Şuşa Bəyannaməsi: Azərbaycan–Türkiyə Qardaşlığının Müttəfiqlik Zirvəsi

Bakı:

27 °C

60 %

9 m/s

Əlaqə

AZ RU EN

Ana səhifə / Arxiv / Şuşa Bəyannaməsi: Azərbaycan–Türkiyə Qardaşlığının Müttəfiqlik Zirvəsi

Şuşa Bəyannaməsi: Azərbaycan–Türkiyə Qardaşlığının Müttəfiqlik Zirvəsi

11.06.2026 [18:58]

2021-ci il iyunun 15-də Azərbaycanın mədəniyyət paytaxtı olan Şuşa şəhərində Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan tərəfindən “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi” imzalanmışdır. Bu sənəd iki qardaş ölkə arasında mövcud olan strateji tərəfdaşlıq münasibətlərini daha yüksək səviyyəyə qaldıraraq müttəfiqlik mərhələsinə yüksəltmişdir.

Şuşa Bəyannaməsi Azərbaycan və Türkiyə arasında tarixən formalaşmış dostluq, qardaşlıq və həmrəylik münasibətlərinin hüquqi-siyasi təsdiqi kimi mühüm əhəmiyyət daşıyır. Bəyannamədə iki dövlətin müstəqilliyinin, suverenliyinin, ərazi bütövlüyünün və beynəlxalq səviyyədə tanınmış sərhədlərinin qorunmasına qarşılıqlı dəstək ifadə olunur. Sənəd regionda sülhün, təhlükəsizliyin və sabitliyin möhkəmləndirilməsinə xidmət edən mühüm addım kimi qiymətləndirilir.

Bəyannamənin əsas istiqamətlərindən biri müdafiə və təhlükəsizlik sahəsində əməkdaşlığın genişləndirilməsidir. Sənəddə qeyd olunur ki, tərəflərdən hər hansı birinin müstəqilliyinə və ya ərazi bütövlüyünə qarşı təhdid və ya təcavüz olduğu halda, birgə məsləhətləşmələr aparılacaq və zəruri tədbirlər görüləcəkdir. Bu müddəa Azərbaycan–Türkiyə münasibətlərinin strateji xarakterini və qardaşlıq bağlarının gücünü bir daha nümayiş etdirir.

Şuşa Bəyannaməsi iqtisadi əməkdaşlıq baxımından da geniş perspektivlər açır. Ticarət dövriyyəsinin artırılması, enerji layihələrinin inkişaf etdirilməsi, nəqliyyat-kommunikasiya əlaqələrinin gücləndirilməsi və yeni investisiya imkanlarının yaradılması sənədin mühüm istiqamətləri sırasındadır. Xüsusilə Zəngəzur dəhlizinin açılması ilə bağlı müddəalar regionun iqtisadi inkişafına və beynəlxalq nəqliyyat marşrutlarının genişlənməsinə mühüm töhfə verə bilər.

Sənəddə humanitar, mədəniyyət, təhsil, gənclər və idman sahələrində əməkdaşlığın daha da dərinləşdirilməsi məsələlərinə də xüsusi yer ayrılmışdır. Azərbaycan və Türkiyə xalqları ortaq tarixə, dilə, mədəniyyətə və milli-mənəvi dəyərlərə malik olduqlarından bu istiqamətdə həyata keçirilən layihələr qardaşlıq münasibətlərinin daha da möhkəmlənməsinə xidmət edir.

Şuşa Bəyannaməsinin məhz Şuşa şəhərində imzalanması xüsusi rəmzi məna daşıyır. Azərbaycanın Vətən müharibəsində qazandığı tarixi Zəfərdən sonra Şuşanın azad olunması ölkəmizin dövlətçilik tarixində yeni mərhələnin başlanğıcı olmuşdur. Məhz bu şəhərdə imzalanan Bəyannamə regionda yaranmış yeni reallıqların və Azərbaycan-Türkiyə birliyinin təntənəsinin ifadəsinə çevrilmişdir.

Bu gün Şuşa Bəyannaməsi Azərbaycan və Türkiyə münasibətlərinin inkişafında mühüm yol xəritəsi rolunu oynayır. Sənəd iki qardaş dövlət arasında siyasi, iqtisadi, hərbi və humanitar sahələrdə əməkdaşlığın daha da genişlənməsinə, türk dünyasının birliyinin möhkəmlənməsinə və regionda uzunmüddətli sülhün təmin olunmasına mühüm töhfə verir. Şuşa Bəyannaməsi bir daha sübut etdi ki, Azərbaycan və Türkiyə “Bir millət, iki dövlət” prinsipi əsasında gələcəyə inamla addımlayan, qarşılıqlı etimada və strateji tərəfdaşlığa söykənən qardaş ölkələrdir. Bu tarixi sənəd xalqlarımızın birliyinin, dövlətlərimizin gücünün və ortaq gələcək hədəflərinin parlaq ifadəsi kimi tarixdə əbədi yaşayacaqdır.

Lalə Məmmədova

YAP Samux rayon təşkilatının əməkdaşı

Paylaş:

Baxılıb: 481 dəfə