Milli mətbuatımız şərəfli inkişaf yolu keçib

Bakı:

32 °C

37 %

5 m/s

Əlaqə

AZ RU EN

Ana səhifə / Arxiv / Milli mətbuatımız şərəfli inkişaf yolu keçib

Milli mətbuatımız şərəfli inkişaf yolu keçib

22.07.2026 [21:56]

22 iyul – Milli Mətbuat Günü Azərbaycanın cəmiyyət, siyasət və mədəniyyət salnaməsində müstəsna mövqeyə malik xüsusi tarixlərdəndir. Bu gün təkcə yerli jurnalistikanın təşəkkül tapması ilə hüdudlanmır, həm də maarifçilik hərəkatının genişlənməsi, milli özünüdərkin formalaşması və dövlətçilik şüurunun inkişafı baxımından dərin məna kəsb edir. Ölkəmizdə mətbuatın təməli 1875-ci il iyulun 22-də böyük mütəfəkkir Həsən bəy Zərdabi tərəfindən buraxılan “Əkinçi” qəzeti ilə qoyulmuşdur. Doğma dildə işıq üzü görən bu ilk mətbu orqan əhalinin savadlanmasında, elmi biliklərin yayılmasında, mənəvi irsin qorunmasında və ictimai düşüncənin təkamülündə müstəsna rol oynamışdır. Nəşr müddəti qısa olsa da, qəzet özündən sonra gələn jurnalistika ənənələrinin bünövrəsini qoymuş və mətbuatın gələcək xəttini müəyyən etmişdir.

Dövlət müstəqilliyinin bərpasından sonra media sektoru keyfiyyətcə yeni bir mərhələyə qədəm qoydu. Xüsusilə Ümummilli Lider Heydər Əliyevin təşəbbüsü ilə reallaşdırılan islahatlar fikir və söz azadlığının təmin edilməsinə, mətbuatın hüquqi bazasının möhkəmlənməsinə və azad media mühitinin formalaşmasına zəmin yaratdı. 1998-ci ildə senzuranın birdəfəlik ləğvi ölkədə demokratik media mühitinin bərqərar olmasını sürətləndirdi və jurnalistlərin sərbəst fəaliyyətinə geniş yol açdı. Bu addım müasir Azərbaycan mətbuatının inkişafında mühüm dönüş nöqtəsi kimi qiymətləndirilir.

Bu gün həmin strategiya Prezident İlham Əliyev tərəfindən dövrün müasir tələblərinə uyğun şəkildə uğurla davam etdirilir. Son illərdə media məkanında aparılan institusional yeniliklər yerli jurnalistikanın modernləşməsinə yeni təkan vermişdir. Medianın İnkişafı Agentliyinin fəaliyyətə başlaması, “Media haqqında” yeni Qanunun qəbulu, Media Reyestrinin istifadəyə verilməsi, media işçilərinin sosial rifahının yaxşılaşdırılması və media subyektlərinə dövlət tərəfindən verilən güzəştlər bu sahədəki mühüm addımlardandır. Bütün bu tədbirlərin təməlində peşəkar jurnalistikanı stimullaşdırmaq, informasiya mühitində şəffaflığı təmin etmək, xəbər istehsalının keyfiyyətini artırmaq və milli informasiya təhlükəsizliyini etibarlı şəkildə qorumaq məqsədi dayanır.

Qlobal informasiya mühitindəki sürətli dəyişikliklər jurnalistika qarşısında yeni çağırışlar qoyur. Rəqəmsal texnologiyalar, sosial şəbəkələr və süni intellekt alətləri xəbərin çatdırılmasını asanlaşdırsa da, dezinformasiya və yalan xəbər risklərini artıraraq peşəkar medianın məsuliyyətini ikiqat artırır. Çağdaş jurnalist yalnız operativ xəbər ötürməklə kifayətlənməməli, mənbəni dərindən yoxlamalı, etik normaya riayət etməli və cəmiyyətə dəqiq məlumat təqdim etməlidir. Bununla yanaşı, media savadlılığının yüksəldilməsi, rəqəmsal bacarıqların mənimsənilməsi və yeni alətlərdən məsuliyyətli istifadə günümüzün əsas tələblərindəndir.

44 günlük Vətən müharibəsi zamanı Azərbaycan mediası informasiya cəbhəsində yüksək peşəkarlıq göstərdi. Mətbuat nümayəndələri cəbhə xəttindən operativ xəbərlər ötürməklə bərabər, ölkəmizin haqlı mübarizəsini faktlarla beynəlxalq birliyə çatdırdı və düşmənin dezinformasiya cəhdlərini boşa çıxardı. Postmüharibə dövründə isə media azad olunmuş torpaqlarda aparılan genişmiqyaslı bərpa işlərini, Böyük Qayıdış prosesini və regiondakı yeni geosiyasi mənzərəni fəal şəkildə işıqlandırır. Şuşada təşkil olunan Qlobal Media Forumları isə Azərbaycanın beynəlxalq media dialoqundakı liderliyini nümayiş etdirən mühüm platformaya çevrilmişdir. Xarici media ekspertlərinin qatıldığı bu tədbirlərdə informasiya təhlükəsizliyi, rəqəmsal transformasiya, media etikası və dezinformasiyaya qarşı mübarizə kimi qlobal mövzular müzakirə edilir.

Aşkar görünür ki, milli mətbuatın təməl missiyası cəmiyyətə obyektiv məlumat çatdırmaqla yanaşı, dövlət maraqlarını qorumaq, milli birliyi möhkəmləndirmək və mənəvi dəyərləri təbliğ etməkdir. Güclü media yalnız texniki imkanlarla deyil, həm də dürüstlük, obyektivlik, peşəkarlıq və ictimai etimad kimi prinsiplərlə şərtlənir. 150 ildən çox şərəfli yol keçən Azərbaycan milli mətbuatı zəngin irsinə söykənərək bu gün də ölkənin ictimai-siyasi həyatında fəal iştirak edir və qlobal informasiya məkanında dövlətimizin maraqlarını əzmlə müdafiə edir.

Həsən bəy Zərdabinin maarifçilik məşəli üzərində ucalan milli mətbuatımız müasir texnologiyaların verdiyi üstünlüklərdən bəhrələnərək yeni inkişaf dövrünü yaşayır. Zəngin tarixi ənənələrlə müasir dövrün tələblərinin sintezi Azərbaycan mediasının əsas güc mənbəyidir. Şübhəsiz ki, peşəkar prinsiplərə sadiq qalan milli mətbuatımız bundan sonra da cəmiyyətin tərəqqisinə, informasiya təhlükəsizliyinin təmininə və Azərbaycan həqiqətlərinin dünyaya çatdırılmasına dəyərli töhfələr verməkdə davam edəcəkdir.

Rail Tağızadə

Yeni Azərbaycan Partiyası Naxçıvan şəhər təşkilatının sədr müavini

Paylaş:

Baxılıb: 187 dəfə