Milli mətbuat: milli düşüncənin formalaşmasında və dövlətçilik ənənələrinin möhkəmlənməsində strateji amil

Bakı:

24 °C

64 %

6 m/s

AZ RU EN

Ana səhifə / Arxiv / Milli mətbuat: milli düşüncənin formalaşmasında və dövlətçilik ənənələrinin möhkəmlənməsində strateji amil

Milli mətbuat: milli düşüncənin formalaşmasında və dövlətçilik ənənələrinin möhkəmlənməsində strateji amil

21.07.2026 [14:45]

22 İyul – Milli Mətbuat Günü Azərbaycan xalqının ictimai-siyasi və mədəni həyatında xüsusi əhəmiyyət daşıyan tarixi günlərdən biridir. Bu tarix 1875-ci il iyulun 22-də görkəmli maarifçi, ziyalı və publisist Həsən bəy Zərdabinin təşəbbüsü ilə nəşr olunan “Əkinçi” qəzetinin işıq üzü görməsi ilə milli mətbuatımızın əsasının qoyulduğu gün kimi qeyd edilir.“Əkinçi” qəzeti yalnız ilk Azərbaycan dilli mətbu orqan olmaqla kifayətlənməmiş, xalqın maariflənməsinə, milli özünüdərkin inkişafına, ana dilinin qorunmasına və müasir düşüncə tərzinin formalaşmasına xidmət edən böyük ideoloji məktəb yaratmışdır.

Azərbaycan milli mətbuatının inkişaf tarixi xalqımızın milli dirçəliş və dövlətçilik tarixindən ayrılmazdır. XIX əsrin sonu və XX əsrin əvvəllərində fəaliyyət göstərən “Ziya”, “Kəşkül”, “Şərqi-rus”, “Füyuzat”, “Molla Nəsrəddin”, “İrşad”, “Açıq söz” kimi mətbuat orqanları cəmiyyətin maariflənməsinə, milli ideyaların yayılmasına və azərbaycançılıq məfkurəsinin formalaşmasına mühüm töhfələr vermişdir.Bu nəşrlər milli kimliyin qorunması, ana dilinin inkişafı, elm və təhsilin təşviqi istiqamətində böyük missiya yerinə yetirmiş, xalqın ictimai-siyasi proseslərdə fəal iştirakına zəmin yaratmışdır.Azərbaycan müstəqilliyini bərpa etdikdən sonra milli mətbuat qarşısında yeni vəzifələr meydana çıxmışdır. Dövlət quruculuğunun ilk illərində mövcud olan çətinliklərə baxmayaraq, ölkədə söz və mətbuat azadlığının inkişafı istiqamətində mühüm addımlar atılmışdır.

Ümummilli Lider Heydər Əliyevin siyasi rəhbərliyi dövründə mətbuatın inkişafına xüsusi diqqət göstərilmişdir. 1998-ci ildə senzuranın ləğv olunması Azərbaycan mediasının inkişaf tarixində mühüm mərhələ olmuş, azad sözün və peşəkar jurnalistikanın inkişafına geniş imkan yaratmışdır.Müasir dövrdə Prezident İlham Əliyevin rəhbərliyi ilə media sahəsinin inkişafı dövlət siyasətinin mühüm istiqamətlərindən biridir. Milli media sisteminin müasirləşdirilməsi, rəqəmsal imkanların genişləndirilməsi, jurnalistikanın peşəkarlığının artırılması və informasiya təhlükəsizliyinin təmin olunması istiqamətində ardıcıl tədbirlər həyata keçirilir.

Azərbaycan mediası 44 günlük Vətən müharibəsi zamanı informasiya cəbhəsində böyük məsuliyyət nümayiş etdirmişdir. Jurnalistlər Azərbaycanın haqq səsini dünya ictimaiyyətinə çatdırmış, ölkəmizə qarşı aparılan dezinformasiya siyasətinə qarşı mübarizə aparmışlar.Vətən müharibəsindən sonrakı dövrdə media qarşısında yeni vəzifələr dayanır. Qarabağ və Şərqi Zəngəzurda həyata keçirilən genişmiqyaslı bərpa-quruculuq işlərinin, Böyük Qayıdış proqramının və tarixi-mədəni irsin bərpasının işıqlandırılması mühüm əhəmiyyət daşıyır.Bu gün informasiya yalnız məlumat vasitəsi deyil, həm də dövlətlərin siyasi, iqtisadi və ideoloji gücünü müəyyən edən strateji resursdur. Obyektiv, operativ və peşəkar jurnalistika dövlətlə cəmiyyət arasında etibarlı əlaqələrin möhkəmlənməsinə xidmət edir.Rəqəmsal dövrdə medianın qarşısında yeni imkanlarla yanaşı, yeni çağırışlar da yaranır. Etibarlı mənbələrə əsaslanmaq, faktların düzgünlüyünü qorumaq, cəmiyyəti yanlış məlumatlardan müdafiə etmək və milli maraqları üstün tutmaq müasir jurnalistikanın əsas prinsiplərindəndir.Azərbaycan milli mətbuatı 151 illik inkişaf yolu ərzində zəngin təcrübə qazanaraq müasir informasiya cəmiyyətinin aparıcı institutlarından birinə çevrilmişdir. Milli mətbuatımız xalqımızın milli düşüncəsinin, maarifçilik ənənələrinin və dövlətçilik dəyərlərinin mühüm göstəricisidir.

22 İyul – Milli Mətbuat Günü münasibətilə bütün jurnalistlərimizi və media nümayəndələrimizi təbrik edir, onlara şərəfli və məsuliyyətli fəaliyyətlərində yeni uğurlar arzulayırıq.

Arzu Qasımova,

YAP Gədəbəy rayon təşkilatı

Böyük Qaramurad kənd ərazi partiya təşkilatının sədri

Paylaş:

Baxılıb: 264 dəfə