na uyğun olaraq rayonda bir sıra əsaslı təmir-tikinti və yenidənqurma işləri görülüb. Həmçinin sakinlərin elektrik enerjisi, təbii qaz, içməli su ilə təminatının yaxşılaşdırılması üçün tədbirlər həyata keçirilib.
Hesabat dövründə Səbail rayon Əhalinin Sosial Müdafiəsi Mərkəzinə ünvanlı sosial yardım almaq üçün 426 ailə müraciət edib, onların müraciəti təmin olunub. Dövlət Sosial Müdafiə Fondunun rayon şöbəsində qeydiyyatda olan 13 min 74 nəfər təqaüdçüyə 17 milyon 262 min 749,25 manat təqaüd və müavinətlər ödənilib. Səbail rayon Məşğulluq Mərkəzi tərəfindən 480 nəfər işaxtaran vətəndaş daimi işlə təmin edilib.
Şura iclasında əldə olunmuş nailiyyətlərlə yanaşı, mövcud problemlər və onların həlli yolları, vətəndaşların müraciətlərinə baxılması və digər məsələlər ətrafında fikir mübadiləsi aparılıb, qarşıda duran vəzifələr müzakirə olunub.

Paylaş:

Baxılıb: 1983 dəfə