Slovakiya Qarabağın bərpasında fəal iştirak edir

Bakı:

22 °C

73 %

11 m/s

Əlaqə

AZ RU EN

Ana səhifə / Arxiv / Slovakiya Qarabağın bərpasında fəal iştirak edir

Slovakiya Qarabağın bərpasında fəal iştirak edir

16.07.2026 [16:38]

Qarabağın azad olunmasından sonra Azərbaycanın qarşısında dayanan ən mühüm vəzifələrdən biri işğaldan ağır zərər görmüş şəhər və kəndlərin yenidən qurulması, bu torpaqlarda həyatın bərpası oldu. Bu gün artıq Qarabağ təkcə genişmiqyaslı tikinti meydançası deyil, həm də beynəlxalq əməkdaşlığın uğurlu nümunəsinə çevrilib. Dünyanın müxtəlif ölkələrinin şirkətləri və investorları bu tarixi prosesə qoşulur. Bu ölkələr arasında Slovakiyanın xüsusi fəallığı diqqət çəkir.

Azərbaycan ilə Slovakiya arasında son illərdə formalaşan strateji tərəfdaşlıq münasibətləri artıq konkret layihələrdə öz əksini tapır. Prezident İlham Əliyevin Şuşada Slovakiya Prezidenti Peter Pelleqrini ilə keçirdiyi görüşdə vurğuladığı kimi, Slovakiyanın Qarabağın bərpasında fəal iştirakı Azərbaycan tərəfindən yüksək qiymətləndirilir. Dövlət başçısı bu əməkdaşlığın iki ölkə arasında mövcud olan etibarlı siyasi münasibətlərin və qarşılıqlı etimadın göstəricisi olduğunu xüsusi qeyd edib.

Qarabağın bərpası sadəcə dağıdılmış yaşayış məntəqələrinin yenidən tikilməsi deyil. Burada "ağıllı şəhər" və "ağıllı kənd" konsepsiyalarına əsaslanan müasir yaşayış məkanları yaradılır, rəqəmsal texnologiyalar, yaşıl enerji və ekoloji həllər tətbiq olunur. Slovakiya şirkətlərinin bu layihələrdə iştirakı onların yüksək texnoloji təcrübəsinə və peşəkarlığına verilən etimadın göstəricisidir.

Ağdam rayonunun Baş Qərvənd kəndində həyata keçirilən "Ağıllı kənd" layihəsi bunun ən parlaq nümunələrindən biridir. Slovakiya şirkətlərinin iştirakı ilə reallaşdırılan bu layihə gələcəyin kənd modelini formalaşdırır. Burada müasir infrastruktur, innovativ idarəetmə sistemi, ekoloji təmiz enerji mənbələri və yüksək yaşayış standartları tətbiq edilir. Layihə təkcə yeni evlərin tikintisini deyil, insanların təhlükəsiz və rahat yaşayışını təmin edən bütöv bir mühitin yaradılmasını nəzərdə tutur.

Slovakiya Prezidenti Peter Pelleqrini də Şuşada keçirdiyi görüş zamanı ölkəsinin şirkətlərinin Qarabağın yeni inkişaf mərhələsində iştirak etməsindən qürur duyduğunu bildirib. O, qısa müddət ərzində azad edilmiş ərazilərdə aparılan möhtəşəm quruculuq işlərini yüksək qiymətləndirərək, Slovakiya şirkətlərinin gələcək layihələrdə də fəal iştirak etmək niyyətində olduqlarını vurğulayıb.

Əslində, Qarabağın bərpasında beynəlxalq tərəfdaşların iştirakı Azərbaycanın həyata keçirdiyi siyasətin uğurunun göstəricisidir. Xarici şirkətlərin bu layihələrə maraq göstərməsi bölgədə sabitliyin, təhlükəsizliyin və əlverişli investisiya mühitinin formalaşdığını təsdiqləyir. Slovakiyanın fəal mövqeyi isə Avropa ölkələrinin Azərbaycanın bərpa və inkişaf strategiyasına verdiyi dəstəyin mühüm nümunəsidir.

Bu gün Qarabağda salınan yollar, hava limanları, yaşayış məntəqələri, məktəblər və xəstəxanalar gələcəyin inkişaf modelini formalaşdırır. Bu prosesdə Slovakiya ilə əməkdaşlıq təkcə iqtisadi deyil, həm də siyasi və humanitar baxımdan böyük əhəmiyyət daşıyır. Birgə həyata keçirilən layihələr Azərbaycan–Slovakiya münasibətlərini daha da möhkəmləndirir və qarşılıqlı etimadı gücləndirir.

Qarabağın dirçəlişi artıq dünyanın diqqət mərkəzindədir. Bu torpaqlarda aparılan genişmiqyaslı quruculuq işləri göstərir ki, dağıntıların yerində müasir şəhərlər və kəndlər yüksəlir, həyat yenidən canlanır. Slovakiyanın bu prosesdə fəal iştirakı isə dostluğun, tərəfdaşlığın və birgə inkişafın bariz nümunəsi kimi tarixə düşür.

Vüsalə Əliyeva

YAP Sədərək rayon təşkilatının sədri

Paylaş:

Baxılıb: 532 dəfə