Könüllülük: gənclərin inkişaf məktəbi

Bakı:

26 °C

61 %

9 m/s

Əlaqə

AZ RU EN

Ana səhifə / Arxiv / Könüllülük: gənclərin inkişaf məktəbi

Könüllülük: gənclərin inkişaf məktəbi

20.06.2026 [09:58]

Müasir dövrdə könüllülük əhatə dairəsi getdikcə genişlənən mühüm ictimai fəaliyyət istiqamətlərindən birinə çevrilib. Dünyanın bir çox ölkəsində olduğu kimi, Azərbaycanda da könüllülük hərəkatı son illərdə sürətlə inkişaf edərək gənclərin ictimai fəallığının artırılmasında mühüm rol oynayır. Müxtəlif sosial, mədəni, humanitar və ekoloji layihələrdə iştirak edən könüllülər həm cəmiyyətə fayda verir, həm də şəxsi inkişaf imkanları qazanırlar.

Azərbaycanda könüllülük hərəkatının inkişafı dövlət tərəfindən həyata keçirilən gənclər siyasətinin mühüm istiqamətlərindən biridir. Təsadüfi deyil ki, Prezident İlham Əliyevin Sərəncamı ilə 2020-ci il Azərbaycanda “Könüllülər İli” elan olunub. Bu addım könüllülük fəaliyyətinin cəmiyyət həyatındakı əhəmiyyətinin və gənclərin inkişafındakı rolunun dövlət səviyyəsində yüksək qiymətləndirildiyinin təsdiqidir.

Bu gün minlərlə gənc müxtəlif dövlət qurumlarında, beynəlxalq tədbirlərdə, forumlarda, sosial layihələrdə və xeyriyyə aksiyalarında könüllü kimi iştirak edir. Bu fəaliyyət onların təşkilatçılıq, liderlik, komanda ilə işləmək və ünsiyyət bacarıqlarının formalaşmasında mühüm rol oynayır. Bu bacarıqlar isə gənclərə gələcək karyera yolunda üstünlüklər qazandırır və rəqabətdə onları önə çıxarır. Əksər hallarda işəgötürənlər könüllülük təcrübəsini namizədin aktivliyinin və sosial məsuliyyətinin göstəricisi kimi qiymətləndirirlər.

Könüllülük eyni zamanda cəmiyyətdə həmrəylik və sosial məsuliyyət hissinin güclənməsinə xidmət edir. İnsanlar bu fəaliyyət vasitəsilə müxtəlif sosial problemlərlə yaxından tanış olur və onların həllinə töhfə verməyə çalışırlar. Bu isə daha fəal və məsuliyyətli vətəndaş cəmiyyətinin formalaşmasına şərait yaradır. Prezident İlham Əliyev Azərbaycan könüllülərinin VII Həmrəylik Forumunun iştirakçılarına müraciətində qeyd edib ki, Ümummilli Lider Heydər Əliyevin xeyir-duası ilə ötən əsrin 90-cı illərindən ölkəmizdə xüsusi vüsət almağa başlayan könüllülük hərəkatı milli-mənəvi dəyərlərə bağlılığın və Vətənə xidmətin nümunəsinə çevrilib. Bu fikir könüllülüyün təkcə ictimai fəaliyyət deyil, həm də vətəndaş məsuliyyəti və dövlətə xidmət məktəbi olduğunu bir daha göstərir. Nəticə etibarilə, könüllülük gənclərin həm şəxsi, həm də peşəkar inkişafına xidmət edən, eyni zamanda cəmiyyətə mühüm töhfələr verən bir fəaliyyətdir. Ona görə də könüllülüyə vaxt itkisi kimi deyil, gələcəyə yatırılan dəyərli investisiya kimi baxmaq daha doğru olardı.

Fidan Cəfərova,

Bakı Dövlət Universitetinin tələbəsi

Paylaş:

Baxılıb: 504 dəfə