Azərbaycan–Almaniya əlaqələrində yeni səhifə

Bakı:

21 °C

94 %

0 m/s

Əlaqə

AZ RU EN

Ana səhifə / Arxiv / Azərbaycan–Almaniya əlaqələrində yeni səhifə

Azərbaycan–Almaniya əlaqələrində yeni səhifə

24.07.2026 [10:45]

Fidan Hüseynova

YAP Quba rayon təşkilatının sədri

Müasir beynəlxalq münasibətlər sistemində dövlətlərarası tərəfdaşlıqların dərinləşdirilməsi qlobal sabitliyin və dayanıqlı inkişafın əsas şərtlərindən biri hesab olunur. Azərbaycan Respublikasının Prezidenti cənab İlham Əliyevin 21 iyul 2026-cı il tarixində Almaniya Federativ Respublikasına rəsmi səfəri zamanı verdiyi bəyanat da məhz bu baxımdan xüsusi siyasi əhəmiyyət daşıyır. Dövlət başçısının çıxışı Azərbaycan-Almaniya münasibətlərinin yeni inkişaf mərhələsinə qədəm qoyduğunu nümayiş etdirməklə yanaşı, ölkəmizin Avropanın etibarlı siyasi, iqtisadi və enerji tərəfdaşı kimi mövqeyini bir daha təsdiqlədi.

Prezident İlham Əliyev bəyanatında xüsusi vurğuladı ki, səfər çərçivəsində imzalanan sənədlər ikitərəfli münasibətləri keyfiyyətcə yeni mərhələyə yüksəldəcək. Strateji dialoqun başlanması barədə əldə olunan razılıq Azərbaycan ilə Almaniya arasında əməkdaşlığın artıq təkcə ayrı-ayrı sahələri deyil, geniş siyasi gündəliyi əhatə edəcəyini göstərir. Bu isə hər iki ölkənin regional və beynəlxalq proseslərdə qarşılıqlı etimada əsaslanan tərəfdaşlıq modelini daha da möhkəmləndirəcək.

Bəyanatda diqqət çəkən əsas məqamlardan biri iqtisadi əməkdaşlığın genişləndirilməsi ilə bağlı idi. Almaniya Avropa İttifaqının aparıcı iqtisadi gücü olmaqla yanaşı, yüksək texnologiyalar, sənaye, yaşıl enerji və innovasiya sahələrində dünyanın qabaqcıl ölkələrindən biridir. Azərbaycan isə son illərdə həyata keçirdiyi iqtisadi islahatlar nəticəsində xarici investorlar üçün cəlbedici biznes mühiti formalaşdırıb. Prezident İlham Əliyevin qeyd etdiyi kimi, hazırda Azərbaycanda 200-dən çox Almaniya şirkəti uğurla fəaliyyət göstərir və bu göstəricinin yaxın illərdə daha da artacağı gözlənilir. Qarşılıqlı investisiyaların təşviqi istiqamətində irəli sürülən təşəbbüslər iki ölkənin iqtisadi əlaqələrinin daha da dərinləşəcəyindən xəbər verir.

Enerji sahəsində əməkdaşlıq isə münasibətlərin strateji sütunlarından biri kimi ön plana çıxır. Prezident İlham Əliyev bəyanatında bildirdi ki, bu ildən etibarən Azərbaycan təbii qazının Almaniyaya ixracına başlanılıb. Bununla da Azərbaycanın enerji resursları artıq Avropa İttifaqının on üzv dövlətinə çatdırılır. Bu fakt ölkəmizin Avropanın enerji təhlükəsizliyinə verdiyi mühüm töhfənin növbəti təsdiqidir. Xüsusilə son illərdə qlobal enerji bazarında yaşanan dəyişikliklər fonunda Azərbaycanın etibarlı tərəfdaş kimi qazandığı nüfuz daha da möhkəmlənir.

