Dini-mənəvi həmrəylik və Türk dünyasının ortaq dəyərləri

Bakı:

24 °C

83 %

1 m/s

Əlaqə

AZ RU EN

Ana səhifə / Arxiv / Dini-mənəvi həmrəylik və Türk dünyasının ortaq dəyərləri

Dini-mənəvi həmrəylik və Türk dünyasının ortaq dəyərləri

21.09.2026 [13:20]

Toğrul Zeynalov

YAP Ağdam rayon təşkilatının əməkdaşı

Azərbaycanın zəngin dini-mənəvi irsi, multikultural dəyərlərə sadiqliyi və Türk dünyasının birliyinin möhkəmləndirilməsi istiqamətində həyata keçirdiyi siyasət ölkəmizin beynəlxalq nüfuzunun mühüm tərkib hissəsidir. Prezident İlham Əliyevin Türk Dövlətləri Təşkilatının müsəlman dini idarə rəhbərləri Şurasının üzvlərindən və müşahidəçilərindən, Yəhya Bakuvi Beynəlxalq Konfransının həmtəşkilatçılarından və Qafqaz Xalqları Ali Dini Şurasının üzvlərindən ibarət nümayəndə heyətini qəbul edərkən səsləndirdiyi fikirlər bu baxımdan xüsusi əhəmiyyət daşıyır. Görüşdə ortaq dini-mənəvi dəyərlərin qorunması, qardaş xalqlar arasında əlaqələrin möhkəmləndirilməsi və tarixi irsin beynəlxalq miqyasda təbliği məsələləri ön plana çıxıb. Bakıda Türk Dövlətləri Təşkilatının Müsəlman Dini Rəhbərləri Şurasının VII toplantısının və Seyid Yəhya Bakuviyə həsr olunmuş beynəlxalq konfransın keçirilməsi Azərbaycanın mənəvi irsinə göstərilən diqqətin mühüm nümunəsidir. XV əsrin görkəmli Azərbaycan mütəfəkkiri Seyid Yəhya Bakuvinin elmi-fəlsəfi irsinin müxtəlif ölkələrdən gəlmiş din xadimləri və alimlər tərəfindən müzakirəsi onun ümumbəşəri əhəmiyyətini bir daha gündəmə gətirir.

Prezident İlham Əliyevin çıxışında əksini tapan əsas məqamlardan biri Türk dünyasında dini-mənəvi həmrəyliyin gücləndirilməsinin vacibliyidir. Ortaq tarixi köklər, mədəni yaxınlıq və dini dəyərlər xalqlarımız arasında qarşılıqlı etimadın möhkəmlənməsinə xidmət edən mühüm amillərdir. Bu baxımdan, dini rəhbərlərin mütəmadi görüşləri yalnız dini qurumlar arasında əməkdaşlıq deyil, həm də cəmiyyətlər arasında anlaşma və dostluq münasibətlərinin inkişafı üçün əhəmiyyətlidir. Görüşdə Türkiyə Diyanət İşləri İdarəsinin sədri Safi Arpaquşun Türkiyə Prezidenti Rəcəb Tayyib Ərdoğanın salamlarını çatdırması, Azərbaycan xalqına və dövlətinə birlik və həmrəylik arzularını ifadə etməsi iki qardaş ölkə arasındakı münasibətlərin mənəvi müstəvidə də möhkəm əsaslara söykəndiyini göstərir. Əl-Əzhər Əş-Şərifin Böyük İmamı Şeyx Əhməd ət-Tayyibin Seyid Yəhya Bakuvi irsinə verdiyi yüksək qiymətin vurğulanması isə Azərbaycan mütəfəkkirinin İslam dünyasının elmi və mənəvi mühitində də diqqət mərkəzində olduğunu təsdiqləyir. Müasir dövrdə dini ayrı-seçkiliyin və qarşıdurmaların qarşısının alınması, tolerantlığın və qarşılıqlı hörmətin təşviqi baxımından bu cür beynəlxalq təmasların əhəmiyyəti daha da artır.

Paylaş:

Baxılıb: 68 dəfə