Güc, təhlükəsizlik və sülhün təminatı

Bakı:

24 °C

83 %

4 m/s

Əlaqə

AZ RU EN

Ana səhifə / Arxiv / Güc, təhlükəsizlik və sülhün təminatı

Güc, təhlükəsizlik və sülhün təminatı

13.08.2026 [16:24]

Səyyad Mirzəyev,

YAP Ağdam rayon təşkilatının əməkdaşı

Güclü ordu, yüksək müdafiə qabiliyyəti və milli təhlükəsizliyin etibarlı təminatı müasir dövrdə dövlət müstəqilliyinin ən mühüm dayaqlarındandır. Azərbaycan bu istiqamətdə ardıcıl və məqsədyönlü siyasət həyata keçirərək regionun təhlükəsizlik mənzərəsində əsas aktorlardan birinə çevrilib. Azərbaycanın 44 günlük Vətən müharibəsində qazandığı Qələbə Cənubi Qafqazda uzun illər mövcud olmuş status-kvonu kökündən dəyişdi. Ölkəmizin ərazi bütövlüyünün bərpası regionda yeni siyasi və təhlükəsizlik reallıqları yaratdı. 2023-cü ildə suverenliyin bütün ölkə ərazisində tam bərpası isə bu prosesin mühüm mərhələsini təşkil etdi. Bu nəticələr təsadüfi deyil. Onların arxasında güclü iqtisadiyyat, dövlət-xalq birliyi, düşünülmüş xarici siyasət və ən əsası, müasir standartlara cavab verən, yüksək döyüş qabiliyyətinə malik Azərbaycan Ordusu dayanır. Ölkə Prezidenti cənab İlham Əliyevin 11avqust 2026-cı il tarixdə Naxçıvana səfəri zamanı səsləndirdiyi “Azərbaycan Silahlı Qüvvələri bölgədə söz sahibidir” fikri artıq formalaşmış reallığın ifadəsidir. Azərbaycanın mövqeyi regionda qəbul edilən, hesablaşılan və nəzərə alınan mövqedir. Cənab Prezidentin Naxçıvana səfəri zamanı müdafiə məsələlərinə xüsusi diqqət yetirməsi də təsadüfi deyil. Naxçıvanın Azərbaycanın əsas ərazisindən coğrafi baxımdan ayrı yerləşməsi onun təhlükəsizlik məsələlərinə xüsusi yanaşmanı zəruri edir.Bu səfər çərçivəsində Əlahiddə Ümumqoşun Ordunun yeni komando hissələrinə döyüş bayraqlarının təqdim olunması Naxçıvanın müdafiə potensialının gücləndirilməsi istiqamətində görülən işlərin mühüm göstəricilərindən biridir. Prezident müsahibəsində Naxçıvanda hərbi potensialın bundan sonra da gücləndiriləcəyini xüsusi qeyd etdi. Burada əsas məqsəd hərbi qarşıdurma yaratmaq deyil, Azərbaycanın təhlükəsizliyini təmin etmək, mümkün təhdidlərin qarşısını vaxtında almaq və regionda sabitliyin qorunmasına töhfə verməkdir. Azərbaycanın dövlət siyasətində sülh və əməkdaşlıq məsələləri mühüm yer tutur. Lakin dayanıqlı sülhün təmin edilməsi üçün dövlətin öz təhlükəsizliyini qorumaq imkanlarına malik olması vacibdir. Güclü müdafiə qabiliyyəti Azərbaycanın xarici siyasətdə müstəqil mövqe nümayiş etdirməsinə də imkan yaradır. Azərbaycan öz milli maraqlarını müdafiə etmək imkanına malik olan dövlət kimi regionda sülh proseslərinə daha fəal və inamlı şəkildə töhfə verir. Bu baxımdan ordunun gücləndirilməsi həm də siyasi sabitliyin, iqtisadi inkişafın, investisiya mühitinin və regional əməkdaşlığın təhlükəsizlik dayaqlarından biridir. Azərbaycanın regional siyasətinin mühüm xüsusiyyətlərindən biri hərbi güclə diplomatik fəallığın paralel şəkildə həyata keçirilməsidir. Son illərdə ölkəmiz bir tərəfdən müdafiə qabiliyyətini artırıb, digər tərəfdən regional nəqliyyat, enerji və sülh təşəbbüslərində fəal rol oynayıb. Dövlətin təhlükəsizlik imkanlarının güclü olması diplomatik mövqelərin də möhkəmlənməsinə şərait yaradır. Ölkəmizin beynəlxalq münasibətlər sistemində artan nüfuzu, regional layihələrdə fəal iştirakı və nəqliyyat-kommunikasiya imkanlarının genişlənməsi ölkəmizin geosiyasi əhəmiyyətini daha da artırır. 11 avqust səfərinin mühüm cəhətlərindən biri də müdafiə məsələləri ilə yanaşı, Naxçıvanın iqtisadi, enerji, nəqliyyat və sosial inkişaf perspektivlərinin kompleks şəkildə nəzərdən keçirilməsi oldu. Naxçıvan Sənaye Parkının təməlinin qoyulması, enerji layihələri, nəqliyyat infrastrukturunun inkişafı, sosial obyektlərin yaradılması və şəhərin uzunmüddətli inkişaf planının təqdim edilməsi göstərir ki, muxtar respublikanın gələcək inkişafı vahid strateji yanaşma çərçivəsində həyata keçirilir.

Naxçıvanın gələcək inkişafında nəqliyyat əlaqələrinin bərpası xüsusi əhəmiyyət daşıyır. Azərbaycanın əsas hissəsi ilə Naxçıvan arasında quru bağlantısının yaradılması ölkənin iqtisadi və strateji imkanlarını genişləndirməklə yanaşı, regionda yeni kommunikasiya xəritəsinin formalaşmasına da xidmət edəcək. Cənab Prezident müsahibəsində Zəngəzur istiqamətində nəqliyyat və enerji layihələrinin perspektivlərinə də toxunaraq bu proseslərin Naxçıvanın regional nəqliyyat və enerji mərkəzinə çevrilməsi baxımından əhəmiyyətini qeyd etdi. Naxçıvan artıq yalnız coğrafi mövqeyinə görə deyil, təhlükəsizlik, nəqliyyat, enerji və iqtisadi imkanlarının məcmusuna görə də Azərbaycanın strateji məkanlarından biri kimi çıxış edir. Azərbaycanın təcrübəsi göstərir ki, güclü dövlət həm öz təhlükəsizliyini təmin edə, həm də qonşu ölkələrlə əməkdaşlığın inkişafında daha inamlı mövqe tuta bilər. Bu gün ölkəmizin regional təşəbbüslərdə fəallığı məhz belə bir yanaşmanın nəticəsidir. Ölkə Prezidenti cənab İlham Əliyevin Naxçıvan səfəri zamanı səsləndirdiyi fikirlər bir daha göstərdi ki, Azərbaycanın müdafiə siyasətinin əsas istiqaməti təhlükəsizliyin etibarlı təmin olunmasıdır. Naxçıvanda hərbi potensialın gücləndirilməsi də bu ümumi strategiyanın mühüm hissəsidir. Bu gün Azərbaycanın regionda söz sahibi olması yalnız hərbi imkanlarla ölçülən anlayış deyil. Bu, güclü ordu, möhkəm iqtisadiyyat, müstəqil xarici siyasət, milli birlik və artan beynəlxalq nüfuzun vəhdətindən yaranan geosiyasi çəkidir.

Paylaş:

Baxılıb: 304 dəfə