Azərbaycan Türkiyə sarsılmaz qardaşlığı

Bakı:

24 °C

83 %

4 m/s

Əlaqə

AZ RU EN

Ana səhifə / Arxiv / Azərbaycan Türkiyə sarsılmaz qardaşlığı

Azərbaycan Türkiyə sarsılmaz qardaşlığı

10.06.2026 [17:52]

2021-ci il iyunun 15-də Azərbaycan və Türkiyə arasında imzalanan Şuşa Bəyannaməsi iki qardaş ölkənin münasibətlərində yeni mərhələnin başlanğıcını qoydu. Azərbaycanın mədəniyyət paytaxtı olan Şuşa şəhərində Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan tərəfindən imzalanan sənəd strateji tərəfdaşlığın müttəfiqlik səviyyəsinə yüksəldiyini rəsmən təsdiqlədi.

Şuşa Bəyannaməsi Azərbaycan və Türkiyənin gələcək inkişaf strategiyasını müəyyən edən mühüm siyasi sənəd olmaqla yanaşı, beynəlxalq ictimaiyyətə də aydın mesajlar vermişdir. Bu sənəd ilk növbədə göstərdi ki, Azərbaycan və Türkiyə arasında münasibətlər təkcə dostluq və qardaşlıq prinsiplərinə deyil, həm də konkret siyasi, iqtisadi və hərbi müttəfiqlik mexanizmlərinə əsaslanır.

Şuşa Bəyannaməsi təkcə iki dövlət arasında münasibətləri deyil, həm də regionun geosiyasi mənzərəsini formalaşdıran mühüm sənəd kimi qiymətləndirilir. Şuşa Bəyannaməsi eyni zamanda dünyaya göstərdi ki, Azərbaycan Vətən müharibəsində əldə etdiyi tarixi Qələbə nəticəsində regionda yeni reallıqlar yaradıb və bu reallıqlar artıq beynəlxalq münasibətlər sistemində qəbul olunur. Şuşada imzalanan müttəfiqlik sənədi Azərbaycanın güclü dövlət kimi mövqeyini daha da möhkəmləndirmiş, Türkiyənin isə regionda etibarlı tərəfdaş olduğunu bir daha nümayiş etdirmişdir. Şuşa Bəyannaməsi müttəfiqlik münasibətlərinin geostrateji əhəmiyyətini artırmaqla yanaşı qardaşlığın yeni tarixi mərhələsidir. Bu Bəyannamə ölkələrimiz arasındakı münasibətlərin bütün müstəvilərdə davamlı inkişafını təmin edir.

Bəyannamədə Azərbaycan və Türkiyənin xarici siyasət ilə bağlı müddəanın yer alması mühüm əhəmiyyət kəsb edir. Belə ki, tərəflər xarici siyasət sahəsində əlaqələndirmənin və müntəzəm ikitərəfli siyasi məsləhətləşmələrin həyata keçirilməsinin vacibliyini qeyd ediblər və bu istiqamətdə Azərbaycan Respublikası ilə Türkiyə Respublikası arasında Yüksək Səviyyəli Strateji Əməkdaşlıq Şurası çərçivəsində fəaliyyətlərin əhəmiyyətini vurğulayıblar. Tərəflər öz milli maraq və mənafelərinin təmin edilməsinə yönəlmiş müstəqil xarici siyasət aparırlar. Sənədə əsasən, tərəflər beynəlxalq münasibətlərin inkişafı, regional və qlobal təhlükəsizlik və sabitlik məsələlərinin həlli üçün birgə səylər göstərirlər.

Son beş il ərzində Azərbaycan-Türkiyə əlaqələri daha da möhkəmlənib. Müdafiə sənayesi, hərbi təlimlər, enerji layihələri və nəqliyyat dəhlizləri üzrə əməkdaşlıq yeni mərhələyə qədəm qoyub. Xüsusilə regionun nəqliyyat və logistika imkanlarının genişləndirilməsi istiqamətində həyata keçirilən layihələr hər iki ölkənin strateji əhəmiyyətini artırıb. Şuşa Bəyannaməsi həm də Türk dünyasının inteqrasiyası baxımından mühüm əhəmiyyət daşıyır. Bu sənəd qardaş ölkələrin ortaq tarix, mədəniyyət və milli maraqlar əsasında birliyini daha da gücləndirib. Bəyannamənin imzalanma məkanı kimi Şuşanın seçilməsi isə xüsusi rəmzi məna daşıyır. Uzun illər işğal altında qalmış şəhərdə belə bir sənədin imzalanması Azərbaycanın ərazi bütövlüyünün bərpasının və bölgədə yeni reallıqların göstəricisi kimi tarixə düşüb.

Bu gün, Şuşa Bəyannaməsinin imzalanmasından beş il sonra, sənədin əhəmiyyəti daha aydın görünür. Azərbaycan və Türkiyə arasındakı müttəfiqlik münasibətləri regional sabitliyin, təhlükəsizliyin və inkişafın mühüm amillərindən biri olaraq qalır. Şuşada atılan bu tarixi addım iki qardaş xalqın birliyinin və həmrəyliyinin gələcək nəsillərə ötürüləcək mühüm siyasi irsidir. “Bir millət, iki dövlət” prinsipi üzərində qurulan bu müttəfiqlik əlaqələri gələcək illərdə də regionun inkişafına və xalqların rifahına töhfə verməyə davam edəcək.

Şuşa bəyannaməsi Azərbaycan – Türkiyə birliyinin, qardaşlığının gücünü nümayiş etdirən və gələcək əməkdaşlığın əsas istiqamətlərini müəyyən edən tarixi sənəd kimi böyük əhəmiyyət daşıyır.

Qadir İbrahimov

YAP Culfa rayon təşkilatının sədri

Paylaş:

Baxılıb: 670 dəfə