Bununla yanaşı, dövlət başçısı yaşıl enerji sahəsində əməkdaşlığın geniş perspektivlərə malik olduğunu vurğuladı. Azərbaycanın bərpaolunan enerji layihələrinə yatırdığı böyük investisiyalar və Avropaya yaşıl enerji ixracı planları Almaniyanın texnoloji imkanları ilə uzlaşaraq hər iki ölkə üçün yeni inkişaf istiqamətləri formalaşdırır. Bu əməkdaşlıq yalnız iqtisadi deyil, həm də qlobal iqlim məqsədlərinə xidmət edən mühüm addım kimi qiymətləndirilə bilər.

Prezident İlham Əliyevin çıxışında nəqliyyat və logistika məsələləri də mühüm yer tutdu. Azərbaycan Şərq-Qərb və Şimal-Cənub beynəlxalq nəqliyyat dəhlizlərinin kəsişməsində yerləşən strateji ölkə kimi Avropa ilə Mərkəzi Asiyanı birləşdirən mühüm tranzit mərkəzinə çevrilməkdədir. Dövlət başçısının qeyd etdiyi kimi, Azərbaycanın Orta Asiya ilə Avropa arasında körpü rolunun güclənməsi Almaniya üçün də yeni iqtisadi imkanlar yaradır. Alman şirkətlərinin logistika və nəqliyyat infrastrukturu sahəsində zəngin təcrübəsi bu istiqamətdə əməkdaşlığın genişlənməsinə əlverişli zəmin yaradır.

Bəyanatın mühüm siyasi məqamlarından biri də regional sülh və təhlükəsizlik məsələləri ilə bağlı idi. Azərbaycan müharibədən sonrakı dövrdə regionda davamlı sülhün təmin olunması istiqamətində ardıcıl və konstruktiv siyasət həyata keçirir. Almaniya kimi Avropanın aparıcı dövlətləri ilə bu istiqamətdə aparılan dialoq Azərbaycanın beynəlxalq mövqelərinin daha da güclənməsinə xidmət edir. Bu yanaşma ölkəmizin yalnız regional deyil, qlobal miqyasda etibarlı tərəfdaş kimi qəbul edilməsinin göstəricisidir.

Diqqətəlayiq məqamlardan biri də odur ki, səfər çərçivəsində əldə olunan razılaşmaların operativ icrası məqsədilə müxtəlif işçi qruplarının yaradılması nəzərdə tutulur. Bu isə göstərir ki, imzalanan sənədlər formal xarakter daşımır, konkret fəaliyyət proqramları və praktik nəticələrə hesablanıb. Belə yanaşma Azərbaycan diplomatiyasının praqmatik və nəticəyönümlü fəaliyyətinin növbəti nümunəsidir.

Prezident İlham Əliyevin Berlin bəyanatı Azərbaycanın xarici siyasətinin ardıcıl, balanslaşdırılmış və milli maraqlara əsaslanan kursunun növbəti uğurlu təzahürü kimi qiymətləndirilməlidir. Bu səfər bir daha nümayiş etdirdi ki, Azərbaycan Avropa ilə əməkdaşlığı qarşılıqlı hörmət, etibarlı tərəfdaşlıq və ortaq maraqlar prinsipi əsasında inkişaf etdirir. Enerji təhlükəsizliyi, iqtisadi inteqrasiya, yaşıl keçid, nəqliyyat-logistika və regional sabitlik kimi strateji istiqamətlərdə əldə olunan nəticələr ölkəmizin beynəlxalq nüfuzunun daha da artmasına xidmət edir.

Şübhəsiz ki, Prezident İlham Əliyevin Almaniyaya rəsmi səfəri və səsləndirdiyi proqram xarakterli bəyanat Azərbaycan–Almaniya münasibətlərinin tarixində yeni səhifə açmaqla yanaşı, ölkəmizin Avropa ilə tərəfdaşlığının daha da möhkəmlənməsinə, regionda sabitliyin və əməkdaşlığın güclənməsinə mühüm töhfə verəcək.

Paylaş:

Baxılıb: 453 dəfə